Ebrania 1 - KITAABA WAAQA

Dubbi Waaqa Ilma isatiini dubbatani

¹ Duri Waaqi maro heddufi aka heddu afaani raagootatiini ababoota teennati dubbate,

² ammo ammatana, bara eege kana keesa la Ilma isatiini nuti dubbate. Waaqi waan gubba jira ch'ufa isaani uume, isa fohate, aka gaafa muumme inni waan ch'ufa d'aallu.

³ Inni ifsa guddinna Waaqatiini biliqa, akuma Waaqi jiru innileeni jira, waan uumani ch'ufa dubbi jabeenna isatiini olqaba. Eegi daba nama iraa qulqulleese, inni gubba harka mirga ka Waaqa Guddinna gubba tae.

Ilmi suni malaika ira jira

⁴ Malaika ira yayu Ilma guddisani, akuma maqaani inni argate suni maqa worraa ira jiru.

⁵ Wonti akanatiifi Waaqi taka yoomi malaika tokoleeni akana jed'e, Atini Ilma kiyya; anini arra yayu abbaa sii tahe. Yokhaani ammalle, Anini abba isaa tahe, inni Ilma naa taha.

⁶ Ammalle gaafa Ilma angafa lafaani d'ufe inni waan jed'e, Malaikaani Waaqa ch'ufti ha isa guddiftu.

⁷ Inni waan malaika dubbate waan jed'e, Inni malaika ufi bubbe tolche, hojattu ufi araba ibida tolcha.

⁸ Ammo waan Ilma, Waaqi waan jed'e, Hayyumti tante, Ee Waaqa, haga hegeri jirti! Anini d'ugaani nama fidda.

⁹ Atini d'uga jaalatte d'ara jibbita. Maro waan kanatifi Waaqi, Waaqi kanke, si fohate, gammada guddinna ka wahela keti ira jiru, sii kenne.

¹⁰ Ammalle inni waan jed'e, Aabbo, atini gaafa qara lafa uumte, harka keetiini gubba mid'aasite,

¹¹ gubbaani tuni ch'ufti imbaddi, ammo atini inhafta. Isiini ch'ufti aka woya jaarti;

¹² atini aka woya isi woli ira dachaafta, isiini aka woya jijiramti. Ammo atini kanuma, haguma jirtu inuma jirta.

¹³ Waaqi taka malaika isatiini, kooti, harka kiyya ka mirga tai, haga anini nyaapa kanke barch'uma miila kanketi tolchuuti injenne.

¹⁴ Malaikaani maani re? Worri lubbu Waaqaa hojattu, ammalle isati worra erga, aka worra baafama argatu qarqaartu.