Aayubu 32 - KITAABA WAAQA

¹ Waan Ayubuni d'uga iraa bahu dide anini wollaala inqabu ufiini jed'eefi, jari sadeeni kaani iraa ch'allise.

² Ammo namichi toko, ka Elihu jed'ani, ka d'aatu eju, aka Ayubuni ufi d'ugeese Waaqa himate d'ageennaani, dallansu d'owachu dad'abe. (Elihuni ilma Barakeli, ka worra Buzi, balbalti isaa Ramu.)

³ Inni jaalani Ayubu taani sadeenileeti dallane, waan worri dubbi isaa d'aareesu dad'abe, akasiini waan Waaqi wollaala qabu fakeesefi.

⁴ Inni waan worra kaani ch'ufa ira maand'atifi haga worri kaani dubbatu ch'ufa afaani qabate.

⁵ Inni aka jari kaani sadeeni dubbi Ayubu dad'abe arginaani dallane

⁶ waan jed'e: Anini Kaima, ammo isani jaarole, tanaafi herega kiyya isani garsiisu sodaad'e.

⁷ Anini eegi jaaroleeni tunini nama wobule ha qarooma ufi garsiiftu jed'e.

⁸ Ammo lubbu Waaqa guddati d'ufe qarooma namaa kenna.

⁹ Nami wobeekhu jaarole ch'allaniti, nami wohubatu nama wobule ch'allaniti.

¹⁰ Tanaafi amma na ch'aqasa, waan anini herege isaniti hima.

¹¹ Anini haga isani dubbatani dubbi qajeeltu barbaadani ch'ufa, ufuma obse isani ch'aqasa.

¹² Anini aka dansa isani ch'aqase, ammo isani waan jettani ya d'abdani; isani dubbi Ayubu ya d'aareesu dad'abdani.

¹³ Nu qarooma qamna injed'ina; dubbi isaa Waaqa male nami ind'aaresu.

¹⁴ Ayubuni naani indubbanne, isaniini dubbate male, ammo anini aka isani jettaniini injed'uuni.

¹⁵ Ayubu, worri ya ufi jibbaate, waan jed'u d'abe.

¹⁶ Waan worri waan jed'u wollaale ufuma ejaanjufi anileeni afaani qabachu male?

¹⁷ Akasiniti, anini amma wojed'e, herega kiyya isani garsiisa.

¹⁸ Anini dandae afaani qabad'e inoobsu, anini dandae inch'allisu, woiti na dubbisa.

¹⁹ Yo anini qoomni dubbad'uuni d'abe, anini aka gorjo d'aadiini hareetini miju tarsaa.

²⁰ Anini dandae inoobsu, afaani guutad'e dubbachu male,

²¹ anini dubbi tana keesa nama tokole ira inchiisu, yokhaani nama ind'ugeesu.

²² Anini dubbi namaa kuru imbeekhu, yo anini akasi tae Waaqi yoosu na balleesa.