Ezekieli 13 - KITAABA WAAQA

¹ AABBO Waaqi na yaame waan nani jed'e,

² Namicha, raagoota Israeli ta woma qalbiini isii hereddu faddu, dubbi worraa, d'aareesi waan jettuuni, Dubbi AABBO Waaqa ch'aqasa.

³ AABBO Waaqi guddaani waan jed'u, Raagooti daalloti tunini imbaddi! Worri qalbuma ufitini woi faga, ammo daayya womatu inargu.

⁴ Worra Israeli, raagooti teesani geedala onati galtu fakaati.

⁵ Worri fulla naaboni ch'abt'eeni inqorqoratu, yokhaani injaaru, tanaafi guyya AABBO Waaqi woraanaani d'ufu nami Israeli tokoleeni dandae duraa imbahu.

⁶ Daayyani worraa d'ara, himaansi worraleeni kiyyiba. Worri waan kana AABBO Waaqati jed'a, nuni jed'e, jed'a, ka anini worra inergini. Ato waan suni beekhu worri dubbi worraa ta d'ugooftu eega.

⁷ Ammo anini waan worraani jed'u, Daayyani isani gartani d'ara, wonti isani himtanileeni kiyyiba. Dubbini tunini ta AABBO Waaqa jettani, ammo anini woma isaniini injenne.

⁸ Tanaafi AABBO Waaqi guddaani waan worraani jed'u, Waan isani kiyyiba dubbattani daayya d'ara gartanifi, anini ya isani jibbe.

⁹ Anini raagoota daayya d'ara argitufi ta waan d'ara faddu ingaargalcha. Gaafa hegeri gumiini tiyya wolti baate koratu, isani kora suni keesa injirtani, maqa keesanile worra Israeliti indarani. Haguma jirtani lafa teesaniti indeebitani. Duuba akasiini aka anini AABBO Waaqa gudda beetani.

¹⁰ Raagooti gumi tiyya sobde, Lafti nagaya jette, ka ufiftu nageenni injirre! Gumiini tiyya ya naabo laaftu jaarate, raagootileeni yayu d'ufte naabo suni booji adi ifsite mid'aasite.

¹¹ Waan atini raagootaani jettu, Naaboni teesani injiddi, anini tamna bokayatifi d'akhaani roobe, bubbe jabduleeni d'ufe,

¹² naabo suni d'ae balleese duuba nami ch'ufti, Boojini adini naabo tanaani mid'aasani taani eesa baati? jed'e gaafata.

¹³ Tanaafi amma tana AABBO Waaqi waan jed'u: Dallansu tiyya keesa anini bubbe jabdufi bokaya gudda d'akhaani roobu, ka naabo tana balleesu, gadi erga.

¹⁴ Anini naabo worri booji adi ibse tana ch'ach'abse bulleese, d'akha isiini yayabani diidati ga yaasa. Naaboni sunini hojja jiddu isani ch'ufa inhobaafti. Duuba akanaani nami ch'ufti aka anini AABBO Waaqa hubata.

¹⁵ Naabo sunifi nami isi booji adi ibseelini waan dallansuuni tiyya worra tolchitu inarga. Duuba anini waan isaniini jed'u, Naabofi nami isi booji adi dibeleeni ch'ufti ya woliini bade —

¹⁶ raagoota lafa Yerusalemuni, lafti nagaya jettu, ta ufiftu lafti suni nagaya inqamne. Nami dubbi tana jed'e AABBO Waaqa gudda.

¹⁷ AABBO Waaqi waan jed'e, Namicha, amma nad'eeni gosa teeti ta woi himtu laali, dubbi worraa d'aareesi.

¹⁸ Waan AABBO Waaqi guddaani jed'u iti himi, waan jettuuni. Nad'eeni tana, isani ya baddani! Isani qud'aama harkaa namaa hod'itani hagogo falfalaa mata ira namaa keetani, aka akasiini t'urura keesa nama buuftani nama balleesitani. Isani irre gumi tiyyaani ijeeftani jireesitani argu feetani, aka kara sunini woi argatani.

¹⁹ Isani gumi tiyya durati na tufatani, aka garbufi qit'a diqa toko argatani. Isani nama duu himmalini ijeeftani, nama sila duu male lakiftani. Duuba isani dubbi d'ara gumi tiyyati himtani, worri isani d'ugeefata.

²⁰ Wonti AABBO Waaqi guddaani jed'u tana: Anini qud'aama isani hod'itani, akasiini dua jireenna nama ch'ufa harkati deefachu feetani, diqole infed'u. Anini qud'aama suni harka keesani iraa ch'ire, gumi isani dua jireenna isii harkati deefachu feetani tana ga lakisa.

²¹ Anini hagogo mata keesani iraa fuud'e gumi tiyya harka keesani jalaa baasa, aka isiini deebite isaniti indeebine. Duuba akanaani aka anini AABBO Waaqa beetani.

²² Kiyyiba keesanini isani nama dadansa anini balleesu infeene sodachiiftani, worra hamamale ka sila hameenna ufi lakise lubbu ufi baasu fed'u d'owartani.

²³ Tanaafi amma daayya teesani ta d'araatifi wonti d'ara ka isani faddani ya muumme baate. Anini gumi tiyya harka keesani keesaa baasa, duuba akanaani aka anini AABBO Waaqa beetani.