Bahisa 16 - KITAABA WAAQA

¹ Gumiini Israeli guyya kud'ani shaneeso ka jia lameeso, eegi lafa Misiri keesaa baate, lafa Elimuti godaante lafa Sini, ta jiddu Elimutiifi Sinai jirtuuni baate.

² Gumiini Israeli lafa aloo keesati Musafi Haruni haalatte,

³ waan jetteeni, Ato sila Waaqi lafa Misiri keesati nu hobaase, guddo ira nuu dansa! Gaafasi nu okote fooni bira teteenne qit'a quufati nyaanne. Ammo atini arti nu baafte lafa aloo tana keesati garaachaani nuu fit'a.

⁴ AABBO Waaqi waan Musani jed'e, Anini amma sagale aka bokaya gubbaa isanii garrooba. Yo nami sagale suni guuratu, ha woma guyya toko ch'alla guuratu. Anini worra ilaalad'a, aka worri seera suni guutufi yokhaani inguunnele.

⁵ Guyya jaeeso torbaani ch'ufa keesa ha waan kana maro lama guuratani galataniini.

⁶ Duuba Musafi Harunini waan gumi Israelitini jed'ani, Galgala kana agartani, aka nami lafa Misiri keesaa isani baase AABBO Waaqa.

⁷ Bori diirama guddinna AABBO Waaqaa inagartani; wonti akanatiifi inni yayu haalano teesani d'agaye. Nu qara eenu ka isani teetani nu haalattani?

⁸ Jennaani Musani waan jed'e, Nami fooni galgala isanii kenne qit'a diirama haguma isani feetani isanii kennu AABBO Waaqa. Wonti akanatiifi inni yayu haalano teesani d'agaye. Isani yo haalattani nu inhaalanne, Waaqa haalattani.

⁹ Musani waan Harunini jed'e, Waan gumi Israelitini jettu, AABBO Waaqa dura koota, inni ya haalano teesani d'agaye.

¹⁰ Akuma Harunini worra Israelitini dubbateeni, worri ch'ufti fuula gara lafa aloo deefate guddinna AABBO Waaqa dumansa keesati arge.

¹¹ AABBO Waaqi waan Musani jed'e,

¹² Anini haalano gosa Israeli ya d'agaye. Duuba waan jettuuni, Galgale fooni nyaattani, bori diirama qit'a haga feetani nyaatani, akasiini aka anini AABBO Waaqa, Waaqa worraa, beekhani.

¹³ Galgala suni simpirreeni didiqooni toko alaa baafatte olla suni ch'ufa guutte, diiramale lafti ch'ufti fit'eesofte.

¹⁴ Fit'eesi bue jennaani wonti hahapitiini baballooni aka sapupa lafati hafte.

¹⁵ Worri Israeli waan suni arge jennaani waan woliini jed'e, Isii, wonti kuni maani? Musani waan jed'eeni, Kunini qit'a AABBO Waaqi nyaattaa isanii kenne.

¹⁶ Wonti Waaqi mure tana: nami ch'ufti ha haga ufi nyaachu dandau guuratu, nami ch'ufti aka nama qabu gula ha waan aka dadu toko fud'atu.

¹⁷ Worri Israeli akasuma tolche, ammo hagi toko haga jed'aniini kaani dabarse, hagi tokoleeni hanqise.

¹⁸ Ammo worri waan aka dadu suniini safare jennaani nami nama ch'ufa ira guurate woma inqabu arge, ammo ka diqo guurate guddo qaba arge. Nami ch'ufti haguma nyaachu dandau guurate.

¹⁹ Musani waan worraani jed'e, Nami tokoleeni waan kana diiramaani ingahiini.

²⁰ Ammo nami hagi gari waan Musani jed'eeni d'agayu dide sagale olkeyate. Yo lafti barrite sagale taani shamte raamo ch'alla taate. Duuba wonti kunini guddo Musa dallansiifte.

²¹ Diirama ch'ufa nami ch'ufti haguma fed'e wolti guurate, ammo wonti worra ira hafe kaani aduuni baanaani bat'e.

²² Guyya jaeeso ka torbaani suni worri maro lama waan aka dadu kaani namu sagale guute fud'ate. Jaaroleeni Israeli taani gara Musa d'at'e waan tahe ch'ufa iti himte.

²³ Inni waan jed'eeni, Sunini waan qara AABBO Waaqi, Tolfad'a jed'e. Bori guyya oolma qulqullo, ka Sabato AABBO Waaqa. Arra waan feetani d'aabad'a nyaad'a, waan iraa hafe bori olkeyad'e.

²⁴ Akuma Musani jed'eeni worri waan hafe bori olkeyate, duuba inshamnele yokhaani raamooni inseene.

²⁵ Musani waan jed'e, Arra nyaad'a, wonti akanatiifi arriti guyya Sabato AABBO Waaqaati. Arra waan nyaatani suni tokole alati ingartani.

²⁶ Guyya jaa namu guurad'a, ammo guyyaani torbeeso Sabato, guyya suni tokole inargattani.

²⁷ Ammo nami gari guyya torbeeso sagale guurachu d'aqe jennaani woma d'abani.

²⁸ Jennaani AABBO Waaqi waan Musani jed'e, Isani worri Israeli akami yo ch'ufa jecha kiyyafi seera kiyya diddani?

²⁹ Waan kana beekhu maltani: waan AABBO Waaqi guyya Sabato isanii kenneefi, guyya jaeeso isani sagale guyya lama guurattani, nami guyya suni mana ufii keesaa bahu himmalle, worruma oola.

³⁰ Duuba biyyiti guyya torbeeso huji inhojanne boqote.

³¹ Worri Israeli sagale suniini Manna jed'eeni. Sagaleeni suni adaadi aka misinga, ta aka keki dammaani d'aabani miooftu.

³² Musani waan jed'e, Seeri AABBO Waaqi jed'e kana: dadu toko safara, jabeesa olkaya, aka ilmaani teesanileeni haga jirtu sagale anini lafa alooti isani nyaachise gartu, gaafa anini lafa Misiri keesaa isani baase.

³³ Jennaani Musani waan Harunini jed'e, Eele faara fuud'i, sagale Manna jed'ani t'aasa lama dadu tokoti naqi, fuula AABBO Waaqa dura kayi, aka ilmaani teenna taka tana argitu.

³⁴ Akuma AABBO Waaqi Musani jed'e Harunini fuud'e Sanduqa Wold'aqisa dura kaye, aka isiini haguma jirtu artuma teetu.

³⁵ Duuba worri Israeli ganna afurtama haga lafa Kanaani ta iti godaanani ingahiini sagale Manna jed'ani suni nyaatani. Worri sagale Manna jed'ani suni haga lafa Kanaaniti bahaniti nyaate.

³⁶ (Bara suni waan bitatani keesa henni t'aasa diddama d'ebbe toko.)