2 Samueli 8 - KITAABA WAAQA

¹ Eegi suni Daudini worra Filisti had'e dabsate, lafa Israeli ta worri harkaa qabule keesaa baase.

² Jennaani inni worra Moabu dabsate, nama qaqabe lafa ch'ich'ifsise nama sadi ch'ufa keesaa nama lama fit'e. Duuba akanaani worri Moabu isa jalati bule gibira baaseefi.

³ Ammalle inni hayyu lafa soba ka Hadadezeri ilma Rehobu jed'ani, dabsate, ato inni lafa isaa ta d'aatu galaana Efraiti had'e deefachu deemu.

⁴ Daudini askarti isaa nama kuma tokofi d'ibba torba ta fardatifi ammalle nama kuma diddama ta miilaani yaatu qaba. Inni farda gaari hirkisu ka d'ibba toko gahu lakise ka ira hafe ch'ufa nanaafise.

⁵ Gaafa worri gosa Shamu, ka lafa Damaski jiru, duula baase hayyu Hadadezeri qarqaaru d'aqe, Daudini nama kuma diddami lama keesaa hobaase.

⁶ Jennaani Daudini lafa isaani keesati fulla askartini isaa teetu jaare worri isa jalati bule gibira baaseefi. AABBO Waaqi Daudi fulla inni bahe ch'ufati qarqaare, waan ch'ufa isa dabsachiise

⁷ Daudini wonte worqiini mid'aasani, ta jari gugurdaani Hadadezeri yauni, guure Yerusalemuti geese.

⁸ Ammalle sibiila diima heddu dira Bethifi Berothai jed'ani ka Hadadezerini mohatu, keesa boojie.

⁹ Hayyu Toini, ka lafa Hamathi aka Daudini askarti lafa Hadadezeri ch'ufa dabsate d'agae.

¹⁰ Jennaani, ilma isaa Yoramu Dauditi erge, nagaya iti himi, atini aka d'iira tate, ka Hadadezeri, nama nu maro heddu woli haane dabsatte balleesite jed'iini jed'e, Yoramuni waan worqifi qarsifi sibiila diimani mid'aasani Daudii geese.

¹¹ Daudini miha inni d'ufeeni sunifi qarsifi worqi inni lafa had'e taani ch'ufa iraa boojie woliini eebise, mihi kunini ka AABBO Waaqa jed'e olkaye.

¹² Lafti inni had'e dabsate tana: Edomu, Moabu, Amoni, Filistifi Amaleki. Inni ammalle waan Hadadezeri iraa boojie akasuma eebise Waaqaa olkaye.

¹³ Daudini nama kuma kud'ani saddeeti ka Edomu bale sooda keesati fit'e gallaani haga qarale ira gurri d'ufe.

¹⁴ Inni Edomu keesa fulla ch'ufati fulla askartini teetu jaare, biyyiti lafa sunileeni ch'ufti isa jalati bulte. AABBO Waaqi Daudi fulla inni bahe ch'ufa eebise nyaapa isaale ch'ufa isa dabsachiise.

¹⁵ Daudini worra Israeli ch'ufa aka dansaa d'ugaafi qajeelumani fide.

¹⁶ Yoabuni ilmi Seruya, gudda askarti isati; Yehoshefathini, ilmi Ahiludi, nama waan t'aafani ch'ufa harkaa qabu;

¹⁷ Sadoki ilmi Ahitubutifi Ahimelekini ilmi Abiathari qaalole; Seruyaani nama hayyu tatabe t'aafu;

¹⁸ Benaiyani ilmi Yehoyada, gudda askarti Daudi eeddu; ilmaani Daudileni qaalole.