Bahisa 15 - KITAABA WAAQA

¹ Duuba Musafi worri Israelileeni faaru tanaani AABBO Waaqa faarsani: Anini AABBO Waaqa faarsa, waan inni aka jaba nyaapa ufii dabsateefi; inni ya fardafi worra yaabatule galaanati jisse.

² AABBO Waaqi irre jabdu na qorqorattu; inni ya na baase. Waan inni Waaqa abba kiyyatiifi anini isa faarsa. Waan inni Waaqa abba kiyyatiifi anini isa guddisa.

³ AABBO Waaqi abba duulaati; maqaani isaa AABBO Waaqa.

⁴ Inni gaari Faraotiifi askarti isaa galaanati d'abbe; askarti isaa hojattu dadansa ch'ufa galaani Diimani liqimse.

⁵ D'immuuni worra fud'ate; worri aka d'akha bisaani keesa lit'e.

⁶ Harki kanke mirgichi, AABBO Waaqa, jabeenna gudda dabsatuuni qaba; inni nyaapa gargari herood'a.

⁷ Jabeenna kanke guddaani ati nyaapa kanke buufte ufi dura gorsita; dallansuuni tante bobeete aka buuyo gubde worra balleesiti.

⁸ Ati galaana afuufte, bisaani isaa gooraani olejani; bisaani suni qajeelani ejani; d'immuuni galaana godde d'akha taate.

⁹ Nyaapi waan jed'e, Anini worra reebe qaqaba; anini hori worraa ch'ufa gargari qoode haga fed'u fud'ad'a; anini sheefti tiyya qalqala keesaa baase worra balleesa.

¹⁰ Atini bubbe bubbifte, galaani worra liqimse worri aka sibiila bisaani guddo lit'e.

¹¹ Ee AABBO Waaqa, Waaqi d'ibiini aka kanke jiru eenu? Eenuti aka kanke qulqullooma gudda qaba? Eenuti waan mamatiifi huji jabdu aka kanke dandae tolcha?

¹² Atini harka kanke mirgicha dirirfannaani lafti nyaapa keenna liqimsite.

¹³ Jaalala tante guddooni atini worra ati baafte dura deemte; irre teetiini worra qorqoratte lafa tante qulqullooni d'ufte.

¹⁴ Gochiti waan suni d'ageete jennaani naate hollatte; worri Filisti aka hama mudame.

¹⁵ Worri gugurdaani Edomuleeni imudame; worri gugurdaani Moabuleeni hollate; worri Kanaanileeni nahe waan tahu wollaale.

¹⁶ Sodaafi mudamsuuni worra qabati. Worri jabeenna kanke arge aka d'akha ch'allise, haga gumiini tante ch'ufti dabartuti: gosa atini tissuma keesaa baafte, ee AABBO Waaqa.

¹⁷ Atini worra armaani d'ufte gaara kanke ira qubsiifte, fulla atini, ee AABBO Waaqa, mana keeti fohatte mana kanke qulqullo atini jaaratte.

¹⁸ AABBO Waaqa, atini haga jiru jireennale lafa mohatta.

Faaru Miriamuu

¹⁹ Farda Faraotiifi gaarifi yaabatuuni fardaa galaana duudani jennaani AABBO Waaqi bisaani galaana suni worra Farao ira deebise; ammo worri Israeli lafa goddu ira galaana taake.

²⁰ Jennaani Miriamuuni, oboleetiini Haruni, ta raaga, dibbe fuute, nad'eeni d'ibileeni gabaate dibbele guuratte isi gula yaate sirbite.

²¹ Miriamuuni sirba kana worraa sirbite: AABBO Waaqa faarsa, waan inni nyaapa ufii dabsateefi; inni yayu fardafi yaabatu isaale galaanati jisse.

Bisaani had'ao

²² Jennaani Musani gumi Israeli galaana Diima keesaa lafa aloo ta Shuriti geese. Guyya sadi bisaani male lafa aloo keesa godaanani.

²³ Eegi suni lafa toko ta Mara jed'ani gahani, ammo bisaani arti had'aa, d'ugu dad'abani; tanaafi lafa suniini Mara jed'ani. (Mara jechaani had'aa jecha.)

²⁴ Biyyiti Musati boote waan jetteeni, Maani d'unna?

²⁵ Musani bohe Waaqa kad'ate jennaani AABBO Waaqi mukha diqa toko isa garsiise; Musani mukha kaani bisaani keesa buuse, bisaani kaani miaani. Fulla suniti AABBO Waaqi, seera jaba worraa kenne, ammalle worra laalate

²⁶ waan jed'e, Yo isani AABBO Waaqa keesani d'ageetani waan inni fed'u guutani waan d'uga tolchitani seera isaa jabeesitani, anini d'ukuba worra Misiritiini d'ufe suni tokoleeni isani ingaargalchu. Wonti akanatiifi anini AABBO Waaqa, ka isani fayyisu.

²⁷ Eegee Elimu d'ufani, fulla dareera kud'ani lama ka bisaani qabuufi mukha qoone, torbatama; d'aatu bisaaniti qubatani.