Ezekieli 27 - KITAABA WAAQA

¹ AABBO Waaqi na yaame waan nani jed'e,

^2-3 Namicha, dira Tiro, ka afaani baariini jiru, ka nama afaani baariini jiru ch'ufa daldala woliini tolchu faarsi bohi waan jettuuni, AABBO Waaqi guddaani waan jed'u, Ee Tiro, atini mid'aaguma teetiini koorta.

⁴ Worri kanke baariini, ijaartuni tanteleeni aka hobolo mid'aadu si jaarte.

⁵ Worri gaara Hermoni d'aqe, mukha dadansa ch'ire, hind'eesa Lebanoni ch'ire utuba sii tolche.

⁶ Ejersa Bashani ch'ire mukha hobolooni oofani tolche, worri mukha d'ed'eera Kipro d'ufeeni, nafa kanke jaare ilka arbaatini ch'okhe.

⁷ Woya sini deemsisani ta boofta barriti, ta lafa Misiriti d'ufte fagootu beekhani. Darbaala kanke woya bule diimtu lafa Kiproti d'uftuni mid'aasani.

⁸ Nami si oofulleni worra dira Sidonitifi ka Arvadi keesaa d'ufe. Nami hobolo teesani keesa hojatu ch'ufti hogeeyi.

⁹ Nami hobolo mid'aasuleeni hogeeyi Gebali d'ufte. Hobolo ch'ufafi nami keesa hojatuleeni fulla tante d'ufe daldala tolche.

¹⁰ Askartini lafa Ajemitifi ta Luditifi ta Putu sii duulte. Worri wonteefi kofia sibiila maneeni tante keesa oli keeyate, Nami gurra siti tolcheleeni worruma.

¹¹ Askartini Arvadi naabo tante eedde, nami dira Gamadileeni doofi tante eege. Worri wonte ufi maneeni tanteeti fafannifate. Nami mid'aaguma tana sitini d'ufeleeni worruma.

¹² Atini daldala lafa Tarshishitini woliini tolchite qarsifi sibiila guraachafi saldaqafi sibiila qalai qawe iraa mid'aasani fuute miha kanke guddaani woljijirate.

¹³ Atini lafa Girikitifi ta Tubalitifi ta Mesheki keesa daldalte, miha kanke tissefi waan sibiila diimani mid'aasanini jijiratte.

¹⁴ Atini miha kanke fardo miha baatufi ka nama baatufi gaangele lafa Beth-Togarma d'ufteenini jijiratte.

¹⁵ Worri Rodi si woliini daldale, ammalle worri lafa afaani baariini tauleeni ilka arbaatifi mukha jaba aka ch'anatini woli jijirate.

¹⁶ Worri Shamu miha kanketifi waan heddu lafa tante keesaa baha bitate ammalle worri d'akha ch'uluqa dotifi woya bule diimtufi waan barreesani ch'okhani heddufi woya booftatifi d'akha baariini ka booji fakaatufi d'akha diima ch'uluqale ch'ufa guure miha keetiini woljijirate.

¹⁷ Worri Yudatifi ka Israelileeni dargayefi damma, d'ad'a, waan sagaleeni urgeesanini d'ufe waan kanketini siraa bitate.

^18-19 Worri Damaski miha kanketifi waan lafa tante keesati baha bitate, daad'i Helboni d'ufteefi woya shuufa ta Sahari d'ufteeni d'ufe miha kanke sunini siraa jijirate. Ammalle worri sibiila guraacha ka bassanifi waan sagaleeni urgeesanini d'ufe miha kanketini jijirate.

²⁰ Worri Dedani raro fardatini d'ufe, miha kanketini jijirate.

²¹ Araftifi worri lafa Kedari mohatuleeni ilmoole hoolatifi elemiyeefi laleesani d'ufe, miha kanketini jijirate.

²² Daldaltuni Shebatifi ta Raama d'akhaye ch'uch'ulut'ufi worqifi qayyaani d'ufte, miha kanketini jijiratte.

²³ Dira Haranitifi ka Kannetifi ka Edenitifi, ka Ashurutifi ka Kilmatiifi, daldaltu Shebaleeni ch'ufti si woliini daldalte.

²⁴ Worri woya mimid'aadufi bubule didiimtufi woya barreesani ch'okhanifi makheka barritifi haadafi mseensa aka dansaa fohani siti gurgure.

²⁵ Miha kanke ka daldala hobolo gugurdoti baata. Atinileeni akuma hobolo bisaani keesa deemtu jirta, ta miha daldala gudda baatu.

²⁶ Nami si oofu baariinini si baamnaani, qilleensi ilaboruti d'ufe, d'ae si ch'abse, gara si galche.

²⁷ Miha atini baatu ch'ufafi nama si keesa hojatufi hogeeyi teetifi daldaltu teetifi askartini si gubba jirtu ch'ufti atini ch'ach'abt'e gaargalte jennaani bisaani keesati jige, bisaani liqimsani.

²⁸ Haga iyyanna nama si keesa hojatu, ka bisaani liqimsani, afaani baariini suni ch'ufati d'agayani.

²⁹ Hobolo ch'ufa nami ya keesaa bahe, nami keesa hojatuleeni ya kae yae lafa godduti taake.

³⁰ Worri ch'ufti laalefate sii bohe, biyye matati ufi naqe, daara keesa gangalata.

³¹ Worri dua tanteeti mata haadate, ch'arqi naqate, garaa hammaate boha.

³² Bohani si faarsani waan jed'ani, Dira kamiti Tiro gahe, ka amma bisaani baariini liqimsani ch'allisisani?

³³ Gaafa duri daldala miha kanke lafa d'ibi geesani, gochiti hedduuni gammadde siraa quufte. Ammalle hayyooti hedduleeni mihuma kanke sunini duroomte.

³⁴ Ammo amma tana atini ya ch'ach'abt'e, baariini keesati garagalte, d'immu galaana lit'e. Miha kanketifi nama si keesa hojatule ch'ufa ya si woliini baariinini liqimsite.

³⁵ Nami d'aatu baariini jiru ch'ufti, waan atini taate suni arginaani rifate, hayyoota worrale lubbuuni d'ufte, mudamsuuni fuula worraa iraa mullate.

³⁶ Atini yayu badde! Deebiani si inargani, daldaltuni lafa ch'ufaleeni rifate holate, waan wonti sunini worra qabatu seete mudamti.