Ezekieli 23 - KITAABA WAAQA

¹ AABBO Waaqi na yaame waan nani jed'e,

² Namicha, duri dubra lamati jira, ta woliini d'alate.

³ Dubarti tunini gaafa lafa Misiri keesa jirtu, ato didiqootu, dubrooma d'abde sharmut'a taate.

⁴ Ta angafa maqaani Oholi (isiini Samaria), maand'iti maqaani Oholiba (isiini Yerusalemu). Anini worra lachu fuud'e, ilmaani iraa d'ad'ale.

⁵ Ato na jala jirtu, Oholaani huji sharmut'oma taani lakisu didde jaallowani isii, ta worra Ashuru taani, aka male d'araateefi iraa tau didde.

⁶ Jaallowani isii tunini askarti woya bule didiimtu naqatufi worra gugurda askarti, ka worri ch'ufti kaima mimid'aaga teeto farda ka guddo farda gulubsisu beekhu.

⁷ Isiini sharmut'a, ta worri gugurda Ashuru ch'ufti iti yau. D'araa nafa isii gula isiini Waaqa worra Ashuru kad'ate akasiini ufi t'ureesite.

⁸ Isiini huji isi ta sharmut'oma, ta gaafa lafa Misiri keesati dubrooma d'abde taani, hojatte lakisu didde. Haguma gaafa isiini dubrati asi, d'iirti isi bira rafte sharmut'a tolchite.

⁹ Tanaafi anini isi harka jaallowani isii ta Ashuru, ta isiini guddo d'araatufi, taaniti kenne.

¹⁰ Worri woya isi iraa hiikhe, qulla diidati baase, ilmaani isii ta d'iiratifi ta dubrale qabe, goraadeeni isi ijeese. Nad'eenileeni fulla ch'ufa waan isii tolchani wolti hasasite.

¹¹ Ato oboleetini isii Oholibani waan kana agartele, isiini ufiftu isiile ira sharmut'omte badde.

¹² Isiileeni akasuma jara gugurdafi jara askarti Ashuruti mataa, ka woya mimid'aadu naqatufi askarti farda, ta ch'ufti kaima mimid'aaga, d'araateefi gula badde.

¹³ Anini aka isiini ch'eeraa foko inqamne, akuma oboleeti isii taate, arge jibbaad'e.

^14-15 Isiini haga qarale ira sharmut'a taate, ch'eeraa foko d'abde, akheekha worra Babiloni, ka girgida mana irati barreesani hallu diimtuni ch'okhani gurda iti naqani, sure shooba matati marani, gula badde.

¹⁶ Isiini akuma worra agarteeni iti d'araate, lafa Babiloni keesati qonqo iti ergate, ufiti gayaamte.

¹⁷ Worri Babiloni d'ufe isi bira rafe, t'ureese iti tabate, duuba eege isiini worra quufte, tufate jibbite.

¹⁸ Isiini gumi durati qulla ufi mullifte, sharmut'oma ufi lalabde. Jennaani anini akuma oboleeti isii jibbe jibbaad'e biraa deeme kaani, isiile biraa deeme.

¹⁹ Isiini haga qara kaani ira sharmut'a taate, akuma gaafa dubra, ka lafa Misiri keesa jirtu kaani, taate.

²⁰ Ammalle isiini jaallowani isii, ta waan aka harreetini yaate, aka farda korma d'ala d'araau jaalate.

²¹ (Oholiba, atini waan lafa misiri keesati taate, ka nami d'iira guntuta keetiti tabate dubrooma si d'oweti deebiu feeta.)

Aka Waaqi oboleeti maand'iti abaare

²² Duuba amma, Oholiba, wonti anini, AABBO Waaqi, sini jed'u tana: Atini jaallowani tante taani ya quufte lakifte, ammo anini worra siti kaase, worri d'ufe gama ch'ufaa si marsaa:

²³ worri lafa Babilonitifi ka Kaldayotifi ka Pekoditifi ka Shoatifi ka Koatifi ka Ashuruleeni. Anini worra kaima, ka gurra qabu, mimid'aaga kana ch'ufafi worra askarti fardati gugurda ch'ufa wolti baase,

²⁴ duuba worra duula gudda gaari fardi hirkisufi ka sagale baatu qabuti mirgaa d'ufe si had'a. Worri kofia sibiila naqate, wonte guurate si marsaa. Duuba anini harka worrati si kenne, worri aada ufi gula waan fed'u si tolcha.

²⁵ Anini siti dallane. Worra siti lakise worri dallansu ufi keesa waan fed'u si tolcha. Funnaanifi gurra siraa ch'irani, ilmaani tante fit'ani. Ee, ilmaani tante ta d'iiratifi ta dubrale siraa fuud'ani ato jirtu gubani.

