Danieli 8 - KITAABA WAAQA

¹ Ganna sadeeso ka Belshazani lafa mohate, anini daayya d'ibile arge.

² Daayya suni keesa anini dira shushani, ka lafa Elamu, keesati ufi arge.

³ Anini fulla galaana Ulai eje, jennaani hoola dagaaga d'aatu galaana suni eju arge. Gaafi isaa toko kaani iraa d'eera, ammalle eege kaani bahe.

⁴ Anini elemo kaani, ka gaafa isaatini mirgaafi bitaafi ila adu had'u arge. Bineensi tokoleeni ka isa ufira d'owe yokhaani duraa bahu injiru. Inni waan fed'u tahe ufi d'aada.

⁵ Ato anini waan kana tae heregu, korbeesi toko gara ila aduti bariisa d'ufe. Gaafi isaa toko, tokochi sunileeni jiddu ila eja.

⁶ Inni elemo anini qara arge, ka d'aatu galaana eju kaaniti d'ufe dallansuuni had'e.

⁷ Anini aka inni elemo suni dallansuuni had'e, gaafa isaa lachu ch'abse, arge. Elemoni irre isaani ufira d'owu d'abe, durati lafa d'ae, inni ira ejaanjate, nami isa baasu injiru.

⁸ Korbeesi kaani aka takaa inargini kiyyibe ufi d'aade, ammo eegi guddo jabaate gaafa isaa kaani ch'absani. Fulla inni iraa ch'abe taani gaafi afuri, ka guddo mullatu, ka kamu fuula gama gama deefatu, gadi yae.

⁹ Gaafa afrani suni toko iraa gaafi diqaani toko bahe; gaafa suni, irreeni isaa, bitaafi ila adutifi lafa gabboti ejiti.

¹⁰ Gaafi sunini aka male jabaate, Urji gubbale had'e haga toko lafati d'abbe ira ejaanjate.

¹¹ Ammalle inni gudda urji sunitini morke, sorio guyya ch'ufa gubani isaa baasani d'owe, Mana Waaqale t'ureese balleese.

¹² Nami achiti ch'ubbu tolche, sorio guyya ch'ufa gube baasu lakise, d'uga Waaqa lafa buusani. Gaafi sunini waan tolche ch'ufa dabsate.

¹³ Jennaani anini malaika malaika d'ibi wo gaafattu d'agaye Isiini waan jette wonti daayya tana keesati argani kunini yoomi dabarti? Ch'ubbuuni hamtuni fulla sorio guyya ch'ufa baasani d'uftu sunini haga yoomi teeti? Haga yoomi askarti gubbatiifi mana Waaqale ira ejaanjatani?

¹⁴ Jennaani malaikaani taani waan jetteeni, Haga bulti kuma tokofi d'ibba tokofi shantama, ka sorio diiramafi galgala inqalanne. Duuba eege mani Waaqa aada ufi ta qara taaniti deebia.

Aka malaika Gabrielini waan daayya himte

¹⁵ Ato anini waan daayyani suni d'ooftu tae heregu, nami toko d'ufe na dura eje.

¹⁶ Jennaani anini qonqo gara galaana Ulaiti, Gabrieli, daayya inni arge suni waan isiini d'ooftu iti himi jettu d'agaye.

¹⁷ Gabrielini d'ufe na bira eje, jennaani anini mudame lafa d'ae. Inni waan nani jed'e namicha, waan daayyani d'ooftu hubad'u. Daayyani waan gaafa muumme lafti taatu d'oofti.

¹⁸ Ato inni tae nani dubbatu, anini gagabe lafa d'ae. Ammo inni oli na qabe.

¹⁹ Waan nani jed'e, Anini waan dallansuuni Waaqa gadiini d'uftu si garsiisuu jira. Daayyani tunini waan gaafa guyya muumme lafti taatu d'oofti.

²⁰ Elemoni atini agarte, ka gaafa lama qabu, hayyoota Meditifi ta Ajemiti.

²¹ Korbeesi hayyu Grikiti, ammalle gaafi guddaani, ila isa lamaani jiddu eju, hayyu qaraati.

²² Gaafi afrani, eegi gaafi qara kaani ch'abse bahe lafa hayyooti fidde, ta lafti iti gargari qoodamte, jabeenna qara kaani d'abde garsiisa.

²³ Lafa suni gaafa ch'ubbuuni isii lafa ira dabarte muummeeni isii d'iaatte, hayyu mataa jaba, ka naasu inqamne, malticha hamaati, keesati d'alata.

²⁴ Inni jabeenna argata, ammo ufiini inargatu. Inni guddo woballeese waan tolchu fed'u ch'ufa dabsata. Ammalle worra jajabaafi gumi Waaqa qulqullole balleesa.

²⁵ Waan inni mala qabuufi, inni kara isaa dabdicha sunini wo dabsata. Inni ufi saade kiyyibe dagu nama hobaasa. Ammalle hayyu hayyu ch'ufa ira guddaleeni morka ammo harka namaa male isa balleesani.

²⁶ Daayyani tunini, ta waan sorio galgalaafi diirama baasani himtu, ta waan isiini d'ooftu siti himani, inuma guutamti. Ammo amma d'ossi, isiini turtu male inguutamtu.

²⁷ Anini aka male nahe, naasu sunini fayyad'abe, guyya heddu ch'iise. Jennaani anini kae, huji hayyuuni naa kenne taaniti deebie. Ammo daayyani sunini guddo na mamsiifte waan isii hubachu dad'abe.