Amosi 3 - KITAABA WAAQA

¹ Worra Israeli, dubbi AABBO Waaqi isaniini jed'u tana ch'aqasa, isani gumiini ch'ufti ta inni lafa Misiri keesaa baase:

² Gosa lafa keesa jirtu ch'ufa keesa anini isani ch'alla ufiti aanse qorqorad'e. Tanaafi anini maro ch'ubbu teesanitiifi gaargala keesani guddisa.

Huji raagaa

³ Nami lama ka yaasuma wolti inqabatini kara woliini iyyaa?

⁴ Nyeench'i ka waan nyaatu inargini badda keesa initana? Kubleeni nyeench'aa ta woma inqabini goda keesa ingururiiti?

⁵ Simpirre t'ururaani inqaba, yo inkayaniifi? T'ururaani ufiini imbaafata, yo wo seenani male?

⁶ Magalati lolaa yo dira keesati d'aani nama innaasisu? Gaargali dirati ind'ufa, hojja AABBO Waaqi iti inergini?

⁷ AABBO Waaqi Guddaani ka waan tolchu fed'u hojattu isaa raagati inhimini woma intolchu.

⁸ Nami nyeench'a itanu insodaanne injira? Nami AABBO Waaqi dubbateeni ka woi imfanne injira?

Badi Samaria

⁹ Dubbi tana worra maneeni hayyu Misiritiifi hayyu Ashdodi keesa jiruti hima: Gaareeni dira Samaria marsituti wolti koota, gohanna waan hamtutiifi hameenna achiti tolchani dawaad'a.

¹⁰ AABBO Waaqi waan jed'u, Worri kunini waan dabsani nama saamani iraa guurataniini maneeni worraa guuta. Worri d'uga beekhe gula indeemu.

¹¹ Tanaafi nyaapi dira worraa marse naabo worraa ch'ufa ch'ach'abse, maneeni hayyule ch'ufa saamani.

¹² AABBO Waaqi waan jed'u, Akuma tissituuni miila lama yokhaani gurra tokofa, ka hori nyeench'i nyaate iraa buuftu, akasuma nami takeeni dira Samaria, ka amma sireefi barch'uma dadansa ira tatau, iraa hafa.

¹³ AABBO Waaqi Guddaani waan jed'u, Amma ch'aqasa, ilmaani Yakobo gorsa.

¹⁴ Guyya anini worra Israeli maro daba worratiifi balleesu, waan sorio irati qalani ta Betheli balleesa. Ammalle gaafasi, gaafa waan sorio irati qalani ch'ufa iraa ch'ach'absani lafati jissani.

¹⁵ Anini mana gaafa adoleesa, ka lafti d'aamotu, jaaratanifi ka bona hagayya, ka lafti owitu, jaaratanile inch'ach'absa. Mani ilka arbaatini ch'okhani injiga, mana gugurda ch'ufa imballeesani.