Aayubu 13 - KITAABA WAAQA

¹ Anini waan kana ch'ufa ya ila tiyyaani arge, gurra kiyyaani d'agaye hubad'e.

² Waan isaani beetani anini imbeekha, waan tokoleeni anini isani inhanqad'u.

³ Ammo anini Waaqa guddaani dubbachu fed'a, aka dubbi tiyya woliini qorru.

⁴ Isani daallumma teesani kiyyibaani d'ossitani, isani ch'ufti ch'ireeyyi woma imbeenne fakaatani.

⁵ Afaani qabad'a, hegeri worra qaro isani sehani!

⁶ Dubbi anini himad'u ch'aqasa!

⁷ Isani maafi d'ara dubbattani? Waan d'arti teesani Waaqa wobaatu seetani?

⁸ Isani isaa dubbachu feetani? Dubbi keesa isaa kalchu feetani?

⁹ Yo Waaqi isani ilaale, inni waan dansa isani irati inarga? Isani aka nama sobdani, waan Waaqa sobu dandeetani seetani?

¹⁰ Ato isani d'ossaani nama gargari filtanile inni wollaala isani garsiise,

¹¹ irreefi guddinni isaa isani mudamsiisa.

¹² Mammaasi keesani akuma daara woma keesa injirre, moromani teesanileeni akuma d'oqe bulloofti.

¹³ Anati dubbata, me afaani qabad'a, wonti taha ha taatuti.

¹⁴ Anini ya ufi jibbaad'e, duale kurfo jira.

¹⁵ Anini abdi waan tokole inqabu, tanaafi ato Waaqi na ijeese ho? Anini insodaad'u amma ufi dubbad'a.

¹⁶ Hegeri garaa jabeenni kunini na baasa wonti akanatiifi ch'ubbichi dandae Waaqa dura ineju.

¹⁷ Amma dubbini tiyya ha gurra isani seentu, aka dansa ch'aqasa.

¹⁸ Anini kurfo jira aka ufii dubbad'u, wonti akanatiifi aka kara d'ugaa keesa jiru imbeekha.

¹⁹ Ee Waaqa atini d'ufte na himatta? Yo na himatte anini ch'allise dua.

²⁰ Waan lama naa tolchi duuba anini si ind'okhad'u;

²¹ na ingaargalchini na lakisi, teete na imudamsiini.

²² Ee Waaqa, naani dubbad'i; si jalaa qaba; yokhaani na dubbachiisi, na jalaa qabi.

²³ Dabi kiyya maani? Wollaali anini tolche maani? Wonti naani himatani maani?

²⁴ Atini maanifi na didde nyaapati na heredda? Atini na sodaachisuu feeta?

²⁵ Atini na mudamsiisu feeta? Anini obeensa mukhati, atini buuyo gogode qilleensi fuud'e ch'alla reebu jirta.

²⁶ Atini waan jabduuni na himatta waan duri gaafa kaima anini tahele illakiftu.

²⁷ Atini sansalatani miila kiyya hiite, ejata kiyya ch'ufa ilaalte faana tiyya d'oofta.

²⁸ Tanaafi anini shame ch'ich'ite, woya billaachi nyaate fakaad'a.