Danieli 9 - KITAABA WAAQA

¹ Namichi gosa Medi toko, ka Dario jed'ani, ka ilma Ahasuero, lafa Babiloni mohate.

² Ganna qara ka inni hayyu tahe, ato anini kitaaba qulqullo soome ganna torbatama ka badi dira Yerusalemu heregu, dubbi duri AABBO Waaqi raaga Yeremiani jed'e qaabad'e,

³ Duuba guddise Waaqa gudda kad'ad'e, ufi agabse, ch'arqi naqad'e, daara keesati gale,

⁴ AABBO Waaqa kiyyati bohe, ch'ubbu gumi tiyya iti hime waan jed'e, Waaqa gudda, atini gudda, nuleeni si guddimna, atini wold'aqisa kanke jabeesite, nama si jaalate dubbi tante guutule hojja ch'ufa jaalata.

⁵ Nu yayu ch'ubbamne hameenna gula baane waan hamtu tolchine. Nu aadafi seera kanke lakimne iraa gorre.

⁶ Nu raagoota hojattu tanteeti, ta maqa kanketini hayyootafi jaaroleefi ababootafi gosa teenna ch'ufa gorsite, ch'aqasu dinne.

⁷ Atini, ee Aabbo, hojja ch'ufa waan d'uga tolchita ammo nu hojja ch'ufa ch'eera ufitini d'ufna. Nu worri Yuda, ka Yerusalemu, ammalle worri Israeli ka maro worri hamaate si lakiseefi atini lafa ch'ufa keesa firfirsite ch'ufti.

⁸ Hayyoota teennafi jaarole teennafi ababooti teennaleeni yayu waan ch'eera taate siti ch'ubbamte, ee Aabbo;

⁹ ato nu si dinnele, atini naaso, namaa araaramta.

¹⁰ Gaafa atini duri hojattu tante raagootani seera nuu kennite, nu si ch'aqasu dinne, ee AABBO Waaqa keenna.

¹¹ Nami Israeli ch'ufti seera kanke ch'abse, jecha kanke ch'aqasu dide iraa gore. Nu siti ch'ubbamne, tanaafi atini abaarsa, seera hojattu tante Musa keesati t'aafani, nutini d'ufte.

¹² Atini waan duri intolcha jette, nuufi nama nu fide tolchite, dira Yerusalemule dira lafa keesa jiru ch'ufa ira balleesite,

¹³ gaargala Seera Musa keesati t'aafani ch'ufa nutini d'ufte. Ammo ato akasile taate, ee AABBO Waaqa keenna, nu dabaafi ch'ubbu teenna lakimne d'uga tante gula deemne si gammachimne.

¹⁴ Ee AABBO Waaqa keenna, atini badi isani balleesa jette illakimne, wonti akanatiifi waan d'uga tolchita, nuleeni si inch'aqamne.

¹⁵ Ee Aabbo Waaqa keenna, atini jabeenna keetiini gumi tante lafa Misiri keesaa baafte, jabeenna kanke suni arrale inuma qaabatani. Nu yayu ch'ubbameni waan hamtu taane.

¹⁶ Atini duri ya nuu kalchite, tanaafi amma Yerusalemuti deebite indalanini. Inni dira kanketi, gaara kanke qulqullo. Nami lafa nu d'aatu jiru ch'ufti, Yerusalemufi gumi tante tufata wonti suni ch'ufti maro ch'ubbu teennatifi waan hamtu ababooti teenna tolchiteefi nu d'aqabde.

¹⁷ Ee Waaqa, kad'achaafi boha tiyya tana na d'agayi. Mana kanke ka balleesani eebisi, mid'aasi jaari, aka nami ch'ufti aka atini d'uguma Waaqa hubatu.

¹⁸ Ee Waaqa, nu d'agayi nu ilaali, gaargala nu keesa jirufi d'iba dira maqa kanke qabu argi. Nu d'uga qamna jenne si inkad'annu, ammo maro naasu tante guddotifi si kad'anna.

¹⁹ Ee AABBO, nu d'agayi, AABBO, nuu araarami, AABBO nu ch'aqasi, nu qarqaari! Aka nami ch'ufti aka atini Waaqa si beekhu, AABBO, hurrisi nu qarqaari! Dirafi gumiini tunileeni teeti.

Aka Gabrielini waan fagiisa hime

²⁰ Anini tae Waaqa kad'ad'e ch'ubbu tiyyafi ta gumi tiyya Israeli hime, AABBO Waaqa kiyyati bohe, mana kanke qulqullo mid'aasi jaari isaani jed'e.

²¹ Ato anini kad'achumati jiru, Gabrielini, namichi anini daayya qara taani keesati arge, barise nati gabue. Hojaani suni hojja sorio galgala baasani.

²² Inni waan nani jed'e, Danieli anini aka atini fagiisa hubatu si garsiisu d'ufe.

²³ Gaafa atini qara Waaqati boote, inni si d'agaye. Inni guddo si jaalata, tanaafi anini waan inni kad'acha tana gula si tolchu fed'u siti himu d'ufe amma tana dubbi tana d'agayi waan daayyani tunini d'ooftu hubad'i.

²⁴ Ganni torbatama maro torba ganna Waaqi aka gosa tanteetifi dira kanke qulqullo ch'ubbufi hameenna suni keesaa baasu fohate. Ch'ubbu namaa araaramani, d'uga haga jiru jireenna jirtule namaa kennani aka daayyafi fagiisi guutame Mana Waaqa qulqullo maro lameeso jaraani eebisani.

²⁵ Dubbi tana jabeesi hubad'i: Haguma gaafa seera baasani, Yerusalemu jaara jed'ani kaani haga nami Waaqi muude fohatu d'ufuti, ganna torbatama ka maro torbati jiddu jira. Dira Yerusalemu mid'aasani jabeesani boolani marsani jaarani, karale ch'ufa iti tolchani; duuba diri suni ganna jaatami lama maro torba taa, ammo ganni sunini ch'ufti bara gaargalati.

²⁶ Eegi bari sunini dabre, namicha Waaqi fohate kaani akanumati ijeesani wollaala male. Duuli hayyicha jaba toko lafa suni had'e dirafi Mana Waaqa balleesa. Duuba muummeeni akuma lolaa fach'aate, woraanafi badi Waaqi kurfeeseni d'ufti.

²⁷ Hayyichi suni nama heddu, haga ganna torba, wold'aqisa woliini tolfata. Ammalle ganna torbaani suni jiddu keesati inni soriofi waan Waaqaa baasani ch'ufa balleesa. Waan hamtu nama rifachiisa fiit'e Mana Waaqa gubba kayani, haga nama achi kaye suni baddini Waaqi kurfeesefi sunini d'aqabduti.