Efessoon 1 - KITAABA WAAQA

¹ Maqaani kiyya Paulo; anini fed'i Waaqaatiini ergattu Kristo Yeso tahe. Gara gumi Waaqa ta Efeso keesa jirtu, ta jireenna ufitiini Kristo Yeso d'ugefate tatabe tana t'aafa.

² Waaqa Abbaafi Aabbo Yeso Kristoni eebafi nagaya isanii kenniina.

Eeba lubbu Kristo keesa

³ Waaqa, Abba Aabbo keenna Yeso Kristo galata deebimna! Inni Kristo keesa nu eebise eeba ch'ufa ta lubbu gubbaa nuu kenne.

⁴ Ato lafa inuumiini, Waaqi ya Kristo keesa nu fohate, aka nu qulqulloomne wollaala male isa dura yaanu. Maro jaalala isaatiifi

⁵ Waaqi ya qara nu fohate, aka kara Yeso Kristotiini ufitiini nu d'ufe ilmaani ufi nu tolfatu, fed'i isaa gula.

⁶ Koota, Waaqa galata deebimna, maro eeba isaatiifi, waan inni Ilma isaa ka inni jaalatu keesa nu eebiseefi.

⁷ Inni d'iiga ufitiini nu bite nu baase, daba keenna nu araarame. Eebiti Waaqa,

⁸ ta inni guddise nuu kenne waan guddo! Qalbifi malte isaatiini

⁹ Waaqi waan qara herege tolche, waan d'ossa, ka inni Kristoni, guutu duratu nu beesise.

¹⁰ Wonti Waaqi tolchu fed'u, aka yo hojjaani geete, uumama lafa ch'ufa ka lafafi gubba jiru woltiini d'ufe Kristo mataa tolchu.

¹¹ Waan ch'ufa fed'i herega Waaqa gula tolchani ammalle Waaqi fed'i ufitiini Kristo keesa nu fohate nama ufi nu tolfate, herega isaa ka qara kaani gula.

¹² Tanaafi nu worri qara Kristo heregatu guddinna Waaqa faarsina!

¹³ Isanileeni akasuma: gaafa dubbi d'uga d'ageetani, Odu Dansa ta baafamaani isanii d'ufte, isani Kristo d'ugefattani, jennaani Waaqi beesisa ufi isani ira keyate Lubbu Qulqullo ta kakhate isani kenne.

¹⁴ Lubbuuni tuni qabdo teenna, aka nu waan Waaqi nu kakhate argannu nu agarsiifti, ammalle aka Waaqi balchoomsa d'uga worra ufiti kennu himti. Guddinna isaa faarsina!

Kad'acha Paulo

¹⁵ Maro waan kanatifi anini haguma d'ugefacha isani Aabbo Yeso d'ugefattaniifi jaalala isani gumi Waaqa jaalattani d'agaye,

¹⁶ maro teesaniifi Waaqaa galata deebisu illakimne. Anini hojja ch'ufa kad'acha tiyya keesati isani qaabad'a,

¹⁷ ammalle Waaqa, Abba guddinna, ka Aabbo keenna Yeso Kristo, kad'ad'a, aka inni lubbu isani qaroomsite Waaqa isaniti mulliftu isanii kennu, aka isani baratani.

¹⁸ Wonti anini kad'ad'u, aka qalbiini teesani banamte ifsa isaa argitani, aka isani abdi inni iti isani yaameefi eeba durooma ta inni gumi isaati kakhate hubattani,

¹⁹ ammalle aka jabeenni isaa, ka nu worra isa d'ugefate keesa hojatu gudda hubattani. Jabeenni kunini

²⁰ kauma inni Kristo duisa keesa kaaseeni, harka ufi ka mirga gubba fulla ufi teesiseeni.

²¹ Kristoni achiti hayyoota gubbafi jabeennaafi irreefi nama jaba ch'ufa fida; inni maqa ulfinna ka lafa tanaatiifi ka hegerile ch'ufa ira jira.

²² Waaqi waan ch'ufa ya miila Kristo jalati deebise, aka inni Mata waan ch'ufaa tahu inni ya gumi Waaqati kenne.

²³ Gumiini Waaqa nafa Kristoti; qit'ooma isaati, ka waan ch'ufa fulla ch'ufati qit'eesu.