Ezekieli 1 - KITAABA WAAQA

DAAYYA QARA WAAQI EZEKIELI GARSIISE ( 1.1—7.27 )

¹ Guyya shaneeso, jia afreeso, ka ganna soddomeeso, anini, qaalluuni Ezekielini, ilmi Buzi, worra Yahudi ka boojiani woliini, d'aatu galaana Kebari lafa Babiloni jira. Duuba gubani banamte jennaani daayya keesa Waaqa arge.

² (Gaafi suni ganna shaneeso ka haga hayyu Yekonia boojiani.)

³ Artiti, lafa Babiloni keesa, ka anini d'aatu galaana Kedari jiru, anini qonqo AABBO Waaqa d'agaye jabeenna isaa argad'e.

⁴ Jennaani anini oli millad'e, dumansa bokaya gudda mirgaa d'ufu arge. Dumansa suni keesa angaasuuni bibilit'e, lafti ch'ufti guyyaate. Fulla angaasuuni suni baatefi waan toko ka aka sibiila diima bibiliqati jira.

⁵ Duuba jiddu dumansa bokaya suni keesa anini waan lubbu qaba, afuri, ka nama fakaata, arge.

⁶ Wonti suni ch'ufti fuula afurifi koola afuri qabdi.

⁷ Miili worraa qaqajeela, qeench'i worraaleeni aka qeench'a looni jira, ammalle aka sibiila diima ka rigani mid'aasani bibiliqa.

⁸ Fuula afurifi koola afraani suni male, worri ch'ufti harka afuri, ka aka harka nama jiru koola ch'ufa jalaa qaba.

⁹ Wonti sunini afraanu koola lama babalifate, koola suni fiit'eeni woltut'e marte wolti deebite. Wonti sunini, yo yaatu, ka gargari imbaane aka waan takaa woliini yaati.

¹⁰ Wonti sunini ch'ufti fuula afuri ka gosa gosa qabdi: duraa fuula namaa qabdi, mirgaa fuula nyeench'a qabdi, bitaa fuula korma looni qabdi, ammalle duubaa fuula risa qabdi.

¹¹ Wonti sunini ch'ufti koola lama olfud'ate, aka akanaani kooli waan toko koola waan iti aanati gama gamaa fiit'eeni woli tuqu. Ammalle waan suni ch'ufa kooli isii ka hafe kaani lamaani nafati mamat'ana.

¹² Wonti sunini kama, waan gara afuri fuula deefatufi, ka garaingalle garuma feete yaati.

¹³ Jiddu waan afraani suni araba ibida gudda gara ch'ufa deemtuti jira. Ibidi sunini balalie bobae, araba aka angaasu oldarba.

¹⁴ Wonti lubbu qaba sunini ch'ufti aka angaasu oli gadi bilit'e oriti.

¹⁵ Ato anini waan suni afraani tae ilaalu, waan aka miila gaari afuri, ka lafa tuqa, ka waan afraani kaani ch'ufa d'aatu jira, arge.

¹⁶ Miili suni afraani ch'ufti aka takaa jira; ch'ufti akuma d'akha ch'ululuqa bibiliqa. Ammalle miili suni kama miila d'ibiti wod'aka keesaani iti ejaanja,

¹⁷ aka akanaani miili sunini afraanu gamuma fuula deefatu yau.

¹⁸ Girangira miila suni ch'ufa marse, ilati iti ejaanja.

¹⁹ Yo wonti lubbu qabu suni yaatu ch'ufa, miililleeni wolumaani deema, ammalle yo wonti sunini oli kaate ch'ufa miililleeni olkaa.

²⁰ Wonti sunini garuma feetu yaati miililleeni woma isiini taatu taha, wonti akanatiifi irreeni miila suni waan suni iraa baati.

²¹ Tanaafi yo wonti sunini yaate, yokhaani ejate, yokhaani olbarifte, miililleeni akasuma taha.

²² Mata waan afraani suni gubbaa waan aka gasare manaa ka d'akha ch'ululuqaani mid'aasaniti jira.

²³ Waan aka gasare suni jalaa wonti kaani afraani ejaanjite, wonti sunini kama koola isii lama moga mogaani ballifatte, koola waan iti aanati tut'i, ammo kooli lama nafa d'ossa.

²⁴ Wonti sunini barimnaani qonqooni koola isii shawesa d'awa galaanatifi dibbeesa duula guddatifi qonqo Waaqa gudda nati fakaate. Wonti sunini barifte teteete jennaani koola dachaafate,

²⁵ ammo waan aka gasare ka mata isii ira jira kaani qonqumati keesaa d'ufa.

²⁶ Waan aka gasare suni gubbaa waan barch'uma hayyuma, ka d'akha bule ch'uluqaani mid'aasaniti jira. Ammalle barch'uma suni ira waan nama fakaatati taa.

²⁷ Wonti sunini aka sibiila diima wod'aka ibida keesa tau bilit'i. Ammalle wonti nama fakaata sunini

²⁸ ifsa bifa ule Waaqaa ch'ufa qabuuni fulla ch'ufati ifsite. Kunini ifsa bibiliqu, ka aka AABBO Waaqi arti jiru, garsiisu. Anini waan suni ch'ufa arginaani isa durati lafaani ufi d'ae qonqo nami dubbatu d'agaye.