Esta 6 - KITAABA WAAQA

¹ Halkani suni hayyuuni rafu dad'abe, duuba nama yaame waan jed'e, Kitaaba lafa tiyya, ta odu waan duri lafa keesati tahe iti t'aafani kootaani, na sooma. Duuba d'ufaniini soomaniifi.

² Fulla soomani suni keesati aka Mordekaiini duri jara sangoota lamaani kaani, ka fullo hayyicha eegu, hayyu Ahasuero ijeechaa malate jennaani inni hime argani. Jari lamaani suni Bigthanafi Tereshi.

³ Hayyichi, Nu guddinnaafi yokhaani ulfinna akami Mordekai maro waan kanati jenne kennine? jed'e gaafate. Jennaani hojattuuni hayyuu, ta hojja suni achi jirtu, Woma tokole inkennineefi jette.

⁴ Jennaani hayyuuni waan jed'e, Jari hojattu tiyya gugurdaani nami tokoleeni eentu arma jira? Duuba Hamaniini yo suni ch'ichaani bahe; wonti inni d'ufeefi aka Mordekai mukha mid'aasanifi kaani irati fannisani kad'atu.

⁵ Jennaani hojattuuni waan hayyuuni jette, Hamaniini ch'ichaa eje si argu fed'a. Hayyuuni waan jed'e, Ha olseenu.

⁶ Duuba Hamaniini olseennaani hayyichi waan jed'eeni, Nama tokoti jira, ka aka anini ulfeese guddinna kennuufi fed'u. Nama kana maani tolchufi male? Hamaniini garaa ufii keesati herege waan jed'e, Eenu nami hayyichi ulfinna kennuufi fed'u, yo na taate male?

⁷ Duuba inni waan hayyichaani jed'e, Woya hayyuuni keeyatuuni koota, nama kana uyisa,

⁸ ammalle farda hayyuuni yaabatuuni koota, ruufale matati mara.

⁹ Duuba hojattu tante keesa, nama ch'ufa ira jiru toko barbaadi, aka inni woya fuud'e, nama suni uyise, farda yaabachiise dira keesaani deeme lalabe waan jed'u, laala, waan hayyuuni nama ulfinna kennuufi fed'u tolchu!

¹⁰ Jennaani hayyichi waan Hamaniini jed'e, Kai, hurrisi, woyaafi farda fuud'i, Mordekai ka gosa Yahudi kaani, akuma jettu kana tolchiifi. Waan atini maqa d'oofte tokole illakisiini, tolchi guutiifi. Inni afaani fullo tana taa, achiti isa agarta.

¹¹ Jennaani Hamaniini woyaafi farda fuud'e, woya taani Mordekai uyiseefi, isa farda ira kae dira keesani deeme lalabe waan jed'e, Laala waan hayyuuni nama ulfinna kennuufi fed'u tolchu!

¹² Mordekaiini fulla fullo mana hayyuti deebie, ammo Hamaniini, ka ch'eeri ijeese, woya matati hagogate arifate gale.

¹³ Inni niiti isaa Zereshifi jaallowaani isaa taani waan tahe ch'ufa iti hime. Jennaani niitifi jaallowaani isaa qaqarooni taani waan jetteeni, Mordekaiini ya guddinna sira argate; inni gosa Yahudi, dandeete isaani imorkitu, inni siuma dabsata.

Aka Hamani ijeesani

¹⁴ Ato worri tae waan kana haasau, worri sangooti kaani arifate d'ufe, Hamani fuud'ani mana Esta sagale iti yaamani taaniti geesani.