2 Samueli 12 - KITAABA WAAQA

¹ AABBO Waaqi raaga Nathani jed'ani Dauditi erge. Inni gara isaa d'ufe waan jed'eeni, Duri nama lamati jira, ka dira taka galu; toko dureesa, kaani hiyyeesa.

² Namichi dureesi sunini loonifi ree guddo qaba,

³ ammo hiyyeesi sunini ilme hoola toko bitate qaba; ta inni guddo qorqorate ilmaani ufi woliini guddise. Inni sagaluma ufi ta sooratu fa isii kenna, ammalle woma ufi keesa wo d'uguni isi gololche hampaare ufira teesise. Ilmeeni suni akuma intala inni d'ale isati jirti.

⁴ Guyya toko keessumichi toko worra namicha dureesa kaani d'ufe. Namichi dureesi kaani hori ufi qalu dide, d'aqe ilme namicha hiyyeesa kaani fuud'e qale keessumicha nyaachise jed'e akana mammaakhe.

⁵ Daudini aka male namicha dureesa kaaniti dallane waan jed'e, Anini maqa AABBO Waaqatini kakhad'a, aka nami waan akana tahe duu male!

⁶ Worri inni naasu male waan akana tolcheefi ree afuri d'ibi fulla kaufi male.

⁷ Jennaani Nathanini waan Daudini jed'e, Nami suni siuma. Tuleeni waan AABBOONI Waaqi Israeli jed'e, Anini si muude, hayyu Israeli si tolche, harka Saulo keesaa si baase.

⁸ Anini worra Isaatiifi nad'eeni isaale ch'ufa sii kenne, hayyu Israelitiifi ka Yuda si tolche. Ato wonti kunini si gahu baate anini sila hagasi lama sii kenna.

⁹ Atini maani duuba dubbi tiyya lakifte, waan hamtu anini infeene kana tata? Atini Uria woraanati geesite worra Amoni isa ijeesifte, niiti isaale fud'ate!

¹⁰ Duuba tanaafi amma armaa achi woraani worraa keesani keesa imbahu, waan atini na tufate dubbi tiyya lakifte niiti Uria fud'ateefi.

¹¹ Anini worruma kanke keesa nama si balleesu sitiini d'ufa. Gaafa anini nad'eeni tante siraa fuud'e namaa kennu waan suni agarta; duuba nami suni akuma atini agartu guyya gudda nad'eeni teetiini rafa.

¹² Atini waan kana d'ossaani tolchite, ammo anini guyyuma guddaani, ka worri. Israeli ch'ufti argu, tolcha.

¹³ Jennaani Daudini waan Nathanini jed'e, Anini yayu AABBO Waaqa ch'ubbame. Nathanini waan jed'eeni, AABBO Waaqi yayu si araarame, amma indootu.

¹⁴ Ammo maro atini kara kanaani AABBO Waaqa akana tufateefi, ilmeeni atini d'alte indooti.

¹⁵ Dubbi suni bufanani Nathanini kae worra ufiti gale. AABBO Waaqi daima niitiini Uria Daudi d'alte kaani fayya d'owe.

Duisa ilma Daudi

¹⁶ Daudini Waaqa kad'ate, aka daima suni fayyu. Inni sagale nyaachu dide, halkani ch'ufa mana ufi keesa sire lakise lafa rafe.

¹⁷ Jaaroleeni worra isaani gara isa d'at'e kai jennaani, inkau jed'e, sagalele worra woliini nyaachu dide.

¹⁸ Guyya torbeeso daimi sunini due jennaani hojattuuni Daudi sodaa isati himu dad'abde waan jed'ani, Daudini gaafa gurbaani jiru nu jala indubbatu, duuba nu akami amma dandeenne, ilmi kanke ya due jenne iti himna? Inni hegeri ufi fa ijeesa!

¹⁹ Daudini aka worri wolti hasasu arginaani aka gurbaani due hubate, Gurbaani ya due? jed'e gaafate. Ee, yayu due jed'aniini.

²⁰ Daudini kae bisaani nafa d'iqate, mata filate woya d'ibi keeyate Mana Waaqa d'aqe, AABBO Waaqa kad'ate. Jennaani mana ufiti deebie, sagale nati kenna jed'e, akuma iti kennaniini nyaate hobaase.

²¹ Hojattuuni isaa waan jetteeni, Gaafa gurbaani jiru boote sagale nyaachu didde, ammo akuma inni dueni lafaa kaate sagale nyaate; nu waan kanke yayu hubachu dad'amne.

²² Daudini waan jed'e, Wonti gaafa gurbaani jiru anini bohe sagale nyaachu dideefi, waan AABBO Waaqi hegeri naa nahe gurba suni duu d'owu sehe.

²³ Ammo amma inni yayu due anini maanifi ufi agabsa? Anini amma dandae gurba kaani inkaasa? Yo guyyaani kiyya gahe anati gara isaa d'aqa male, inni dandae nati indeebiu.

D'aloota Solomoni

²⁴ Jennaani Daudini niiti ufi Bathsheba garaa jabeese bira rafe. Eegi suni ilma deete, ilma suni Daudini Solomoni jed'e mogaase. AABBO Waaqileeni gurba suni jaalate.

²⁵ Raaga Nathani jed'ani kaani erge, maqa gurba suni Yededia baasi jed'eeni, waan AABBO Waaqi isa jaalateefi.

Aka Daudini dira Raba dabsate

²⁶ Gaafasi Yoabuni dira gudda Amoni ka Raba jed'ani had'e dabsachu gahe jennaani.

²⁷ Inni qonqo Dauditi erge waan jed'eeni, Anini yayu Raba had'e dabsad'e madda worrale fud'ad'e.

²⁸ Amma waan taatu, askarti tante ch'ufa wolti baasi, dira suni had'i fud'ad'i. Anini ufi gurrani argachu infed'u.

²⁹ Jennaani Daudini askarti isaa wolti baase Raba d'aqe had'e dabsate.

³⁰ Achiti waaqa worra suni ka Milkomo jed'ani sure worqi ta ulfiini isi kilo sodomi shani, ta d'akha ch'ululuqaani ch'okhani iraa fuud'e. Daudini d'akha suni fuud'e mata ufi ira keeyate. Ammalle waan heddu dira suni keesaa boojie.

³¹ Worra dira sule sibiila woini ch'iranifi, jembeefi d'agara iti kenne irreeni hojachise d'oqe supa matofaara mid'aasa jed'eeni inni worra Amoni ka dira d'ibi keesa jirule akasuma tolche. Duuba isaafi askartini isaa taani ch'ufti Yerusalemuti dachaani.