²⁶ Woya irreeni siraa hiikhani faaya atini naqatu ch'ufa siraa yaafatani.

²⁷ Anini d'araa atini d'iira d'araatu siraa balleese, sharmut'oma atini lafa Misiriti barate kaani si d'owa. Atini deebite waan harkaani boch'ani kad'atani d'araate, yokhaani lafa Misirile inqaabattu.

²⁸ Wonti AABBO Waaqi guddaani jed'u tana, Anini harka worra atini jibbite garaa iti hammaateti si kenna,

²⁹ ammalle waan worri si jibbufi, worri waan atini hojatte horate ch'ufa siraa fuud'e, qulla si d'aabe, sharmut'oma kanke diidati baasa. Waan kana d'araa teetifi sharmut'oma keetiti

³⁰ sitini d'ufa. Atini gosa ch'ufaa sharmut'a taate, waan worri harkaani boch'e kad'atuni ufi t'ureesite.

³¹ Waan atini faanuma oboleeti teeti baatefi, anini muduunu gaargala, ta isiini keesaa woi d'uddeeni, woi si baasa.

³² AABBO Waaqi guddaani waan jed'u, Atini muduunu guddo keesa qabdu ta oboleeti teeti keesaa woi d'udda. Nami ch'ufti si tufate si goyeesa; muduununi ya guutamte.

³³ Isiini si yaadesite si macheesiti; muduununi oboleeti tante Samaria, ta sodaafi badiini siti d'uftu.

³⁴ Atini keesaa woi d'udde, fooqifte, ch'ach'aba isiitiini harma ufi tatarsaafta. Nami dubbi tana jed'e ana, AABBO Waaqa gudda.

³⁵ Duuba amma, wonti AABBO Waaqi guddaani jed'u tana: Waan atini na deete dudda nati galteefi, d'araafi sharmut'oma keetifi gaargalta.

Aka Waaqi oboleyaani dubra tana lamaani abaare

³⁶ AABBO Waaqi na yaame waan nani jed'e, Namicha, atini aka Oholafi Oholiba dubbi qortu kurfo jirta? Waan hamtu worri tae worrati himi.

³⁷ Worri yayu nama barate namale fit'e — waaqoota d'araa kad'ate ilmaani naa d'ale fit'e. Ammalle ilmaani tiyya qaqalani waaqa isaaniti sorio baasani.

³⁸ Wonti worri tae tana ch'allaniti, worri mana kiyya t'ureese, seera guyya Sabato, ka anini tolchele, yake.

³⁹ Worri guyyuma ijoolle tiyya waaqoota d'ara taani sorio baase, Mana kiyya d'ufe t'ureese!

⁴⁰ Maro heddu nama fago jiru nama iti ergani yaamani, duuba nami sunini d'ufe. Duuba yo worri sunini d'ufe, oboleyaani lamaani taani nafa diqate, ila kuulate, faaya naqate,

⁴¹ barch'uma dadansa ira teteete, mesa waan dadansa irati massani, qayyafi d'ad'a anini kenneefi gubba nat'e, ufi dura d'aabde.

⁴² Worri jaallowani isii, ka lafa gamoojiti d'ufe, ka woma iyyaalle, iyyaa d'ufe iti olduude. Worri sunini d'ufe, harka worraa mirga iti naqe waan mid'aadule mata worrati naqe.

⁴³ Jennaani anini herege waan jed'e, worri kunini niiti qara sharmut'omani jaarte hobaateti yau jira.

⁴⁴ Worri halkani guyya nad'eenuma babadole sharmut'a, ta Oholafi Oholiba jed'ani, tanati yaa.

⁴⁵ Nami d'ugaa qajeelani nad'eeni tanaani, isiini sharmut'a harka d'iiga jed'e wollaala iti mura. Wonti akanatiifi isiini sharmut'oma gula yaate, namale ijeefte.

⁴⁶ Wonti AABBO Waaqi guddaani jed'u tana: Tuuta namaa, ta d'ufte worra mudamsiifte saamtu, iti yaami.

⁴⁷ Tuuti sunini ha d'akhaani worra haate, goraadeeni worra ch'irte, ilmaani worraa fit'e, mana worrale gubduti.

⁴⁸ Anini lafa tana keesa fulla ch'ufati huji sharmut'oma balleesa, aka nad'eeni d'ibiini waan kana arginaani worra gula baate sharmut'a intaane.

⁴⁹ Ammalle isani, oboleyaani dubra tana lamaani — anini maro sharmut'oma keesanitifi ch'ubbu teesani, ta isani Waaqa d'ara kadat'anile, isani gaargalcha. Duuba akanaani aka anini AABBO Waaqa gudda beetani.