Efessoon 6 - KITAABA WAAQA

¹ Ijoolle, maro Kristotiifi worra keesani saalfad'a, wonti kunini waan tolchu malani.

² Jechi abbeetiifi haateti saalfad'a jed'u kakhu d'ibi iti darani qaba;

³ kakhuuni suni waan jettu, aka lafa Aabbo Waaqi sii kennu keesati lubbuuni tante d'eeratu jetti.

⁴ Aabbooti, ijoolle teesani imufachisiina, ammo barsiisafi gorsa Aabbootiini guddisa.

Gorsa tisselefi aabbooti

⁵ Tissele, abbooti teesani, sodaafi holachani ch'aqasa, akuma waan Kristo hojattani garaa tokooni hojad'afi.

⁶ Hojja worri isani ilaalu ch'alla inhojatiinaafi, ammo garaa keesani ch'ufaani waan Waaqi fed'u tolcha, aka tissele Kristo.

⁷ Huji teesani ta tisse gammadaani tolcha, akuma waan nama inhojanne ammo Aabbo hojatanu.

⁸ Qaabad'a, aka Aabbooni nama ch'ufaa galata kennu, tisseefi balchale, maro huji dansa ta inni tolchuufi.

⁹ Aabbooti tisselee, tissele teesani akuma suni tolcha, insodaachiisiina. Qaabad'a, aka isanifi tisseleeni teesanileeni abba taka gubbaa qabdani, ka nama ch'ufa waan takaa tolchu.

Waan miha lola nama Kristiana

¹⁰ Dubbi buufata, Aabbo keesa jabaad'a, irre isaa guddooni.

¹¹ Miha lola ka Waaqi isanii kennu ch'ufa guurad'a, aka malte Sheet'ana dabsattani.

¹² Wonti akanatiifi nu namaani woli had'uuti injirru, ammo qilleensa hama lafafi gubbatiini wolhad'u jirra, jabeennaafi irre gubba ta bara dukana kanale.

¹³ Tanaafi ammatana miha lola ka Waaqa olfud'ad'a! Duuba yo guyyaani hamaani d'ufe dandeetani irre nyaapa dabsattani, aka eegi haatanile duddaduuba indeebine.

¹⁴ Tanaafi kurfo taa, eegad'a: d'uga aka gurda hid'aanati hid'ad'a; dubbi d'ugatiini hameenna qoma teesani iraa d'owad'a,

¹⁵ kurfo taa, aka hojja ch'ufa Odu Dansa ta nagaya aka kobe keyattani.

¹⁶ Hojja ch'ufa d'ugefacha aka wonte baad'a; aka t'iya bobeetu ta Hamaani Kaani darbatu d'aamfitani.

¹⁷ Baafama aka ruufa marad'a, dubbini Waaqaleeni ha sheefti Lubbuuni isanii kennitu taatu.

¹⁸ Waan kana ch'ufa kad'achaani tolfad'a qarqaarsa Waaqa kad'ad'a. Hojja ch'ufa Waaqa kad'ad'a, akuma Lubbuuni isani agarsiiftu. Maro waan kanatifi hojja ch'ufa kurfo eegad'a; ufi injibaatiina, hojja ch'ufa gumi Waaqati kad'ad'a.

¹⁹ Anale Waaqa kad'ad'a, aka Waaqi, hojja anini dubbachu fed'u, dubbi anini jabeennaani dubbad'u naa kenne d'ossa Odu Dansa mullisu.

²⁰ Maro Odu Dansa tanaatiifi gara na ergani, ato anini amma hid'aansa keesa jiraad'ele. Tanaafi Waaqa naa kad'ad'a, aka anini jabeese dubbad'u, akuma tolchu male.

D'aamsa eege

²¹ Tikikoni, oboleesa keennafi hojattuuni teenna ta d'uga huji Aabbo keesa, odu tiyya ch'ufa isaniti odeesa, aka isani waan anini keesa jiru hubattani.

²² Maro waan kanatifi anini isa gara keesani erga, aka waan nuuni ch'ufti keesa jirru inni isani beesise garaa isani jabeesu.

²³ Waaqa Abbaafi Aabbo Yeso Kristoni nagayafi jaalala oboleyaani ch'ufaa kenniina, d'ugefacha woliini.

²⁴ Eebiti Waaqa nama Aabbo Yeso Kristo guddo jaalatu ch'ufa woliini tahinna.