2 Timotheo 3 - KITAABA WAAQA

¹ Waan kana qaabad'u! Guyyaani muumme gaargala hama qaba.

² Nami ufo tahe, sabdae, ufi guddise, ufi saada; wolarabsani, worra ufiiti saalfachu didani, galata deebisu, didani, aada Waaqa lakisani;

³ arja tahu didani, naasu lakisani, maqa wolt'ureesani, woldidani, wolhad'ani, waan dansa jibbani;

⁴ wolballeesu fed'ani, mata jabaatani, ufi guddisani, Waaqa ira gammada jaalatani;

⁵ nama aada Waaqa guutu ufi tolchani, ammo jabeenna isi didani. Jara akana kana ira fagaad'u.

⁶ Nami gari mana nad'eeni d'aqe, nad'eeni lalaaftu ta qara dabi iti ulfaate d'araa gosa ch'ufa gula yaatu fud'atani.

⁷ Nad'eeni tunini hojja ch'ufa wo barachu feeti, ammo haguma jirtu d'uga imbarattu.

⁸ Akuma duri Yanefi Yambreni dubbi Musa didde, akasuma worri kunileeni d'ugaa dida — nama herega inqamne, ka d'ugefacha argachu dad'abe.

⁹ Wonti kunini garu ind'at'u, waan nami ch'ufti aka worri daalle arguufi akuma jari kaani duri tahe.

D'aamsa waan huji

¹⁰ Ammo atini ya barsiisa tiyyaafi adaba kiyyafi jireenna kiyya gula deemte; atini ya d'ugefacha tiyyaafi obsa kiyyafi jaalala tiyyaafi jabeenna kiyyafi,

¹¹ gaargala kiyyafi d'aanicha kiyyale agarte. Waan Antiokiafi Ikoniofi Listra keesati na tolchani quba qabda, gaargala hama anini argad'e ch'ufa! Ammo Aabbooni ya waan suni ch'ufa keesaa na baase.

¹² Nama Kristo Yeso woliini jireenna Waaqi fed'u keesa tau ch'ufti ingaargalchani;

¹³ ammo nama hamafi kiyyibaani ch'ufti ira hamaata, ufi sobani nama d'ibile sobani.

¹⁴ Ammo atini, d'uga si barsiisani aka dansa d'ugefatte keesa tai. Wonti akanatiifi atini nama si barsiise imbeeta,

¹⁵ ammalle haga ijoolluma teetiti ya T'aafi Qulqullo, ta dandeete hubacha baafama, maro d'ugefacha Kristo Yesotiifi sii kennitu baratte.

¹⁶ Wonti akasitiifi t'aafiini ch'ufti hafuura Waaqaa qabdi ammalle wo baati, isi d'ugani barsiisani, wollaalaani gorsani, qajeelaani garsiisani, waan jireenna dansaatiini barsiisani,

¹⁷ aka nami Waaqa ch'ufti qit'ae kurfo tae, huji dansa ch'ufa hojatu.