Boha 2 - KITAABA WAAQA

¹ AABBO Waaqi dallansu isaa keesa Sioni dukaneese. Inni yayu mid'aguma isi ta gubba gadi buuse balleese ona tolche. Guyya dallansu isaa suni inni mana isale inqaabanne.

² AABBO Waaqi naasu male ollowani Yakobo ch'ufa balleese maneeni jajabdu Yuda ch'ufa ch'ach'abse jisse, ammalle lafafi hayyoota isiile ch'eerse.

³ Dallansu isaa guddo suni keesa inni irre Israeli ch'abse, gaafa nyaapi nuti d'ufeele nu qarqaaru dide, aka ibida nuti bobae waan ch'ufa balleese.

⁴ Inni aka nyaapa keenna t'iya nuti qabe, nama keenna ka nu jaalanne d'aabbanne ch'ufa fit'e. Arma Yerusalemu keesaleti dallansuni isaa ta aka ibida boobetu nu d'aqabde.

⁵ AABBO Waaqi ya Israeli aka nyaapa balleese; maneeni jajabdufi ka hayyootale ch'ufa ona tolche, ammalle, laalala ind'umanne worra Yudatini d'ufe.

⁶ Inni mana nu isa keesati kad'anne ya ch'abse butuche; guyya jilatifi ka Sabato ya balleese, ammalle hayyufi qaallule aka hama iti dallane, akuma takaa.

⁷ Aabbo Waaqi waan sorio isaa irati baasani, lakise Mana isaa qulqullo dide biraa deeme, aka nyaapi maneeni Yerusalemu gugurdo ch'ach'absule iti lakise. Fulla nu duri keesati jila tolfannu worri sunini keesati geerara.

⁸ AABBO Waaqi aka naabo Sioni jissani ya herege buufate; inni aka naabo suni tokole inhamne ch'ufa balleesani d'und'umna d'ae. Doofi d'ed'eertufi naaboni d'akha ka diraani jaaranileeni ya woliini ch'abe butute.

⁹ Balbalti fullo diraleni ya lafa lit'e, danqaro isiileeni ch'ach'abt'e buloofte. Hayyu worratifi jaarole worra gugurdole ya boojiani. Seerileni bade duuba raagootileeni deebite d'uga AABBO Waaqaa ingartu.

¹⁰ Jaaroleeni Yerusalemu biyye matati ufi nanat'e woya ch'arqi uyifate ch'allifte, akuma nama dooti iti galte teteeti; dubarti Israelileeni naate mataa lafati gajejete teteeti.

¹¹ Ilti ya bohaani na luluqaate, garaani kiyyaleni ya aka male gaargale, ammalle waan gosa tiyya balleesanifi laalalti ya garaa na yakite. Ijoolleefi daimi didiqaleeni gagagabe kara dira keesati jijige.

¹² Ijoolleeni tuni beelaa d'eebuu haawani worraa boote, kara keesati aka waan madeesani jijidde, harka haawani worraa keesati laanuma hobaati.

¹³ Ee Yerusalemu, bad'aaso tiyya ta anini jaalad'u, ani maani dubbad'a, yokhaani akamini garaa si jabeesa? Nami tokoleeni aka kanke kana taka ingaargale. Badiini tante guddo aka bisaani baariini. Eentu dandae badi si d'owa?

¹⁴ Raagooti tanteleeni daayya ufi keesa waan d'ara male; waan d'uga maani siti himte? Barsiisani worraleeni si sobde, daba kanke akanaani diidati imbaamne; tanaafi atini waan ira deebiufi inqabu jetta.

¹⁵ Nami si d'aatu bahu ch'uftinu si goyeese, si tufate mata gingilfate badi tante koble waan jed'u, Tunini d'uguma dira mid'aaga Yerusalemu kaani? Diri dira ch'ufa mohu ka baanani kana?

¹⁶ Nyaapi kanke ch'ufti si goyeese ila hamtuni si laale ilkani qare waan jed'u, Nu si imballeesine ree? Qaraa guyyaani nu eegannu kana!

¹⁷ AABBO Waaqi waan qara malate ya tolche; inni yayu naasu male nu hobaase, akuma duri nuuni jed'e. Inni harka nyaapa keennati nuu kenne badi teennaani worra gammachiise.

¹⁸ Ee Yerusalemu, maneeni tanteleeni ha AABBO Waaqati bootu, imimaani kankeleeni ha aka galaana halkani guyya yaani; bohafi laalala halkani guyya ilakisini akasiini ufi dad'absiisi.

¹⁹ Halkani kana ch'ufa kakaa, AABBO Waaqati boha; AABBO Waaqa durati garaa kanke laafisi aka bisaani tolchi; ilmaani tante ta garaachani mogaa dira ch'ufati hobau jirtu jed'a, naasu isaa kad'ad'a!

²⁰ Ee AABBO Waaqa, worra atini gaargalchite kana laali! Nad'eeni ilmaani ufi ta d'alte fooni nyaachu ya malte? Qaaloleefi raagootale Mana Waaqa keesati ya fit'u malani?

²¹ Reefi nama, diqaafi guddaani ka d'iiratifi ka uwaleeni, lola keesa woliini ch'iisa ka goraade nyaapa worratiini fit'ani. Atini naasu male guyya dallansu tanteeti worra fit'e.

²² Akuma nama jilati yaamtu atini nyaapa kiyya nati yaamte, worri na marse lubbu na keesaa baase. Duuba guyya dallansu tante suni worri tokoleeni dandae duraa imbahu. Worri ijoolle tiyya ta jaalalaani anini guddise naraa fit'e.