Amosi 6 - KITAABA WAAQA

¹ Gaargala keesani worra Sioni keesa machiini tau, ammalle isani ka gaara Samaria ira teetani lafa teesani nagaya seetani — isani worra gugurda, ka gosa Israeli guddo tana, ta biyyiti qarqaarsa iraa barbaaddu!

² Dira Kalne d'aqa, ilaala; duuba arti yaa, dira Hamathi gudda d'aqa; ammalle arti yaa, dira Gathi, ka lafa Filisti keesa jirule, d'aqa. Worri suni worra Yudatifi ka Israeli kana ira jajaba? Lafti worraa lafa teesani ira guddo?

³ Isani aka guyyaani gaargala d'ufu d'ugefachu diddani, ammo wonti isani tolchitani ch'ufti guyya suni gayaamti.

⁴ Gaargala keesani, isani worra barch'uma ilka arbaatini ch'okhani ira tatae iti irkate fooni elemiye gagabbotiifi lamacha gagabba nyaatu!

⁵ Isani sirba baasu feetani, aka Daudini duri tolche, ammalle waan aka fulludo ta sirbitaniini mid'aafattani.

⁶ Isani daad'i d'amelani d'uddani, d'ad'a urgaani ufi muudani, ammo badi ilmaani Yusufuti bohu diddani.

⁷ Tanaafi gochiti qara boojiani gosa teesani taati. Ammalle jilaafi machiini isani barch'uma iraani teteetani taani ind'umati.

⁸ AABBO Waaqi Guddaani akana kakhate biyya gorse waan jed'e: Anini kiyyiba worra Yakobo injibba, maneeni worraa ta ch'okhani intufad'a. Anini dira worratiifi waan keesa jira ch'ufa harka nyaapati kenna.

⁹ Yo worra toko keesa, nami kud'ani ka d'iira hafe, ch'ufti inhobaa.

¹⁰ Nami fiit'a nama due suni, ka huji awaala isaa harkaa qabu, reefa isaa baate mana keesaa baheeni nama mana keesati hafe yaame waan jed'uuni, Nami eegeti si woliini hafe injira? Duuba nami hafe kaani waan jed'uuni, Hiyo, tokoleeni injiru. Jennaani namichi fiit'aa kaani waan jed'uuni, Afaani qabad'i, nu maqa AABBO Waaqa d'aule himmalle.

¹¹ Hojja AABBO Waaqi dubbatu mana gudda ch'ach'absani, mana diqa balleesani.

¹² Fardi bule ira ingulufa? Galaana qotiyoni inqotani? Hiyo! Ammo isani ya d'uga garagalchitani had'aa tolchitani, ammalle qajeeluma balleesitani daba tolchitani.

¹³ Isani kiyyibdani, Dira Lodebari ya qamne jettani; ammalle, Jabeenna guddaani dira Karnaimu qamne jettani.

¹⁴ AABBO Waaqi Guddaani waan jed'u, Worra Israeli, anini askarti gosa d'ibi isaniti erga, ta lafa teesani fud'attu, duuba worri haga Kaarra Hamathi gami mirga haga Bale Araba gama bitaa isani dabse isani balleesa.