Esta 4 - KITAABA WAAQA

¹ Mordekaiini waan tolchani kaani ch'ufa hubate jennaani laalefate, woya ufi tarsaase ch'arqi naqate, daara mata dibate, dira keesa deeme iyye bohe.

² Haga fulla fullo hayyu deeme, ammo waan ch'arqi naqateefi keesa seenu dad'abe.

³ Arda ch'ufa fulla dubbini hayyuu suni geete, Yahudiini ch'ufti wolti baate, guddo laalefatte agabuuni oolte iyyite boote, nami hedduuni ch'arqi naqate daara keesa ch'iifte.

⁴ Dubra hojattu Estatiifi jari sasangisiisani kaani d'ufe, waan Mordekaiini tahe Estati hime, jennaani isiini guddo laalefatte. Duuba woya Mordekaiti ergite, Ch'arqi baafad'i, woya suni keeyad'i jette, ammo inni dide.

⁵ Jennaani isiini sangicha isii hojatu toko, ka Hathaki jed'ani, yaamte waan jetteeni, Beeni, gara Mordekai d'aqi waan taheefi waan wonti suni taateefi hubad'i.

⁶ Hathakiini alati bahe, ballinna dirati, fulla mana hayyuu durati, Mordekaiti d'ufe.

⁷ Mordekaiini waan ufi tahe ch'ufa iti hime waan jed'e, Hamaniini waan jed'e, Anini beese hagana harka worra beese hayyuu olkeyatu baasa, yo Yahudi ch'ufa fit'ani.

⁸ Inni ammalle tatabe jecha hayyu irati t'aafani dira Shushani keesati odeesani taani, ta Yahudi ch'ufa fit'a jettu, Hathaki kenne. Ammalle waan jed'eeni, Tataabe tana hayyiti Estati geesi, fulla dubbini suni ejitu iti himi, Gara hayyu d'aqi, naasu gosa teeti kad'ad'i siini jed'ani jed'i iti himi jed'e.

⁹ Duuba Hathakiini deebie, waan Mordekaiini jed'e ch'ufa Esati hime.

¹⁰ Jennaani Estani Hathaki ergite, Beeni, qonqo tana Mordekaiti himi jette.

¹¹ Qonqooni suni tana: Yo nami tokoleeni, d'iirafi uwa taanaani, yaamicha male d'ufe, balbala hayyuu dura eje iti olseene, nama suni ijeesu malani. Seera suni nami imbeenne injiru; worra gugurda isa jala hojatufi ka iraa hafeleeni ch'ufti imbeekha. Karaani nami seera kana jalaa bahuuni toko ch'alla: yo hayyuuni ule isaa ta worqi olqabe, akasiini nama lubbu baasa. Ammo haga bulti sodoma inni taka na iyyaamne.

¹² Mordekaiini qonqo Esta d'agaye jennaani

¹³ qonqo tana iti deebise waan jed'e: Ato mana hayyuu keesa jiraate, waan Yahudi ch'ufa ira jirtu ufi seetele, waan duraa baatu ufi insehiini.

¹⁴ Yo atini hojja akana tana ch'alifte afaani qabatte, Yahudiini qarqaarsafi baafamale gara d'ibi argatti; ammo siifi worri keesanileeni imbada. Aka guyya akana kana jed'ani hayyiti si tolchani ennuti beekha?

¹⁵ Estani qonqo Mordekai d'ageennaani qonqo deebifte waan jette,

¹⁶ Beeni, Yahudi dira Shushani keesa jirtu ch'ufa wolti yaami, maro tiyya jed'a, guyya sadi, halkani guyyale, nyaata d'ugaati lakisa ufi agabsa, Waaqa naa kad'ad'a. Anaafi hojattuuni tiyyaleeni akasuma taana. Eegi suni, ato seeri na d'owele, gara hayyu d'aqa, yo tana jed'e due ha taatuti.

¹⁷ Duuba Mordekaiini kae deeme, waan Estani jetteeni ch'ufa tolche.