Danieli 5 - KITAABA WAAQA

¹ Halkani toko hayyu Belshazani jila tolche, jara isa gugurda, nama kuma toko yaame, daad'i woliini d'ugani.

² Ato taani daad'i d'uganu, Belshazani muduunufi qori ta worqifi qarsiini mid'aasani, ta duri abbaani isaa Nebukadrezani Mana Waaqa ka Yerusalemu keesaa boojie, kootani jed'e. Wonti inni waan sunini koota jed'eefi, aka isaafi jara isaa gugurdafi nad'eeni isaatiifi gaarayooti isaa daad'iini d'uddu.

³ Hojuma suni muduunufi qori worqi taani d'ufaniini worri ch'ufti daad'iini d'uge,

⁴ waaqa worqifi qarsifi sibiila diimafi sibiila guraachafi mukhaafi d'akhaani mid'aasani kaani faarse.

⁵ Jennaani maro tokotu harki namaa d'ufe, girgida mana hayyu fulla kayyoni ifse iti ejitu irati wo t'aafe, ato hayyuuni argu.

⁶ Jennaani hayyichi mudame, lubbuuni d'ufte, aka male hollate jilbi wold'ae.

⁷ Duuba hojuma suni iye falfaltufi worra wohimufi ka ayyaana heddule yaama jed'e. Worri d'ufe jennaani hayyuuni waan jed'eeni, Nama t'aafi tana soome waan isiini jettu nati himu, ubaara d'eera bule diima iti kayani, looti Worqi mormati kayani, nama sadeeso ka hayyuti aanu tolchani.

⁸ Jennaani jari qaqarooni hayyu mala d'au d'ufe, jara suni keesa nama t'aafi suni soome waan isiini jettu hayyuti himu d'abani.

⁹ Jennaani hayyu Belshazani haga qarale ira mudame, jari isaa gugurdaleeni ch'ufti waan tahu wollaale.

¹⁰ Hayyitini dubbi hayyutifi ta jara isaa d'ageete jennaani, fulla mana jila suni d'ufte waan jette, ee hayyicha, lubbu buli! Akana mudamte, lubbuuni si ind'ufini.

¹¹ Lafa tante tana keesa nama tokoti jira, ka lubbu waaqoota qulqullo qabu. Gaafa abbaani kanke jiru inni aka qalbifi hubachafi qarooma waaqooti qabdu qabu ufi garsiise. Jennaani abbaani kanke, hayyu Nebukadrezani, gudda worra wo himutifi falfaltufi worra qaqaroofi worra ayyaana heddu isa tolche.

¹² Inni qalbifi qarooma gudda qaba, waan oobjuuni d'ooftule ch'ufafi hiimpofi dubbi nami imbeenne ta d'ossale ch'ufa hima; tanaafi namicha Danieli jed'ani, ka hayyuuni Belteshaza jed'uuni, yaami, isati dandae t'aafi tanaafi waan isiini jettule siti hima.

Aka Danielini waan t'aafiini jettu hime

¹³ Jennaani hojuma suni Danieli fulla hayyutini d'ufani, hayyichi waan jed'eeni, Namichi gosa Yahudi, ka Danieli jed'ani, ka abbaani kiyya boojie armaani d'ufe sii?

¹⁴ Anini yayu d'agaye, aka atini lubbu waaqoota qulqullootifi qalbifi hubachafi qarooma qabdu.

¹⁵ Jari mala na d'aufi, falfaltu natiini d'ufani, t'aafi taana sooma waan isiini jettu hima jed'aniini, ammo worri soome himu dad'abe.

¹⁶ Ammo aka anini d'agaye, atini dandeete waan d'ossanifi waan nami imbeenne ch'ufa beete himta. Yo atini t'aafi tana soomte waan isiini jettu nati himte, ubaara d'eera bule diima siti kayani, looti worqi mormati si kayani, nama sadeeso ka hayyuti aanu si tolchani.

¹⁷ Jennaani Danielini waan jed'eeni, Waan naa kennu feetu suni qabaad'ad'i, yokhaani nama d'ibii kenni, anini infed'u. Ammo ee hayyicha, anini waan t'aafani sii soome waan isiini jettule siti hima.

¹⁸ Waaqi guddaani abba kanke Nebukadreza hayyu gudda tolche guddinnaafi ulfinna kenneefi.

¹⁹ Waan inni akasi guddinna argatefi nami gosa gosatifi ka d'aloota d'alootatifi ka afaani afaani dubbatuleeni ch'ufti sodaate isa durati hollate. Inni nama fed'u ijeese, ka fed'u lakisa, nama fed'u guddinna kenne ka fed'u iraa fuud'a.

²⁰ Ammo inni kiyyibe, naasu d'abe garaa jabannaani barch'uma isaa ka hayyuma iraa buusani guddinna d'owani.

²¹ Naamafi isa gargari baasani, qalbini isaa gargalte ta bineensa taate. Inni harre diidatiini woliini alati gale, aka karaaba buuyo nyaate, alati gale, fiit'eesi guyya ch'ufa isa jiise. Duuba eege inni aka Waaqi guddaani nama fide nama fed'u ch'ufa hayyu tolchu ee jed'e.

²² Ammo atini, ilmi isaa, ato waan kana beetele garaa illaamne.

²³ Atini Waaqa gubbati wollaalte, muduunufi qori mana isaa guurte d'ufteeni, duuba siifi jara kanke gugurdafi nad'eeni teetifi gaarayooti tanteleni daad'iini d'uddani, waaqa worqifi qarsifi sibiila diimafi sibiila guraachafi mukhaafi d'akhaani mid'aasani faarsitani — waaqa woma ingarre, ka woma ind'ageenne, yokhaani ka woma imbeenne. Ammo atini Waaqa duafi jireenna kanketifi ammalle waan atini tolchitu ch'ufa harkaa qabu guddisu didde.

²⁴ Wonti Waaqi harka dubbi tana t'aafe ergeefi tana.

²⁵ Wonti t'aafani tana: Mene, Mene, Tekeli, Parsini.

²⁶ Akasi jechaani: Mene — Waaqi yayu bulti hayyuma teeti hede gabaabsise;

²⁷ Tekeli sii yayu biimani sablinna kanke argani;

²⁸ Peresi lafa tante yayu gargari qoodani, worra gosa Meditifi ka Ajemiti kennani.

²⁹ Jennaani hojuma suni Belshazani hojattu isaa yaame, ubaara d'eera bule diimafi diima Danieli kaya, ammalle looti worqile mormati kayafi, jed'eeni. Duuba inni nama sadeeso ka hayyuti aanu isa tolche.

³⁰ Halkanuma suni Belshaza, hayyu Babiloni, ijeesani;

³¹ jennaani nami gosa Medi toko ka Dario jed'ani, ka ganni isaa jaatami lama hayyuma fud'ate.