Bahisa 34 - KITAABA WAAQA

¹ Jennaani AABBO Waaqi waan Musani jed'e, D'akha hahafalicha lama, ka aka d'akha qara kaani boch'i, duuba anini dubbuma d'akha qara ch'abe kaani irati qora.

² Bori diirama kurfefad'i, diirama gaara Sinai kori, fiit'e gubbati nati kooti.

³ Nami tokoleeni si woliini ind'ufini; nama tokole d'aatu gaarati inargini, ammalle loonifi reeleeni tokoleeni fulla hunda gaara inooliini.

⁴ Duuba Musani d'akha hahafalicha lama d'ibi boch'e, boriyya diirama gaara Sinaiti olkore, akuma AABBO Waaqi jed'eeni.

⁵ Jennaani AABBO Waaqi dumansa keesa gadi bue Musa woliini dubbate, Anini AABBO Waaqa jed'e, maqa isaa qulqullicha himate.

⁶ Duuba AABBO Waaqi isa dura dabre lalabe waan jed'e, Anini AABBO Waaqa Waaqa eebaafi naasu guddo qabu, ka hure indallanne, ammalle ka d'ugaafi jaalala qabu.

⁷ Anini kakhu tiyya ta d'aloota kunki kunki jabeese ch'ubbufi hameenna worraa araaramafi; ammo anini d'aloota sadeesotiifi ka afreeso ka abbootini worraa daba tolchite ingaargalcha.

⁸ Jennaani Musani hurrise lafati gajed'e kad'ate

⁹ waan jed'e, Aabbo, yo atini d'uguma na maachite, anini si kad'ad'a, nu woliini deemi. Worri kunini mataa jajaba, ammo ha taatuti, amma atini dabafi ch'ubbu teenna hamtu ch'ufa nuu araarami, gumi tante nu tolfad'u.

Aka wold'aqisa haraa tolchani

¹⁰ AABBO Waaqa waan Musani jed'e, Anini amma wold'aqisa worra Israeli woliini tolfad'a. Ammalle anini gumi tante durati waan mama ka ka durile ira jira lafa ch'ufa keesa yokhaani gosa ch'ufa durati tolcha. Ammalle gochiti d'ibiini ta d'aatu tante jirtuleeni waan nama bakhasa, ka anini AABBO Waaqi si tolchu kana inagarti.

¹¹ Dubbi anini arra siini jed'u tana jabeesi. Anini worra gosa Amoritifi ka Kanaanitiifi ka Hititifi ka Perizitiifi ka Hivitiifi ka Yebusile si duraa gussa.

¹² Eegad'u, worra lafa suni iti imataqiini; hegeri worri sunini t'urura hama keesa si buusa.

¹³ Ammalle fulla worri sorio iti qalu balleesi, waan worri arti old'ad'aabufi akheekha waaqa worraa ka Ashera jed'ani ch'a ch'absi balleesi.

¹⁴ Waaqa d'ibi tokole inkad'atiini, wonti akanatiifi anini, AABBO Waaqi, waan d'ibi ka naani morku dandae inoobsu.

¹⁵ Biyya lafa suni keesa jirtuuni wolti imataqiini, wonti akanatiifi worri hegeri sagale sorio, ta waaqoota isaani ka d'araatiini kad'atani iti si yaame si nyaachisa.

¹⁶ Ilmaani tante hegeri dubra worra suni fuute, dubriti sunini waan waaqoota worra hamtu kaani worra barsiifte, eegee duuba worri kara kiyya iraa gore waaqoota hamtu suni gula yaa.

¹⁷ Waaqoota sibiila ka harkaani mid'aasani imid'aafatiini.

¹⁸ Jila Qit'a bukho inqamne tolfad'i. Anini yayu siti hime, aka atini jia Abibu keesa guyya torba qit'a bukho inqamne nyaattu wonti akanatiifi jia suni keesa lafa Misiri keesaa baate.

¹⁹ Ilma d'iira ka angafatiifi waan horiini goroomuma d'ale ka hanch'afa ch'ufti kiyya.

²⁰ Ammo atini bukhura harre ka qara d'alate ilmaani hoolatiini jijirad'i. Yo jijirachuu baate, lume ch'absi. Ilmaani tante ta d'iira angafale bitad'i. Nami tokoleeni harka duwa na dura ind'ufini.

²¹ Guyya jaa huji hojad'u, ammo guyya torbeeso huji oobru qotisafi muransale taanaani tokole inhojatiini.

²² Jila muransaa, ta gaafa mid'aani dargaye murani jabeesi, ammalle jila Hoosa ta gaafa ganni ch'aamu ka mid'aani tuulte galfattu jabeesi.

²³ Ganna keesa maro sadi d'iirti tante ch'ufti ha d'ufte naa, AABBO Waaqa Israeli, kad'attu.

²⁴ Eegi anini gosa d'ibi si duraa kaase lafa tante si ballise, nami tokoleeni gaafa atini jila sadeeni suni tolfattu si inhad'u.

²⁵ Yo hori sorio naa baaftu, qit'a bukho qabu naa imbaasini. Ammalle fooni hori jila Pasaka qalani suni lafti iti imbariini.

²⁶ Mid'aani qara murattu ka ganna ch'ufa Mana AABBO Waaqatini kooti. Ilmaani ree ta haad'a hootu ind'aabiini.

²⁷ AABBO Waaqi waan Musani jed'e, Dubbi tana ch'ufa t'aafi, wonti akanatiifi dubbi tana irati anini wold'aqisa keetifi ka Israeli tolfad'a.

²⁸ Duuba Musani AABBO Waaqa woliini halkaniifi guyya afurtama, ka woma nyaate ind'ugiini, tae. Inni d'akha hahafalicha kaani irati dubbi wold'aqisa ka Seera Kud'annaani t'aafe.

Aka Musani gaara Sinai iraa gabue

²⁹ Gaafa Musani gaara Sinai iraa gabue, ka d'akha lamaani Seera irati t'aafani kaani harkaa qabu, fuuli isaa imbibiliqa, waan isaafi AABBO Waaqi woliini hasaaniifi. Ammo inni aka fuuli isaa bibiliqu imbeekhu.

³⁰ Harunifi worri Israeli ch'ufti aka fuuli Musa bibiliqu arge sodaa iti d'iaachu dad'abe.

³¹ Ammo Musani Harunifi jaarole gugurdo yaame, worri achi d'aqe duuba Musani worraani dubbate.

³² Eegi suni worri Israeli ch'ufti Musati d'ufe, inni seera AABBO Waaqi gaara Sinai gubba kenneefi worra barsiise.

³³ Musani dubbi buufannaani fuula hagogate worra d'ofate.

³⁴ Ammo yo Musani AABBO Waaqaani dubbachu d'aqu ch'ufa, inni hagogo fuula iraa fud'ata, haga Waaqa biraa bahuti. Yo inni achii bahe dubbi Waaqi jed'e taani worra Israeliti hime.

³⁵ Worri Israeli fuula Musa ka bibiliqu arge. Duuba Musani hagogo taani ammalle fuulati deefate, haga hojaani inni AABBO Waaqaani haasau d'aqu geetuuti.