2 Samueli 2 - KITAABA WAAQA

¹ Eegi suni Daudini waan Waaqaani jed'e, AABBO Waaqa d'aqe dira Yuda toko iti qubad'a? AABBO Waaqi waan jed'eeni, Beeni, d'aqi qubad'i. Daudini, Dira kami d'aqa jed'e gaafate. AABBO Waaqi waan jed'eeni, Hebroni d'aqi.

² Duuba Daudini nad'eeni isaa lamaani Ahinoamu ta Yezreeliti d'alateefi Abigaili, ta Nabalini ira due, ta Karmelii d'ufte, fud'ate Hebroni d'aqe.

³ Inni ammalle jara isaa kaanifi worra isaani ch'ufa fuud'e, worri Hebronifi dira d'aatu ch'ufati qubate.

⁴ Jennaani worri Yuda Hebroni d'ufe Daudi muude, hayyu Yuda tolche. Daudini aka worri Yabesh-Gileadi Saulo awaale d'agaye jennaani,

⁵ nama worri suniti erge waan jed'eeni, AABBO Waaqi isani eebisinna, waan isani hayyu keesani Saulo naattani awaaltanifi.

⁶ Ammo AABBO Waaqi isanile nahe isani eebisinna; aninileeni maro huji teesani sunifi isani eebisa.

⁷ Amma jabaad'a, woma insodaatina! Hayyuuni keesani Sauloni doonaani, worri Yuda yayu na muude hayyu na tolfate.

Aka Ishboshethi hayyu Israeli tolchani

⁸ Guddaani askarti Saulo, Abinerini, ilmi Neri, qara ilma Saulo Ishboshethi fuud'e baqateeni, galaana Yordani taake Mahanaimuni d'ufe.

⁹ Achiti Abinerini isa hayyu lafa Gileaditifi Asheri, Yezreeli, Efraimu ammalle Benjamini yokhaani lafa Israeli ch'ufa tolche.

¹⁰ Gaafa hayyu Israeli isa tolchani suni ganni isaa afurtama. Inni ganna lama ch'alla lafa mohate. Ammo gochiti Yuda Daudi gula yaate,

¹¹ innileeni Hebroni keesa ganna torbafi jia jaa gosa Yuda mohate.

Had'iisa worra Yudatifi ka Israeli

¹² Abinerifi jari Ishboshethi ilma Saulo Mahanaimu kaani dira Gibioni d'aqani.

¹³ Yoabu ilma Seruyatifi jari Daudi fulla harooti worra suniti d'ufe. Duuba worri ch'ufti achi tae; worri Abineri gama taka tae, worri Yoabuleeni gama kaani tae.

¹⁴ Abinerini waan Yoabuni jed'e, Nami kiyyafi kankeleeni haga toko ha d'ufe nu durati wolhad'uti. Yoabuni waan jed'eeni, Hayye ha tatuuti.

¹⁵ Jennaani nama kud'ani lama worra Ishboshethi ka gosa Benjamini keesaa filani nama kud'ani lama d'ibi ka worra Dauditini wolti naqani.

¹⁶ Nami ch'ufti wahela ufi mata qabe, goraade ufi ch'inaachati d'ae, akanaani worri suni ch'ufti woliini hobae. Duuba fulla suni, Gibioni keesa, ballinna goraade jed'ani maqa iti baasani.

¹⁷ Jennaani aka hama wolhad'ani, jari Daudi Abinerifi worra Israeli dabsate.

¹⁸ Ilmaani Seruya sadeenu achi jirti, Yoabu, Abishai, Asaheli. Asahelini ka haga hiddi utaalu,

¹⁹ Abineri reebe jalaa deebiu dide.

²⁰ Abinerini dudda duuba millate, Asaheli, nama kunini sii, jed'e gaafate. Jennaani inni, Ee, anuma jed'e.

²¹ Jennaani Abinerini waan jed'eeni, Na jalaa deebii nama askarti toko reebi, waan inni qabu iraa fud'ad'i. Ammo Asahelini isa jalaa deebiu dide.

²² Ammalle Abinerini waan jed'eeni, Na jalaa deebii! Anini maanifi si ijeesa? Hegeri akami dandae fuula oboleesa kanke Yoabu keesa laala, yo si ijeese?

²³ Ammo Asahelini ammalle isa jalaa deebiu dide, jennaani Abinerini jinfu woraanatiini ufi duubati garaa tumate fulaanse inni artumati lafa d'ae due, nami arti d'ufe ch'ufti artuma naanae.

²⁴ Ammo Yoabufi Abishaini Abineri reebani, adu d'iite gaara Amma, ka Giani ilaboru, ka kara lafa aloo ta Gibioni deemu ira bahuti bahanini.

²⁵ Nami gosa Benjamini fulla Abinerini jiru gaara toko gubbati wolti bahani garaa jabaatani kurfotaani.

²⁶ Abinerini Yoabuti lalabe waan jed'eeni, Nu haguma jiru ch'ufa woluma haana? Atini ingartu, aka wonti kunini hameennani buufatu? Nu namu gosuma, atini yoomi worra kana ka nu reebu nuraa deebifta?

²⁷ Yoabuni waan jed'eeni, Waaqi imbeekha, aka yo sila atini dubbi tana jechu baate, jari kiyya si jalaa indeebine haga bori diiramati asi.

²⁸ Jennaani Yoabuni magalata d'ae, nami ch'ufti reebu lakise. Worra Israeli jalaa deebie, had'iisi akasiini hobae.

²⁹ Abinerifi jari isaa halkani suni ch'ufa bale Yordani keesa yaa bule; duuba galaana Yordani taakani boriyyaatele ch'ufa yaani Mahanaimuti galani.

³⁰ Yoabuni reebu worraa lakise, nama isaa ch'ufa wolti yaame, tohate, Asaheli male, nama kud'ani sagali d'ibi d'abani.

³¹ Ammo hataatu, jari Daudi nama d'ibba sadifi jaatama jara Abineri ka gosa Benjamini hobaase.

³² Yoabufi jari isaa reefa Asaheli fuud'e awaala worra isaani ka Bethlehemu jiruti awaalani. Jennaani halkani suni ch'ufa yaa bulani ganama Hebronini bahani.