2 Samueli 3 - KITAABA WAAQA

¹ Had'iisi goli Saulotifi ka goli Daudi guyya heddu fud'ate. Akuma golini Daudi jabaatuni golini Saulo lalaafti.

Ilmaani Daudi

² Ilmaani d'iira tunini jaani ilmaani d'iira ta Daudi d'alate gaafa inni Hebroni jiru: Angafi Amnoni, haati isaa Ahinoamu, ta lafa Yezreeliti baate;

³ ka iti aanu Kilebu haati isaa Abigaili, ta Nabalini lafa Karmeli iraa due. Ka iti aanu Absalomu, haati isaa Maaka, dubra hayyu Talmai lafa Geshuriti;

⁴ ka iti aanu Adoniya, haati isaa Hagithi; ka iti aanu Shefathia, haati isaa Abitali

⁵ ka iti aanu Ithreamu, haati isaa Egla. Ilmaani tunini ch'ufti Daudii Hebroniti d'alate.

Aka Abinerini goli Dauditi darame

⁶ Akuma had'iisi jiddu goli Saulotifi goli Daudi dura deemuni, Abinerini goli Saulo keesa jabaate gurra baafate.

⁷ Jennaani guyya toko Ishboshethini, ilmi Saulo, Abinerini ya jaalto Saulo ta Rispa jed'ani ta dubra Aya barate jed'e himate.

⁸ Dubbini tunini guddo Abineri dallansiifte, duuba inni waan jed'eeni, Atini sare na seeta, ka anini Saulo lakise Yuda gula deemu? Anini haguma duriti goli abba kanke Saulotifi oboleyaani isaatiifi jaalani isaati. Ammalle anini harka Daudi keesa si imbaafne? Ka duuba atini arra maro niiti tanaatiifi na himatu!

^9-10 AABBO Waaqi Dauditi kakhate, lafa tana Saulofi d'aloota isaa iraa fuud'e haga Dani iti keeyad'e Beershebati d'abe hayyu Israelitiifi ka Yuda, si tolcha isaani jed'e. Waaqi na ijeesinna, yo anini dubbi suni guutu baad'e!

¹¹ Ishboshethini maro Abineri sodaatufi woma jechu dad'abe.

¹² Jennaani Abinerini qonqo gara Daudi, ka gaafasi Hebroni jiruti, erge waan jed'eeni, Lafti tunini ta eenu? Eenuti mohata? Wold'aqisa na woliini tolfad'i, duuba anini worra Israeli ch'ufa gama kanke deebisa.

¹³ Daudini waan jed'eeni, Dansa hataatuti, yo atini waan toko naa guute anini wold'aqisa si woliini tolfad'a. Yo atini na argu d'ufte intala Saulo ta Mikali jed'ani naa kootiini.

¹⁴ Ammalle Daudini nama gara Ishboshethi erge waan jed'eeni, Niiti tiyya Mikali na galchi, anini misa d'ibba toko ka worra Filistitini baase isi fuud'e.

¹⁵ Jennaani Ishboshethini d'iirsa isii Paltieli ilma Laishi iraa fuud'e Daudi galche.

¹⁶ Jennaani Paltielini boha faana deeme haga dira Bahurimu, ammo Abinerini beeni gali jennaani kae gale.

¹⁷ Abinerini jaarole Israeli wolti yaame waan jed'eeni, Isani qara guddo Daudi hayyu keesani tahu feetani.

¹⁸ Amma tolfad'a! Qaabad'a, waan AABBO Waaqi jed'e: Anini harka hojattu kiyya Dauditini worra kiyya ka Israeli harka nyaapa worra ka Filisti keesaa baasa.

¹⁹ Ammalle Abinerini worra gosa Benjaminile akasuma jed'eeni, duuba Hebroni d'aqe, waan worri Benjaminitifi ka Israeli jed'e Dauditi hime.

²⁰ Abinerini nama diddama woliini Hebroni d'ufe jennaani Daudini hori qaleefi aka dansaa worra bulche.

