2 Samueli 14 - KITAABA WAAQA

¹ Yoabuni, ilmi Seruya, aka garaani hayyicha Absalomuti eju arge,

² jennaani nama gara dira Tekoa erge, niiti qaro toko gayaame. Isiini d'ufte jennaani waan jed'eeni, Nama bohu ufi tolchi; woya hamtu keeyad'u d'ad'ale indibatini, niiti guyya heddu boote ufi tolchi.

³ Duuba hayyicha d'aqi, waan anini sini jed'e kana iti himi. Jennaani Yoabuni waan isiini jechu malte iti hime.

⁴ Niitiini suni gara hayyu d'at'e saalfateefi durati gadi jette waan jetteeni, Ee hayyicha, na qarqaari!

⁵ Hayyichi waan jed'eeni, D'ibi kanke maani? Isiini waan jetteeni Aabbo, anini hiyyeeti, d'iirsa inqabu.

⁶ Aabbo, anini qara ilmaani lama qaba; duuba worri gaafa toko ka nami worra gargari baasu injirre woldide, toko kaani d'ae ijeese.

⁷ Amma tana, Aabbo, gochiti tiyya ch'ufti nati kaate waan nani jettu, gurba oboleesa isaa d'ae ijeesa kaani nuu kenni, aka waan inni oboleesa isaa ijeesefi nuleeni isa ijeemnu. Duuba hojja worri kara sunini gurba kana ka na d'aalule ijeese, worri daara na d'owe d'iirsa kiyya ka injirrele maqa balleesa.

⁸ Hayyichi waan niitiini jed'e, Dubbi tana nati lakisi, beeni gali anumati qorqorata.

⁹ Ammo niitiini waan isaani jette, Wonti atini tolchitu ch'ufti ha gubba tiyyafi ka worra keenna taatuti — siifi worri kanke keesa injiru.

¹⁰ Hayyichi waan jed'eeni, Yo nami tokoleeni siti game natiini kooti, inni deebie si ingaargalchu.

¹¹ Isiini waan jetteeni, Ee hayyicha AABBO Waaqa kanke na kad'ad'u, aka namichi fiit'a tiyya ka d'iiga gurba kiyya kaani barbaadu, gurba kiyya tokocha hafe injeemne. Daudini waan jed'eeni maqa AABBO Waaqa jirutini siti kakhad'a, aka gurba kanke nami qeench'aleeni intunne.

¹² Niitiini ammalle waan jetteeni, Dubbi toko ch'allati na hafe, na jechisiisi, jennaani inni, jed'i jed'eeni.

¹³ Isiini waan jetteeni, Atini maanifi waan hamtu akana gumi Waaqati hojatta? Atileeni ka gurba kanke ka lafa d'ibiti baqate galchu didde, jechuma reefu kaaniini wollaala ufiti murte.

¹⁴ Nu ch'ufti indoona, akuma bisaani lafati jissani ka dandaani wolti indeebine jirra. Waaqileeni nama due inkaasu, ammo hayyichi kara nama lafa d'ibiti baqateeni galchu ind'abu.

¹⁵ Duuba, ee hayyicha, wonti anini si argu d'ufeefi, biyyiti woi na sodaachimnani anini waan jed'e, Eegi, hayyuti himad'a hegeri inni waan anini fed'u fa naa tolcha.

¹⁶ Anini waan heregad'e aka atini na ch'aqafte namicha anaafi ilma kiyya ijeese lafa Waaqi gumi ufiti kenne keesaa nu baasu fed'u jalaa nu baafte.

¹⁷ Duuba anini waan jed'e, Dubbini hayyicha na baafti, wonti akanatiifi hayyichi aka malaika Waaqa jira, ka waan hamtufi dansa gargari beekhu. AABBO Waaqi kanke si woliini jiratinna!

¹⁸ Jennaani hayyichi waan jed'eeni, Anini waan toko si gaafad'a d'uga ch'allaa nati himi. Isiini waan jetteeni waan feetu na gaafad'i, ee hayyicha.

¹⁹ Jennaani hayyichi waan jed'eeni, Dubbi tana Yoabuti afaaniti si guure mo? Isiini waan jetteeni anini maqa keetiini kakhad'a, ee hayyicha, karaani tokoleeni ka anini gaafi tante ira goruni injiru. D'uguma, nami waan akana ch'ufa akana tahi, akana jed'i nani jed'e hojattu kanke Yoabu.

²⁰ Ammo inni akuma dubbi taanaani qajeelchufi akana tolchi nani jed'e, Ee aabbo, atini akuma malaika Waaqa qaro, waan lafa tana gubbati tahe ch'ufa imbeeta.

²¹ Eegi suni hayyichi waan Yoabuni jed'e, Waan atini feetu ya quufe, beeni gurba Absalomu jed'ani suni ga yaami, armaani kooti.

²² Yoabuni Daudi durati jige, eebisefi waan jed'e, Amma anini aka atini dubbi tiyya quufte ya beekhe, waan atini waan anini fed'u naa tolchiteefi.

²³ Jennaani inni kae Geshuri d'aqe Absalomuni fuud'e Yerusalemuni d'ufe.

²⁴ Ammo hayyichi waan jed'e, inni mana kiyya ind'ufini, anini isa argu infed'u, ha mana ufiti galuti. Tanaafi Absalomuni mana ufiti gale, deebie hayyu durati imulane, achuma tae.

Aka Absalomuni Daudini wolti araarsani

²⁵ Lafa Israeli ch'ufa keesa nami mid'aagumani gurra baafate ka aka Absalomuni jiru injiru; nafi isaa waan toko ka ira millatani inqabu.

²⁶ Rifeensi isaa gudda muumme inqamne, inni ganna ch'ufa keesa yoyu inni d'eerate ulfaatu ch'ira, rifeensi suni ka ch'irani, ulfiini isaa haga kilo lama biima hayyu ta gaafasi gula.

²⁷ Absalomuni ilmaani d'iira sadifi intala toko mid'aadu Tamari jed'ani qaba.

²⁸ Absalomuni ka hayyu inargini, ganna lama Yerusalemu keesa tae.

²⁹ Jennaani Yoabu yaame aka hayyuti ergu; ammo Yoabuni d'ufu dide. Ammalle inni maro lameeso yaamnaani d'ufu dide.

³⁰ Duuba Absalomuni waan hojattu isaatini jed'e, Oobruni Yoabu ta garbu d'aatu oobru tiyya jirti; beena, ibida iti kaya. Jennaani worri kae oobru suni ibida iti kaye.

³¹ Jennaani Yoabuni mana Absalomuni d'aqe waan jed'eeni, Hojattuuni tante maafi oobru tiyya gubdi?

³² Absalomuni waan jed'eeni, Waan anini si yaame jennaani atini d'ufu dideefi; wonti anini si yaamefi aka atini gara hayyu d'at'e, dubbi tana naa gaafate waan jettu: Anini maanifi Geshuri bahe arma d'ufe? Sila hojja anini achiti hafe ira naa jirti. Absalomuni waan jed'e, Anini hayyu argu fed'a, yo anini wollaala qabaad'e, ha na ijeesuti.

³³ Jennaani Yoabuni gara hayyu d'aqe dubbi suni iti hime. Hayyichi Absalomuni yaamnaani, inni d'ufe iti olseene durati jige, jennaani hayyichileeni isa d'ungate.