Esta 8 - KITAABA WAAQA

¹ Guyya suni hayyichi Ahasueroni waan Hamaniini, nyaapa Yahudi, qabu ch'ufa hayyiti Estaa kenne. Estani aka Mordekaiini fiit'a isii hayyichati himte; tana gula Mordekaiini fulla hayyicha d'ufe,

² hayyichi qube isaa ta beesisa, ta inni Hamani iraa fuud'e, ufiraa baase Mordekaiti kenne, Estaleeni manafi waan Hamaniini qabu ch'ufa harka isaati kennite.

³ Jennaani Estani ammalle hayyu sarbaati jidde boote kad'atte waan jette, Mala hama ka Hamaniini, ka gosa Agagi, Yahuditi malate balleesi hanqisi.

⁴ Hayyichi ule worqi Estaa olqabe,

⁵ duuba Estani kaate hayyu dura ejite waan jetteeni, yo sii taate, yo na d'ugeefatte, ammalle yo wonti kunini d'uga sii fakaatte, seera gabaasi, aka dubbi Hamaniini qara jed'e taani tahu d'owartu — dubbini suni tatabe ilmi Hamedatha, ka gosa Agagi, t'aafe, ta Yahudi lafa hayyuuni fidu ch'ufa keesa jirtu fit'a jettu.

⁶ Anini akami dandae badi gosa tiyya balleesani obsa? Yokhaani anini akami dandae aka fiit'a tiyya balleesani hobaasani obsa?

⁷ Jennaani hayyuuni Ahasueroni hayyiti Estafi Mordekai, ka gosa Yahudi, waan jed'eeni, Ilaala, anini yayu waan Hamaniini gosa Yahuditi malateefi isa fannise, ammalle waan inni qabu ch'ufa Estaa kenne.

⁸ Amma waan feetani ch'ufa maqa kiyyaani gosa Yahuditi t'aafa, beesisa qube tiyya ira kaya; wonti akanatiifi seera qara maqa hayyutini t'aafani, ka beesisi qube isaa ira jiru, dandaani imballeesani.

⁹ Wonti kunini guyya diddami sadeeso, ka jia sadeeso, ka Siwani jed'ani, taate. Guyya suni Mordekaiini worra tatabe hayyu t'aafu wolti yaame, tatabe t'aafsise gara Yahuditiifi hojattu ch'ufa, ta hayyu jala hojattu, ta lafa hayyuuni fidu d'ibbafi diddami torba, ta haga lafa Hinditi ejite lafa Kushiti geetuti erge. Tatabe suni t'aafi aka akatiifi afaani gosa gosatiini t'aafani, arda ch'ufati ergani, ammalle afaanifi t'aafi Yahuditileeni t'aafani ergani.

¹⁰ Tatabe suni maqa hayyu Ahasuerotiini t'aafani, beesisa qube isaa ira kayani, duuba teteetuuni fardaa, farda qolcha, gola hayyuu keesati d'alateeni fuute geesite.

¹¹ Woni tatabeeni tunini jettu, Hayyuuni la ee jed'e, aka Yahudiini dira ch'ufa keesa jirtu, woli galte nyaapa ufira d'owartu. Yo gochiti lafa taatefu iti duulte, Yahudiini, yo dandeete, ha nyaapa suni haate nad'eenifi ijoolle isaani woliini, ammalle worra suni, haguma gahu, ha fitt'e hori isaani boojituti.

¹² Guyyaani seeri kuni tahu, lafa hayyuuni Ahasueroni fidu ch'ufa keesa, guyya kud'ani sadi, jia kud'ani lama, ka Adari jed'ani, ka qara aka Yahudi fit'ani buufatani.

¹³ Seera gabaasani suni ha lafa ch'ufa keesa nama beesisani, aka gochiti Yahudi guyya suni durati kurfefatte nyaapa ufii haalo baafattu.

¹⁴ Jecha hayyu kana gula, teetuuni fardaa taani fardoole hayyu taani faanoti ejatte, haguma fardi dandau ch'ufa gussite. Seera kana dira gudda, ka Shushani jed'ani, keesale lalabani.

¹⁵ Jennaani Mordekaiini, ka woya adiifi bule ta hayyuma ufira qabu, ammalle kooti boofta bule diima keeyate ruufa aka worqi jirtu maratu, hayyu biraa kae iti d'aabate. Worri dira Shushanileeni ch'ufti gammadde iyye lalabe.

¹⁶ Yahudiini duuba gaargala keesaa baate gammadde qilit'amte, nama ch'ufa ira ulfinna argatte.

¹⁷ Dirafi lafa ch'ufa keesa, fulla seera hayyu lalabani, Yahudiini jila tolfatte nyaate quufte gammadde. Nami lafa suni hedduleeni Yahudi sodaate aada Yahuditi gale.