Bahisa 10 - KITAABA WAAQA

¹ Jennaani AABBO Waaqi waan Musani jed'e, Gara Farao d'aqi, anini isaafi hojattu isaa garaa jabeese, aka waan mama kana jiddu worrati agarsiisu;

² ammalle aka atini ilmaani tanteetiifi akhakhoota tante durati aka anini worra Misiri iti tabad'e ch'eerse, ammalle akheekha anini worra keesati tolche, himtu. Akanaani aka anini AABBO Waaqa beetani.

³ Duuba Musafi Harunini gara Farao d'aqani waan jed'aniini, AABBOONI, Waaqi Ebrania, waan siini jed'u, Haga yoomi atini naa saalfachu didda? Worra kiyya gad'iisi, aka worri deeme na kad'atu.

⁴ Yo atini ammalle worra kiyya gad'iisu didde, anini bori awaanisa lafa teeti buusa.

⁵ Awaanisi suni lafa ch'ufa qabate biyye ch'ufa d'osse, waan bokaya d'akhaani roobu iraa hafe kaanile ch'ufa nyaate mukha oobru tante keesati hafe ch'ufa fit'a.

⁶ Maneeni teetifi ta hojattu tanteetiifi ammalle ta worra Misiri ch'ufa awaanisi inguuta. Wonti kunini waan abbaafi ababooti teesani haga d'alatte lafa tana d'ufte haga arra taka inargini taati. Duuba akana jennaani kae Farao biraa deeme.

⁷ Hojattuuni Farao waan jetteeni, Namichi kuni ya guddo waan hamtu nuti malate nu balleese; inni yoomi waan kana lakisa? D'iirti ch'allaani ha yaate AABBO Waaqa worraa suni kad'attu. Atini aka lafti teenna ta Misiri tunini baddu ingartu?

⁸ Duuba Musafi Haruni Faraotiini d'ufani jennaani Faraoni waan worraani jed'e, Beeni d'aqa, AABBO Waaqa keesani kad'ad'a, ammo eenufati yaa?

⁹ Musani waan jed'eeni, Nu ch'ufti iyyaana, ijoolle teennafi jaarole teennafi ilmaani teennafi ree teennafi looni keennaleeni ch'ufti iyyaani; wonti akanatiifi nu jila guddo AABBO Waaqa tolchu feena.

¹⁰ Faraoni waan jed'eeni, Waaqi na didinna, yo anini isanifi ijoolle teesani gad'iise! Anini aka isani mala hama garaa qabdani arraa kale inargini.

¹¹ Anini ya dide! Isani d'iirti ch'allaani yaa AABBO Waaqa yaamad'a isani qara tana barbaadani. Duuba worra fuula Farao duraa gussani.

¹² Jennaani AABBO Waaqi waan Musani jed'e, Harka kanke lafa Misiri gubbaa qabi, aka awaanisi lafa Misiri ch'ufa qabate waan baha ch'ufa ka bokaya d'akhaani roobu kaani iraa hafe nyaate fit'u.

¹³ Duuba Musani ule ufii olqabe, AABBO Waaqileeni bubbe ila boruti kaase, bubbeeni suni guyya sunifi halkani suni ch'ufa lafa ira bubbifte. Yo lafti boriyyaate bariite bubbeeni sunini yayu awaanisaani d'ufte.

¹⁴ Tuuti awaanisa d'ufte lafa Misiri ch'ufa qabate. Tuuti awaanisa sunini guddo, ta duraani taka nami inargini, ka deebiani eegi tanale nami ingarre.

¹⁵ Awaanisi lafa Misiri ch'ufa d'osse dukaneese; waan bokaya d'akhaani roobe iraa hafefi mid'aani mukhale ch'ufa nyaate. Wonti dotaatuuni ch'ufti ta oobru keesa jirtuufi ta mukha gubbaa jirtuleeni tokoleeni inhamne, lafa suni keesaa badde.

¹⁶ Jennaani Faraoni hurrise Musafi Haruni yaame waan jed'eeni, Anini yayu AABBO Waaqa keesanifi isanileti ch'ubbame.

¹⁷ Arra ch'alla ch'ubbu tiyya naa araarama, AABBO Waaqa keesani na kad'ad'a, aka inni gaargala dua hama kana nuraa fuud'u.

¹⁸ Musani Farao biraa deeme AABBO Waaqa kad'ate.

¹⁹ Duuba AABBO Waaqi bubbe jabdu toko gara ila aduti d'ufeeni, bubbeeni suni awaanisa ch'ufa fuute galaana Diimati nat'e. Wonti awaanisa fakaatta tokoleeni lafa Misiri keesati inhamne.

²⁰ Ammo AABBO Waaqi garaa Farao jabeese, inni worra Israeli galakisu dide.

Dukana

²¹ Jennaani AABBO Waaqi waan Musani jed'e, Harka kanke Waaqati olqabi, duuba dukanti sipeeni ta nami taka inargini lafa Misiri ch'ufa sipi tolchite duuchiti.

²² Duuba Musani harka ufii Waaqati olqabe, dukanti sipeeni haga guyya sadi lafa Misiri duuchite.

²³ Worri Misiri ilaani woma argu dad'abe guyya sadi akasumati, ka inchochoiini, ollani. Ammo lafti worri Israeli tau ifsa qabdi.

²⁴ Jennaani Faraoni Musa yaame waan jed'eeni, Beena yaa, AABBO Waaqa kad'ad'a, nad'eenifi ijoolle teesanile woliini yaa, ree teesanifi looni keesani ch'alla hambisa.

²⁵ Musani waan jed'eeni, Yo akasi, hori nu sorio qallufi ka nu gumne sorio AABBO Waaqa keennaa baamnu sila nuu kennu maltani.

²⁶ Akananiti, nu horiini iyyaana, qeench'i isaani tokoleeni asi inhafu. Wonti akanatiifi numati hori keenna keesa waan sorio Waaqa baamnu foha. Ammalle haga achiini baanuti hori sorio AABBO Waaqa baasu malani nu imbeennu.

²⁷ AABBO Waaqi garaa Farao jabeese, inni worra galakisu dide.

²⁸ Duuba Faraoni waan Musani jed'e, Na biraa deemi! Ilti tiyya deebite si inargini! Guyya anini si argu indoota!

²⁹ Musani waan jed'eeni, Ha taatu, akuma jette ani deebie si dura ineju.