²¹ Jennaani Abinerini waan Daudini jed'e, Ee hayyichaa anini amma deeme worra Israeli ch'ufa gama kanke deebisa. Worri aka atini hayyu worra ya ee jed'e, Atinileeni waan qara barbaddu argate, lafa tana ch'ufa mohata, jennaani Daudini Abineri eebise nagayaani gad'iise.

Aka Abineri ijeesani

²² Hojuma suni Yoabufi jari Daudi, ka waan heddu boojie, had'iisa nyaapati gale ammo Abinerini yoosuni, Hebroni fulla Daudini jiru ya deeme, wonti akanatiifi Daudini yayu eebisefi nagayaani ga d'ise.

²³ Yoabufi jari Daudi artini baanani, waan jed'aniini, Abinerini ya fulla Daudi d'ufe nagayaani gale.

²⁴ Jennaani Yoabuni gara hayyu d'aqe waan jed'eeni, Atini maani taati, ka Abineri siti gad'ufe nagayaani gad'iiftu?

²⁵ Atini aka inni soba arma d'ufe waan atini keesa jirtu ch'ufa hubate odu sunini galu imbeetu?

²⁶ Yoabuni Daudi biraa bahe nama Abineri yaamu iti erge duuba eegi inni eela Sirale dabre keesa deebisani; ammo dubbi suni Daudini quba inqabu.

²⁷ Abinerini Hebronini bahe jennaani Yoabuni kobati isa fuud'e, fulla fullo geese aka waan d'ossaa iti himu fed'u, artumati garaa keesa woraane ijeese, waan inni duri oboleesa isaa Asaheli ijeesefi.

²⁸ Daudini odu tana d'agaye jennaani waan jed'e, AABBO Waaqi imbeekha aka anaafi nami kiyya ch'ufti ijeecha Abineri keesa injirre.

²⁹ Ch'ubbuuni tunini ha Yoabufi worra isaa ch'ufa qabatuuti! D'alooti isaa ch'ufti nama ch'oftu qabuufi yokhaani nama qomaat'a qabuufi yokhaani nama huji d'iira lakise huji nad'eeni ch'alla hojatufi yokhaani nama woraanani duu yokhaani nama liqimsa inqamne ha qabaatuti!

³⁰ Akanaani Yoabufi oboleesi isaa Abishaini Abineri ijeesani haalo oboleesa isaani Asaheli ka Gibioniti ijeesani baasani.

Aka Abineri awaalani

³¹ Jennaani Daudini waan Yoabufi jara isaa ch'ufaani jed'e, Woya teesani tatarsaasa ch'arqi naqad'a, Abineri boha. Guyya isaa awaalani hayyichi Daudileni jara reefa isaa baatu duuba deeme.

³² Abineri Hebroniti awaalani, guyya isa awaalani suni hayyichileeni lalabe bohe, biyyiteleeni akasuma boote.

³³ Daudini faaru taanaani isaa bohe. Abinerini maanifi aka daalle due?

³⁴ Harka isaa inhiine, miila isaale wolti inhiine; inni aka nama algali ijeese due! Ammalle biyyiti isaa boote.

³⁵ Guyya suni ch'ufa biyyiti Dauditi d'ufte, sagale soorad'i jetteeni, ammo inni kakhate waan jed'e, Waaqi na ijeesinna, hojja anini sagale nyaad'e haga aduuni d'ituti!

³⁶ Biyyiti aka inni sagale didde arginaani gammadde; wonti hayyuuni tolche ch'ufti guddo biyya gammachiifte.

³⁷ Duuba akasiini nami achi jirufi gumiini Israeli ch'ufte aka hayyuuni ijeecha Abineri keesa injirre hubatte.

³⁸ Hayyichi waan jara ufitini jed'e, Isani aka guyya kana nami guddaani lafa Israeli keesaa due imbeetani?

³⁹ Ato anini hayyu Waaqi fohate tahele, anini arra lalaafa; ilmaani Seruya tunini hamamtu, waan nami dandauniti. AABBO Waaqi worra algala kana gaargalche, gati worraa ta ch'ubbu tana kenninnafi!