Amosi 5 - KITAABA WAAQA

¹ Isani worra Israeli, faaru boha, ta anini isani bohu tana, ch'aqasa:

² Gochiti Israeli aka dubra jidde kau dad'abde jirti! Isi lafa buusani, nami toko ka olkaasu injiru.

³ AABBO Waaqi Guddaani waan jed'u, Diri Israeli toko askarti kuma toko duula erga, ammo ta galtu d'ibba toko ch'alla; diri d'ibileeni askarti d'ibba toko duula erga, ammo kud'ani ch'allati iti gala.

⁴ AABBO Waaqi waan worra Israelitini jed'u, Nati koota, injiraattani.

⁵ Beersheba d'at'ani na inkad'atiina. Betheliti na imbarbaadiina — Betheliini ind'umati. Ammalle Gilgali ind'aqina — nama isii boojiani lafa d'ibii geesani.

⁶ AABBO Waaqa barbaada, injiraattani. Yo isani barbaadu baatani, inni aka ibida worra Yusufuti d'ufe guba. Ibidi suni worra Betheli gube, nama d'aamfule d'abani.

⁷ Isani ka d'uga balleesitani d'uga nama d'owartani, isani gaargalchani.

⁸ AABBO Waaqi urji mid'aase, Torbaanifi Arba Gaadule. Inni dukana sippe guyyaase, guyyale halkani tolcha. Inni bisaani baariini gayaame lafa godduti naqa. Maqaani isaa AABBO Waaqa.

⁹ Inni worra jajabaafi dira worra jajabaale balleesa.

¹⁰ Isani nama fulla gaadisati d'uga dubbatu injibbitani, nama waan ch'ufa keesa d'uga gadi baasu imfeetani.

¹¹ Isani hiyyeesa dabsitani mid'aani iraa saamtani. Tanaafi ato isani mana d'akha mimid'aaga jaarattanile, keesa inteetani; ato isani zabibu oobrattanile, daad'i iraa argattani ind'uddani.

¹² Anini daba keesani guddafi ch'ubbu teesani ta isani maro heddu tolchitani imbeekha. Isani nama woma intahiini dabsitani gumbo nyaatani gaadisa kora keesaleti hiyyeesa d'uga d'owartani dabsitani.

¹³ Gaafa suni nami woi beekhu qarooleeni inch'alisa, wonti akanatiifi bari suni hama!

¹⁴ Waan hamtu hanqad'a, waan dansa barbaada, aka jiraattani. Duuba AABBO Waaqi Guddaani akuma isani, Inni nu woliini jira jettani, d'uguma isani woliini jira.

¹⁵ Waan hamtu jibba, waan dansa jaalad'a, fulla gaadisa korati d'uga jabeesa. Hegeri AABBO Waaqi worra gosa Yusufu, ka armati hafe, innahaafi.

¹⁶ Tanaafi AABBO Waaqi Guddaani waan jed'u, Ballinna dira keesa bohani, Ya banne, ya banne jed'ani iyyani. Worra oobrule worra faaru boha guddo beekhuni, boha woliini yaamani.

¹⁷ Oobru zabibule ch'ufa keesati imbohani. Wonti akanatiifi anini lafa teesaniti d'ufe isani gaargalcha. Tunini dubbi AABBO Waaqi jed'e.

¹⁸ Gaargala keesani worra guyya AABBO Waaqi d'ufu guddise eegu! Guyyaani suni maani isanii baha? Guyyaani suni ufiftu isanii dukana, ifsaniti.

¹⁹ Nama nyeench'a baqate gorjamaani bahu fakaata! Yokhaani nama inni mana harkaani qabannaani bofi idde fakaata!

²⁰ Guyyaani AABBO Waaqaa dukananiti? Ifsa wo tahe? Guyyaani suni ingaandidaa male, inifsa?

²¹ AABBO Waaqi waan jed'u, Anini jila teesani ta aadaa jibbe tufad'e dida!

²² Ato isani waan gubani sorio na baaftanifi mid'aani keesani na baaftanile anini imfud'ad'u. Hori isani gabbiftani na baaftanile ani imfud'ad'u.

²³ Iyyanna teesani ta sirba tana lakisa; anini dibbe teesani ch'aqasu imfed'u.

²⁴ Fulla sirba suni, d'ugaani ha aka lola yaatu, qajeelumtileeni ha aka galaani hojja ch'ufa yau yaatu.

²⁵ Isani gumi Israeli, gaafa lafa aloo ta gamooji keesa ganna afurtama teetani, soriofi waan naa baaftani d'ibi, ya na d'uftaniini?

²⁶ Ammo amma waan isani akheekha Sikuthi hayyu keesanitiifi Kiuni waaqa keesani ka urji kad'attanifi, akheekha suni baachu maltani,

²⁷ gaafa anini isani boojie lafa Damaskitini gama isani geesu. AABBO Waaqi, ka maqaani isaa Waaqa Gudda, akana jed'e.