Aayubu 1 - KITAABA WAAQA

Aka Sheet'ani Ayubu ilaalate

¹ Duri namicha tokoti jira, ka Ayubu jed'ani, ka arda Uzi keesa godaanu, inni nama d'uga qajeela, ka Waaqa sodaate waan hamtu lagatu.

² Inni ilmaani d'iira torbafi dubra sadi qaba;

³ ammalle ree kuma torbatiifi gaala kuma saditiifi karaaba qotiyo ta kuma tokotifi harre d'ibba shanitiifi hojattu heddu muumme inqamne qaba. Akanaani inni worra ilaboru ch'ufa ira dureesa tahe.

⁴ Ilmaani isaa maro maroti mana isaaniti jila baafte, oboleyaani isaani ta dubra sadeeni yaamte, woliini golofatani.

⁵ Yo jilti suni hobaatu ch'ufa Ayubuni ganama lafaa akae, aka ilmaani isaa ch'ufa qulqulleesu sorio qala. Wonti inni akasi tolchufi, waan ilmaani isaa hegeri garaa keesati Waaqa abaartu fa sehe sodaata.

⁶ Guyyaani malaikaani AABBO Waaqaa durati mullattu geennaani, Sheet'anileeni worra woliini d'ufe.

⁷ AABBO Waaqi waan Sheet'anani jed'e, Isii, abbo, atini eesaa d'ufte? Sheet'ani waan jed'eeni, Anini lafuma tana keesa oli gadi mara, ato maru armaani bahe.

⁸ AABBO Waaqi waan jed'eeni, Atini aka hojattuuni tiyya Ayubuni nama d'uga qajeela Waaqa sodaate waan hamtu lagatu agarte? Lafa keesa nami aka isa injiru.

⁹ Sheet'ani waan jed'eeni, Mala keeti Ayubuni fayyuma si jaalata?

¹⁰ Atini isaafi worra isaatiifi waan inni qabu ch'ufa jabeesite intissine? Atini huji harka isaa ch'ufa eebifte, hori isaa lafa ira indabarsine?

¹¹ Ammo yo atini waan inni qabu ch'ufa harka keetiini iraa fuute, mala keeti inni si inabaaru?

¹² Duuba AABBO Waaqi waan Sheet'anani jed'e, yoosi anini amma isa siti lakisa, waan isaa ch'ufa waan feetu tolchi, ammo nafa isaa hanqad'i. Jennaani Sheet'ani kae, AABBO Waaqa biraa deeme.

Aka ijoolle Ayubutiifi hori isaa balleesani

¹³ Guyya toko, ka ilmaani Ayubu jila tolfate, mana oboleesa isaani guddaa keesati teete, sagale sooratte daad'i d'uddu,

¹⁴ nami toko qonqooni Ayubuti d'ufe waan jed'e, Ato nu teenne oobru qonnu, ka harreleeni teenna nu d'aatu d'eedu.

¹⁵ Worri gosa Seeba d'ufe, tassa nu had'e, hori nuraa fud'ate, ana male hojattu tante ch'ufa fit'e. Nami fiige ka oduuni si d'ufe anuma ch'alla.

¹⁶ Ato inni tae dubbatu, nami d'ibiini qonqooni d'ufe waan jed'e, Qaweeni Waaqa ya reefi nama isi tissule ch'ufa ira buute hobaafte nami fiige, ka odu sunini si d'ufe, anuma ch'alla.

¹⁷ Ato inni tae dubbatu, nami d'ibiini qonqooni d'ufe waan jed'e, worri gosa Kaldayo, ka duuli worraa fulla sadi yau, d'ufe nu had'e, gaala ch'ufa fud'ate, ana male hojattu tante ch'ufa fit'e. Nami fiige ka oduuni si d'ufe anuma ch'alla.

¹⁸ Ato inni tae dubbatu, nami d'ibiini qonqooni d'ufe waan jed'e, Ato ilmaani tante teete mana oboleesa isaani gudda keesati jila tolfate, sagale sooratte daad'i d'uddu,

¹⁹ bubbeeni jabduuni toko lafa alooti d'ufte mana suni gama ch'ufa d'oofte, ilmaani suni irati qaarifte hobaafte. Nami fiige, ka oduuni si d'ufe, anuma ch'alla.

²⁰ Jennaani Ayubuni aka male laalefate woya ufii tarsaase, mata haadate, lafaani ufi d'ae waan jed'e,

²¹ Anini qulluma d'alad'e gaafa duulle qulluma dua. Waan kanale Abbuma Waaqati naa kenne, ammalle isumati fud'ate, maqa isaa ha faarsani!

²² Ato wonti kunini ch'ufti isaati d'uftele, Ayubuni Waaqa haalate isaati inch'ubbamne.