Aayubu 34 - KITAABA WAAQA

¹ Ammalle Elihuni waan jed'e,

² Isani worri qarooni, ka guddo wo beekhu, waan anini jed'u ch'aqasa.

³ Isani yo sagale dansa nyaatani imbeetani, ammo yo dubbi qaro d'ageetani waan isii inhubatani.

⁴ Waan d'uga fohanna, waan dansa woliini baranna.

⁵ Ayubuni waan jed'u, Anini ch'ubbu inqabu, ufuma Waaqi d'uga na d'owe male.

⁶ Ato d'uga qabad'ele kiyyiba naani jed'ani; ato ch'ubbu inqamnele, madaani tiyya haguma jirtu infayyitu.

⁷ Isani nama aka Ayubu kana, ka diqole Waaqaa inch'eere, taka gartani?

⁸ Inni goli worra ch'ubbu tahe, nama dabaatiini woliini deema.

⁹ Inni waan jed'u, Ato nami d'uga Waaqa gula deemele woma imbaatufi.

¹⁰ Me, isani worri hubacha, qabu na ch'aqasa! Waaqi guddaani dandae ch'ubbu tolcha?

¹¹ Inni huji nama gula wo kenneefi, ammalle isi gula wo bahafi.

¹² Waaqi guddaani ch'ubbu intolchu, yokhaani nama indabsu,

¹³ Ee hayi, Waaqi jabeenna ufi nama ira argate? Namati hayyu lafaa isa tolche?

¹⁴ Yo Waaqi hafuura jireenna nama keesa fuud'e,

¹⁵ nami ch'ufti hobae biyyeeti deebia.

¹⁶ Amma tana yo qalbi qabate, na ch'aqasi.

¹⁷ Atini Waaqa d'ugaa wollaala iti murta? Atini waan inni d'uga jibbu seeta?

¹⁸ Waaqi, hayyuuni atini woma keesa injirtu jed'e worra lafa fiduleeni, Isani worra ch'ubbu jed'a.

¹⁹ Inni worra lafa fidu ira ch'iise, dureesa jaalate hiyyeesa injibu, wonti akanatiifi nama ch'ufa isumati uume.

²⁰ Nami halkani tassa dua. Waaqumati d'ae isa ijeese, nama irre qabule dubbi male hobaasa.

²¹ Inni ejata nama ch'ufa jabeese eega.

²² Dukanti sipeeni, ta ch'ubbicha Waaqa dura d'ossitu, injirtu.

²³ Waaqi guyya nama wollaala iti muru waan tolfatufi inqabu.

²⁴ Inni, ka nama d'ibi ingaafanne, worra lafa fidu fuud'e, nama d'ibi fulla isaani kaa.

²⁵ Maro huji worra beekhufi, inni halkani worra gaargalche balleesa.

²⁶ Inni, ato nami ch'ufti argu, worra ch'ubbu gaargalcha,

²⁷ waan worri isa iraa gore kara isaa yaalu dideefi.

²⁸ Worri hiyyeeyi dabse, maro sunifi isiini Waaqati boonnani inni qarqaarsa worri kad'atu d'agayeefi.

²⁹ Yo Waaqi ch'allise, eenuti dandae waan isa dubbata? Yo inni fuula d'ofate, eenuti dandae isa arga?

³⁰ Woni nami dandae tolchu injirtu, aka nama Waaqa imbeenne ka nama dabse lafa fidu, ufi ira d'owu.

³¹ Ayubu, atini daba kanke Waaqati himate, ch'ubbu iti indeebiu ya jetteeni?

³² Atini Waaqaani, wollaala kiyya na garsiisi ya jette? Atini aka waan hamtu lakiftu ya ee jette?

³³ Waan atini waan Waaqi tolche quufu diddeefi, waan inni waan atini feetu tolchu seeta? Dubbini gara kiyya injirtu, gara kanke jirti, waan atini heredde nati himi.

³⁴ Nami wo beekhu naa d'ugeesa; nami qalbi qabu, ka na d'agayu, waan jed'u:

³⁵ Ayubuni waan imbeenne dubbata, dubbini isa woma keesa injirtu.

³⁶ Waan Ayubuni jed'e ch'ufa herega; aka inni aka nama ch'ubbu dubbatu inagartani.

³⁷ Ch'ubbu inni qara hojate lakisi, amma inni Waaqaani morku jira; ila teenna ch'ufa durati tae, harka d'aane, Waaqa goyeesa.