Bahisa 20 - KITAABA WAAQA

¹ Waaqi dubbi tana dubbate waan jed'e:

² Anini AABBO Waaqa kanketi, ka lafa Misiri fulla atini tisse iti tate keesaa si baase.

³ Na male, waaqoota d'ibi inkad'atiini.

⁴ Akheekha waan tokole, ka lafafi gubbafi bisaani lafa jala jirale boch'ite imid'aafatiini.

⁵ Waan boch'ani mid'aasani kana tokole dura gajette inkad'atiini; wonti akanatiifi anini, AABBO Waaqi kanke, waan d'ibi na biraani kad'atani inoobsu. Anini ammalle nama jibbuufi d'aloota worraa ka sadeesotiifi ka afreesole gaargala itiini d'ufa.

⁶ Ammo anini d'aloota kunki kunki ka na jaalate seera kiyya guutu jaalad'e nahaafi.

⁷ Maqa kiyya ufumaa ind'aini, wonti akanatiifi anini, AABBO Waaqi kanke, nama ufumaa maqa kiyya d'au wollaala iti mura.

⁸ Guyya Sabato qaabad'u, qulqullo tolfad'u.

⁹ Guyya jaa huji tante ch'ufa hojad'u,

¹⁰ ammo guyyaani torbeeso guyya Sabato ka AABBO Waaqa kanketiti. Guyya suni huji tokole inhojatiini, si taanaani, ijoolle tante taanaani, tissele tante taanaani, hori kanke taanaani, yokhaani keessuma tantele taanaani; guyya suni ooli.

¹¹ Wonti akanatiifi AABBO Waaqi guyya jaa keesati gubba, lafa, galaanafi waan keesa jirale ch'ufa mid'aase, guyya torbeeso hafuura baafate. Tanaafi AABBO Waaqi Sabato eebise qulqullo tolche.

¹² Abbeetiifi haateti saalfad'i, aka lafa AABBO Waaqi sii kenne keesati lubbuuni tante d'eerattu.

¹³ Nama inijeesiini.

¹⁴ D'iirafi nad'eeni wolbaratte gaarayule woli intolfatini.

¹⁵ Woma inhatiini.

¹⁶ Nama tokole yakite waan d'araatiini inhimatini.

¹⁷ Waan nami d'ibiini qabu, mana isaa taanaani, niiti isaa taanaani, tisse isaa taanaani, looni isaa taanaani, yokhaani harrele, waan inni qabufu, tokole ind'arainiifi.

Soda biyyiti sodaatte

¹⁸ Duuba nami ch'ufti mandisufi angaasufi qonqo magalatatiifi aara gaara keesaa kau arginaani sodaate hollate, gaara ira fago ejaanjani

¹⁹ waan Musani jed'ani, Atini nuuni dubbad'i, nu si ch'aqamna, ammo Waaqi ch'allaani nuuni indubbatiini; yo inni nuuni dubbate nu inhobaana.

²⁰ Jennaani Musani waan biyyaani jed'e, Insodaatina; wonti akanatiifi Waaqi isani laalu d'ufe, aka isani isa sodaatani ch'ubbu intolchine.

²¹ Duuba biyyiti fago ejaanjite, ammo Musani dukana sipe taani fulla Waaqi jiruti deeme.

Aada fulla sorio iti baasani

²² AABBO Waaqi waan Musani jed'e, Waan atini worra Israelitini jettu, Isani yayu gartani, aka anini gubbaa isaniini dubbad'e.

²³ Isani waaqoota d'ibi ka qarsi yokhaani worqiini mid'aasani anani wolti qabdani inkad'atiina.

²⁴ Fulla sorio iti qalani biyyeeni naa mid'aasa, ammalle artiti sorio hoolatiifi ta looni gubaa na baasa, aka sorio wold'ageeti taatu; fulla anini fohad'e isani iti na kad'attani ch'ufa anini d'ufe isani eebisa.

²⁵ Yo isani waan sorio irati baasani d'akhaani naa mid'aasitani, d'akha boch'aniini imid'asiina; wonti akanatiifi yo isani d'akha hoot'ani, ya waan naa himmalliini tolchitani.

²⁶ Waan sorio irati baasani suni, faano gula olkorani iti intolchina; wonti akanatiifi yo isani gula olkortani, qullati isani mullata.