Ezekieli 25 - KITAABA WAAQA

¹ AABBO Waaqi na yaame waan nani jed'e,

² Namicha, fuula kanke lafa Amoniti deefad'i abaari waan jettuuni,

³ Dubbi AABBO Waaqa gudda d'agaya, wonti inni jed'u tana: Isani Mana kiyya ka t'ureesanifi lafa Israeli ta balleesanifi gumi Yuda ta boojiani agarraani gammaddani.

⁴ Waan isani waan suni jettani gammaddanifi, anini harka gosa lafa gamooji ta ilaboru keesaa d'uftuti isani kenne, worri isani dabsata. Worri bulto jaarate achi qubata, mid'aanifi aanani isani sila nyaatani d'uddani nyaate d'uga.

⁵ Anini dira Raba balleese, lafa gaali keesaa oolu tolche, lafa Amoni ch'ufa fulla hooliyeeni ooltu tolcha, duuba akanaani aka anini AABBO Waaqaa beetani.

⁶ Wonti AABBO Waaqi guddaani jed'u tana: Isani gammaddani, harka d'ooftani sirbitani lafa Israeli tufattani.

⁷ Waan isani waan kana taatanifi, anini harka gosa d'ibi ka waan keesani hatte isani saamtuti isani kenna. Anini aka takaa inargini isani balleese fiiga isani d'owe, aka isani itumaa deebitani gosa intaane yokhaani lafa inhoranne isani tolcha. Duuba akanaani aka anini AABBO Waaqaa beetani.

Waan Moabu ka fagani

⁸ AABBO Waaqi guddaani waan jed'e, Waan worri Moabu worri Yuda akuma worra lafa d'ibi jira jed'eefi,

⁹ anini dira seera lafa Moabu nyaapa ira d'owu nyaapa iti erge haasisa. Dira, Beth-Yeshmothitifi, Baal-Meonitifi Kirathamule.

¹⁰ Ammalle anini gosa lafa gamooji, ta ilaboru teetu, Moabufi Amoni dabsachiisa, aka Moabuni deebite gosa intaane.

¹¹ Anini worra Moabu balleesa, duuba worri akanaani aka anini AABBO Waaqaa beekha.

Waan Edomu ka fagani

¹² AABBO Waaqi guddaani waan jed'e, Worri Edomu worra Yuda aka hama haalo baafate, akanaani wollaala hama keesa ufi buuse.

¹³ Tanaafi amma AABBO Waaqi guddaani waan jed'u, Anini worra suniti kae namafi saa worrale balleesa. Anini dira Tamariti fuud'e, dira Dedaniti d'aabe, lafa ch'ufa balleese ona tolche, achiti nami hedduleeni woraanaani hobaa.

¹⁴ Gumiini tiyya ta Israeli worra Edomu haate haalo naa baafti, ammalle waan dallansuuni tiyya nama tolchitule worra garsiifti. Duuba akanaani worri Edomu aka anini haalo baafad'e arga. Nami dubbi tana jed'e AABBO Waaqa gudda.

Waan Filisti ka fagani

¹⁵ Wonti AABBO Waaqi guddaani jed'u tana: Worri Filisti yayu worra Yuda, ka haguma duriti woli nyaapa haalo hamtu fuud'e jibba keesa balleese.

¹⁶ Tanaafi AABBO Waaqi guddaani waan jed'u, Anini worra Filisti had'e hobaase, daara d'owe, nama diida Filisti keesa tau tokole bahu d'owa.

¹⁷ Anini aka male worrati dallane, worra hobaase haalo baafad'a. Duuba akanaani worri aka anini AABBO Waaqa beekha.