2 Samueli 20 - KITAABA WAAQA

¹ Lafa Gilgali keesa gaafasi namicha seseega woma keesa injirre ka Sheba jed'ani ka ilma Bikri, ka gosa Benjaminiti jira. Inni magalata d'ae iyye waan jed'e, Daudini ha baduti! Nu nami tokoleeni isa gula iyyaanu, worra Israeli biraa nu galcha!

² Jennaani worri Israeli ch'ufti Daudi lakise Sheba gula iti d'aabate. Ammo worri Yuda, ka Yordani bahe isa woliini Yerusalemuti yauti jiru, garaa tokooni isa birati hafe.

³ Daudini mana isaa ka Yerusalemutini bahe jennaani nad'eeni gaarayoota isaa kud'annaani taani, ta inni mana isa qorqorti lakise, guure mana tokoti galche sagale kenneefi, ammo bulti bira gahu dide. Nad'eeni suni haga isiini jirtu rifaane isi lagate akuma haad'a hiyyeesa lakise.

⁴ Jennaani hayyichi waan Amasaani jed'e, Worra Yuda nama d'iira wolti yaami, atileeni iftaani worra woliini koota.

⁵ Amasaani worra yaamu d'aqe, ammo guyya hayyuuni qabeefi kaani ind'umne, oole.

⁶ Duuba hayyichi waan Abishaini jed'e, Shebani Absalomu ira nu gaargalcha, jara kiyya kana fuud'i, faana isa iti d'aabad'a yokhaani dira jajabaafa gale nu duraa baha.

⁷ Akanaani jari Yoabutifi askartini hayyu eeddufi ammalle askartini Israeli ch'ufti, Abishai woliini barbaada Sheba iti d'aabate.

⁸ Worri d'akha gudda toko ka Gideonitini bahe jennaani, Amasaani worra fuula keesa d'ufe. Yoabuni miha lola hid'ate, goraade qalqala keesa keeyate, gurdati hid'ate. Ato inni gadi d'ufu jiru goraadeeni isa qalqala keesaa baate iraa lafa buute.

⁹ Yoabuni waan Amasaani jed'e, Jaali, nageenni bad'aad'a? Jennaani harka mirgichani areeda isa ufiti gadi hirkise aka waan d'ungatu.

¹⁰ Amasaani goraade Yoabuni harka kaanii qabu ufira eeguti injiru, duuba Yoabuni goraade sunini garaa keesa tumate, marumaani isa ch'ufa lafa buani, waan inni hojuma suni duefi, Yoabuni woraansa lameeso itindeefanne. Jennaani Yoabufi oboleesi isaa Abishaini Sheba reebu itid'abatani.

¹¹ Jari Yoabu nami toko reefa Amasa bira eje, lalabe waan jed'e, Nami goli Yoabutifi Daudi, Yoabu gula yaa!

¹² Reefi Amasa, ka d'iigi balleese, kara kute keesa ch'iisa. Namichi kaani aka nami ch'ufti achi ejaanju arge jennaani reefa suni kara keesa alati hirkise woya iti uyise.

¹³ Eegi reefa kara keesaa gorsani, nami ch'ufti faana Yoabu yae Sheba reebe.

¹⁴ Shebani lafa gosa Israeli ch'ufa keesa dabre, dira Abeli Bethmaaka jed'aniini bahe, jennaani worri gosa Bikri wolti bahe, isa gula yae dira duude.

¹⁵ Jari Yoabu aka Shebani achi jiru d'ageennaani dira suni marse had'e. Biyye qotani dallaa alatiini marsani, ammalle dallaale jala qotani, aka inni jigu.

¹⁶ Niiti qaro tokoti dira suni keesa jira; isiini dallaa iraani lalabde waan jette, Ch'aqasa! Ch'aqasa! Yoabu naa gayaama. Anini isaani dubbachu fed'a.

¹⁷ Yoabuni d'ufe jennaani isiini waan jetteeni, atini Yoabu? Jennaani inni waan jed'e, Ee anuma, Isiini waan jetteeni Aabbo, na ch'aqasi, innileeni, siuma ch'aqasu jira jed'eeni.

¹⁸ Isiini waan jette, duri waan jed'ani, Dira Abeli d'aqi, waan feetu gaafad'u, siti himani, tanumani dubbini buufati.

¹⁹ Diri keenna kunini dira Israeli keesa nagayafi balchuma qaba. Atini maanifi dira kana balleesu feeta? Atini waan AABBO Waaqa balleesu feeta?

²⁰ Yoabuni waan jed'eeni, Anini diqole dira kana balleesu infed'u!

²¹ Nu herega suni inqamnu. Namicha Sheba jed'ani ka ilma Bikri, ka lafa gareeni ta Efraimu keesaa bahe, hayyu Daudini morku fed'a. Namicha suni ch'alla nuti keenna dira keesaani biraa yaana. Isiini waan jetteeni mata isa dallaa irani isaniti darbanna.

²² Duuba isiini mala isii kanaani worra dira suniti d'ufte, worri mata Sheba iraa kute, dallaa iraani Yoabuti darbate Jennaani inni magalata d'ae, worri isaa dira suni biraa yae, worra ufiti deebie. Yoabuleeni Yerusalemu fulla hayyuti deebie.

Hojattu Daudi

²³ Yoabuni gudda askarti Israeli ch'ufa; Benaiya, ilmi Yehoyada, gudda askarti Daudi eeddu;

²⁴ Adoniramuni gudda nama irreeni nama hojachiisu; Yehoshefathini, ilmi Ahiludi, gudda worra wo t'aafe wo olkayu;

²⁵ Sheranini nama tatabe hayyu t'aafu; Sadokifi Abiatharini qaalole isaati;

²⁶ Iraaleeni ka dira Yairiti bahe, qaallu Dauditi.