Ezekieli 11 - KITAABA WAAQA

¹ Lubbuuni Waaqa oli na fuute, gara balbala Mana Waaqa, ta ilaboru, na geesite. D'aatu balbala suni anini d'iira diddami shani arge; jara suni keesa Yaazania ilma Azurutifi Pelatia ilma Benaiya, ka jari lachu gosa isaniti mataa, jira.

² Waaqi waan nani jed'e, Namicha, jari kunini waan hamtu herege dira kana keesati mala hama namaa d'aa.

³ Worri waan jed'u, Nu d'iotu ammalle mana jaarrana; diri kunini aka okote faara jira, nuleeni fooni isiini d'aabani fakaanna.

⁴ Tanaafi duuba, Namicha, worri kana badi isaani himi.

⁵ Lubbuuni AABBO Waaqa nara buute, jennaani inni waan nani jed'e, waan atini jettu, AABBO Waaqi waan jed'u, Isani worra Israeli, waan isani dubbattanifi waan isani malatanile ch'ufa anini imbeekha.

⁶ Isani dira kana keesati nama heddu fitt'ani, kara isaa keesa reefi namaa fulla ch'ufa guute.

⁷ Tanaafi amma wonti anini, AABBO Waaqi guddaani, isaniini jed'u tana: D'uguma diri kunini akuma okote jira; ammo fooni keesati d'aabani maani? Reefa nama isani fit'ani kanaati! Isani gaafasi; arma injirtani, anini dira kana keesaa boolati, isani d'aa.

⁸ Isani goraade d'eetani? Anini namaa goraadeeni d'ufe isani fit'u isaniti erga.

⁹ Anini dira kana keesaa isani baase harka nama gosa d'ibiti isani kenna. Anini ya dua isaniti mure.

¹⁰ Isaniini ch'ufti lafuma teesani keesati woraanaani hobaatani, duuba akanaani nami ch'ufti aka anini AABBO Waaqaa beekha.

¹¹ Diri kunini okote faara isani intahu, isani fooni isiiti d'aabani intaatani wonti isani baasa injirtu. Ato isani lafa Israeli keesa fulla feetani jiraatanile, anini isani gaargalcha.

¹² Duuba akanaani, aka anini AABBO Waaqaa, beetani, ammalle aka gaafa isani seera gosa d'ibi jabeesitani kaani seera kiyya ch'absitani dubbi tiyya iraa gortanile beetani.

¹³ Ato anini tae dubbi tana fagu, Pelatiani lafaa d'ae ch'iche. Jennaani anini lafaani ufi d'ae iyye waan jed'e, Ee AABBO Waaqa gudda, atini nama Israeli keesati hafe ch'ufa fit'u feeta?

Waan Waaqi worra boojianii kakhate

¹⁴ AABBO Waaqi na yaame

¹⁵ waan nani jed'e, Namicha, nami Yerusalemu keesa tau waan keetifi waan worra Israeli ka si woliini boojiani dubbate waan jed'u, worri boojiani sunini ya fagaate, tanaafi worri dandae AABBO Waaqa inkad'atu; inni lafa tana ya nuu lakise.

¹⁶ Amma tana waan anini sini jed'u, Kana worra sii woliini boojianiti himi. Nami lafa suni worra achiti gargari firfirse anuma. Ammo hataatuti, haga worri achi lafa suni keesa tau anini worra woliini taa.

¹⁷ Tanaafi waan jettuuni, wonti AABBO Waaqi guddaani jed'u, Anini lafa isani iti firfirse keesaa isani baase lafa Israeliti isani deebisa.

¹⁸ Worri hojja deebiu waan ch'eera hamtu achiti argu imballeesa.

¹⁹ Anini garaa haareesafi qalbi hareeti worraa kenna. Anini garaa worraa jajaba aka d'akha suni jijire, garaa laafa ka Waaqaa saalfatu kennafi.

²⁰ Duuba worri seerafi aada tiyya ch'ufa gula deeme guuta. Worri gumi tiyya tae, aninileeni Waaqa worraa taha.

²¹ Anini worra waan ch'eera hamtu gula deemu ingaargalcha, maro huji worraa hamtu sunitifi. Nami dubbi tana jed'e, AABBO Waaqa gudda.

Aka AABBO Waaqi Yerusalemu biraa deeme

²² Jennaani wonti koola ka lubbu qaba kaani barifte, wonti miila gaari fakaata kaanileeni worruma woli yaati; ammalle ifsaani bibiliqu, ka aka AABBO Waaqi Israeli arti jiru garsiisu kaanileeni gubba waan suni jira.

²³ Duuba ifsaani kaani dira keesaa bahe gaara diraani ilaboru d'aqe.

²⁴ Duuba daayya keesa lubbuuni AABBO Waaqa oli naa fuute, gara worra boojiani lafa Babiloni jiru kaani na deebifte. Daayyani taani nara banaani

²⁵ anini waan AABBO Waaqi na garsiise worra boojiani suniti hime.