2 Korintho 8 - KITAABA WAAQA

¹ Oboleyaani, nu waan eebiti Waaqa gumi Makedoniati tolchite isani beesisu feena.

² Gaargali worri argate guddo worra ilaalate; ammo guddo gammadani arjoomaani namaa wo kennani, ato hiyyeeyi tahanile.

³ Waan anini isaniti himu, haguma dandaani kennani, ammalle waan suni ira;

⁴ worri fed'i ufitiini aka gumi Yudea qarqaarani guddo nu kad'ate.

⁵ Nu waan worri waan kana tolchu inseene! Qaraa fiit'e Aabbo ufi kennani; lameesole, fed'i Waaqa gula nule ufi kennani.

⁶ Tanaafi nu Tito, ka huji tana iti keyate, kad'anne, aka inni dura dabre isani qarqaare huji jaalala tana woliini hobaaftani.

⁷ Isani waan qabdani ch'ufa keesa guddo dureeyi: d'ugefachaafi hasaafi hubachaafi qarqaarsa aka ch'ufatiifi jaalala teenna keesaleti. Tanaafi nu isani kad'anna, aka huji jaalala tana keesaleti jabaattani.

Akheekha Yeso

⁸ Anini seera isanii tolchuuti injiru. Ammo haga biyyiti d'ibiini qarqaaru feete isani agarsiise, duuba aka jaalalti teesani ta d'uga argu fed'a.

⁹ Isani eeba Aabbo keenna Yeso Kristo imbeetani: inni dureesa, ammo maro teesaniifi ufi hiyyoomse, aka hiyyuma ufitiini isani duroomsu.

¹⁰ Waan kana anini akana herega: sila ira isanii goomti yo waan ganna dabre iti keyatani hobaaftani. Isani worra qaraa ka waan kana tolche; suni ch'allaaniti, ammo isani worruma qara ka fed'i ufitiini waan kana tolchu fed'e.

¹¹ Dura deema hobaasa! Jabaad'a, aka akuma iti keyattani hobaaftani, ammalle waan qabdaniini hobaasa.

¹² Yo isani guddo wo kennu feetani, Waaqi waan isani qabdani ka isani baaftani fud'ata, waan isani inqamne imbarbaadu.

^13-14 Anini baa ulfo nama d'ibi iraa fuud'e isani ira kayuuti injiru; ammo waan isani amma guddo wo qabdaniifi nama gaargala qabu qarqaaru maltani. Yoosi gaafa isani gaargala qabdani ammo worri waan guddo qabu worrileeni isani qarqaara. Kara kanaani nama ch'ufa wolqitt'eesani.

¹⁵ Akuma t'aafiini jettu, Nami nama ch'ufa ira guurate guddo inqabu arge, ammo ka diqo guurate guddo qaba arge.

D'ufisa Titofa

¹⁶ Nu guddo galata Waaqaa deebimna ka Tito aka nu isani qarqaarre isani qarqaarsiise!

¹⁷ Inni waan nu isa kad'anne ch'alla ee injenne; ammo ufi baase, aka gara keesani deemu heregate.

¹⁸ Isa woliini oboleesa gumiini ch'ufti saade aka inni Odu Dansa odeesu beetu ergina.

¹⁹ Suni malele, gumiini isa fohate, aka inni haga nu huji jaalala ta guddinna Aabbo hojanne nama qarqaarru nu woliini deemu.

²⁰ Nu guddo ufi qorqoranna, aka nami tokoleeni haga nu hori baasani kana harkaa qamnu nu inhimanne.

²¹ Nu waan qajeela fuula Waaqa dura ch'allaaniti ammo fuula namale durati tolchu feena.

²² Tanaafi nu oboleesa keenna worra woliini ergine; nu ya maro heddu isa ilaalanne, aka inni hojja ch'ufa aka nama qarqaaru kurfo jiru argine. Amma maro inni guddo isani d'ugefatuufi haga qarale ira kurfo jira aka isani qarqaaru.

²³ Yo isani waan Tito d'agayu feetani, inni wahela kiyya, ka na woliini hojatu, aka isani qarqaaru; ammo oboleyaani d'ibi ta isa woliini deemtu gumiti fohate, isiileeni Kristo guddifti.

²⁴ Jaalala teesani worra agarsiisa, aka gumiini ch'ufti quufte, aka wonti nu ufi guddimnuufi ch'ufti d'uga agartu.