Danieli 10 - KITAABA WAAQA

¹ Ganna sadeeso ka Koreshini lafa Ajemi mohate dubbi toko Danieli ka maqaani isaa d'ibiini Belteshazati mullisani. Dubbini suni dubbi d'ugaati, ammo nami akanati dandae inhubatu. Isa daayya keesa iti himani hubachisani.

² Bara suni anini haga torbaani sadi bohe.

³ Sagale dansaafi foonifi daad'ile dide, rifeensale haga torbaani sadi dabraniti filachu dide.

⁴ Guyya diddami afreeso ka jia qara, anini afaani galaana gudda Tigris jed'ani eja.

⁵ Jennaani oli millad'e, nama toko ka woya booftatifi gurda worqi dansa hid'aana qabu arge.

⁶ Nafi isaa aka dooqa biliqe, fuuli isa aka angaasu ifse, ilti isaa aka ibida diimatte harkaafi miili isaa aka sibiila diima bibiliqe, qonqooni isaaleeni gohanna gumi fakaatte.

⁷ Nami daayya suni arge anuma ch'alla. Jari na woliini jiru kaani tokoleeni woma ingarre, ammo akanumati mudamani baqatani d'okhatani.

⁸ Ato anini tae daayya suni ilaalu, akanumati koba hafe. Humna d'abe, fuulileeni na jirjirame, nami na hubachu dad'abe.

⁹ Anini qonqo isaa d'ageennaani gagabe lafa d'ae, fuulaani lafati gombifame, artuma ch'iise.

¹⁰ Jennaani harki toko d'ufe, oli na fuud'e, ato anini hollad'u, jilbaafi harka lafati na d'aabe.

¹¹ Malaikaani waan nani jette, Danieli, Waaqi si jaalata, kai, waan anini sini jed'u kana aka dansaa ch'aqasi ana siti ergani. Isiini akasi jennaani anini, ka tae hollad'u, olkae.

¹² Jennaani isiini waan nani jette Danieli, insodaatini, Waaqi haguma gaafa qara atini wo hubachaa jette ufi diqeesite yayu kad'acha tante d'agaye, aninileeni maro kad'acha tanteetitifi d'ufe.

¹³ Malaikaani lafa Ajemi qorqorattu haga bulti diddami toko nani morkite. Jennaani Mikaelini, malaikaani guddoni toko, waan lafa Ajemi keesati koba na lakisanifi na qarqaaru d'ufte.

¹⁴ Anini waan takaa tana gochiti tante taatu si hubachiisu d'ufe; daayyani tunini waan taka tana himti.

¹⁵ Isiini dubbi tana nani jennaani, anini akanumati ch'allise lafa laale.

¹⁶ Duuba malaikaani nama fakaatu taani harka d'ereefate hid'i tiyya tut'e. Anini waan jed'eeni, Aabbo, daayyani tunini ya na mudamsiifte, tanaafi anini dandae holla ind'owad'u.

¹⁷ Anini tisse abba dura ejitu fakaad'a, akami dandae sini dubbad'a? Humnaafi hafuuri na keesati inhamne.

¹⁸ Malaikaani nama fakaatu taani ammalle na qabannaani humniti nati deebite.

¹⁹ Isiini waan nani jette, Waaqi si jaalata, insodaatini, naguma, garaa jabaad'i. Isiini dubbi suni jennaani, haga qara kaanile ira humna argad'e waan jed'eeni, Aabbo, waan jechu feetu jed'i atini yayu humna nati deebifte.

^20-21 Duuba isiini waan nani jette, Atini waan anini siti d'ufeefi beeta? Wonti anini d'ufeefi, aka waan kitaaba d'uga keesati t'aafani siti himu. Amma anini deebie, malaika lafa Ajemi qorqorattu had'u male, eegi suni malaika lafa Griki qorqoratuti d'ufa. Nami tokoleeni ka naa kalchu injiru, malaika Israeli ta Mikaeli jed'ani male.