Bahisa 4 - KITAABA WAAQA

¹ Jennaani Musani waan jed'eeni, Ammo yo worri na d'ugeefate yokhaani na ch'aqasu dide, AABBO Waaqi siti imullanne naani jed'e, ani maal taha?

² AABBO Waaqi waan jed'eeni, Wonti atini harka qabdu suni maani? Inni, ule jed'eeni.

³ AABBO Waaqi waan jed'eeni, Lafa buusi, Inni lafa buuse jennaani bofa taate; jennaanini biraa baqate.

⁴ Duuba AABBO Waaqi waan jed'eeni, Gadi jed'i, eege qabi, olfuud'i. Jennaani Musani gadi jed'e qabe olfuunaani deebite ule taate.

⁵ Ammalle AABBO Waaqi waan jed'eeni, Yo atini waan kana tolchite, Israeliini ind'ugeefatti, aka AABBO Waaqi, Waaqi ababoota isaani, Waaqa Abrahamu, ka Isaaqofi ka Yakoboleeni siti mullate.

⁶ AABBO Waaqi ammalle waan jed'eeni, Harka kanke woya keesaa qoma ira keeyad'i. Musani akuma suni tolche, yo inni gadi fuud'e, harki ya ch'itae adaate.

⁷ Jennaani AABBO Waaqi, Harka kanke qomati deefad'i jed'eeni. Musani akasi tolche jennaani, yo inni gadi fud'ate, harki kaani fayye akuma nafa isaa kaaniti deebie.

⁸ AABBO Waaqi waan jed'e, Yo worri si d'ugefachu dide yokhaani akheekha qara kanale ind'ugeefatiini, hegeri ka eege kana ind'ugeefata.

⁹ Yo worri ammalle akheekha lamaani kana d'ugeefate dubbi tante d'agayu d'ibaate, galaana Misiri keesaa bisaani fuud'i, lafa godduti naqi. Duuba bisaani suni d'iiga tahani.

¹⁰ Ammo Musani waan jed'eeni, AABBO Waaqa, anini haguma d'alad'e ogeesa dubbii intaane; eegi atini naani dubbatele intaane. Anini nama hure wo jed'uniti, arabati na ulfaata.

¹¹ Jennaani AABBO Waaqi waan jed'eeni, Eentu afaani namaa kenna? Eentu afaanifi gurra nama duucha? Eentu ila nama bane duucha? Ana, AABBO Waaqaaniti?

¹² Amma beeni deemi, anini si qarqaare si dubbachiise si jechisiisa.

¹³ Ammo Musani waan jed'e, Hiyo, Aabbo, ananiti, nama d'ibi ergi.

¹⁴ Tana gula AABBO Waaqi Musati dallane waan jed'eeni, Harunini oboleesi kanke ka gosa Lawi arma injiru? Anini imbeekha, inni aka dansaa dubbi beekha. Inni kuno ka d'ufu kana; akuma si argeeni garaa keesa gammada.

¹⁵ Atini isati haasai, waan jechuu malani isati himi. Anini isani lachu araba isani qajeelche waan isani tolchuu maltani isani garsiisa.

¹⁶ Inni afaani sii tahe, biyyati sii dubbate, atinileeni aka Waaqa waan inni jechuu male isa barsiifta.

¹⁷ Ule tana fud'ad'u, akheekhaani tolchi.

Aka Musani lafa Misiriti deebie

¹⁸ Jennaani Musani gara sodda isaa Yethro deebie waan jed'eeni, Aabba, amma gadi na lakisi, gara fiit'a tiyya ta Misiri jirtu taani deebie aka isiini jirtu taani laalu fed'a. Yethrooni, Ya eebise, nagayaani deemi jed'eeni.

¹⁹ Ato Musani lafa Midiani jiru, AABBO Waaqi waan jed'eeni, Beeni, amma lafa Misiriti deebii, worri qara si ijeesu fed'u ch'ufti ya hobae.

²⁰ Jennaani Musani niitifi ilmaani isaa fuud'e harre yaabachiise, ka ule Waaqi kenneefi taani harkaa qabu lafa Misiriti deebie.

²¹ Duuba AABBO Waaqi waan Musani jed'e, Yo atini lafa Misiritiini baate, waan atini taatu, waan mama, ka anini jabeenna aka tolchituuni sii kenne, Farao durati tolchi. Ammo anini garaa isaa jabeesa, aka inni ee jed'e worra gadi illakimne.

²² Ammalle waan Faraoni jettu, AABBO Waaqi waan jed'u, Israeliini angafa kiyya.

²³ Ammalle waan anini siini jed'u, Ilma kiyya gad'iisi, aka inni na hojatu; ammo yo atini didde, anini ilma kanke ka angafa ijeesa.

²⁴ Kara keesa, fulla inni buleti, AABBO Waaqi Musani bahe ijeesu fed'e.

²⁵ Jennaani Ziporaani d'akha qara qabu fuute much'a isii qolofa iraa kute miila Musatiini tut'e waan jette, D'uguma, atini naa d'iirsa d'iigaati.

²⁶ Jennaani AABBO waaqi Musa lubbu baase. Woni isiini, Atini naa d'iirsa d'iigaa jetteefi, maro qabanqaba suni qabdeefi.

²⁷ AABBO Waaqi waan Harunini jed'e, Beeni, lafa alooti d'aqi, Musa argi. Inni kae deeme, Musa fulla gaara qulqullooti arge d'ungate.

²⁸ Duuba Musani waan ch'ufa ka AABBO Waaqi gaafa isa erge isaani jed'e iti hime, ammalle akheekha ch'ufa ka inni, Tolchi jed'eeni iti haasae.

²⁹ Jennaani Musafi Harunini yaani jaarole Israeli ch'ufa wolti baasani.

³⁰ Harunini waan AABBO Waaqi Musani jed'e ch'ufa iti haasae akheekha kaanile biyya durati tolche.

³¹ Biyyiti dubbi suni ind'ugeefatte, ammalle aka AABBO Waaqi worra Israeliti d'ufe gaargala worraa arge d'ageennaani, mataani lafati gajejed'ani isa guddisani.