2 Korintho 5 - KITAABA WAAQA

¹ Nu imbeenna aka yo waaro nu keesa teennu tana tarsaasani — waarooni tuni nafa keenna — Waaqi mana nu keesa teennu nu mid'aasa, mana inni harka ufitiini mid'aasu, ka haga hegeri tau.

² Amma guddo lalefanna waan worra keenna ka gubba jiru iti galu feenuufi;

³ wonti akasitiifi yo nu worra suni iti galle nama alati galu imfakaannu.

⁴ Haga nafa keenna kana qamnu aka nama gaargalchani lalefanna; nu nafa keenna injibinu, ammo nafa gubbaa fed'achu feena, aka jireenni waan dua dabsatu.

⁵ Waaqati waan kanaafi nu kurfeese, duuba inni Lubbu ufi nuu kenne, aka qabdo nuu taatu.

⁶ Tanaafi nu hojja tokole insodaannu. Nu imbeenna aka haga nu nafaani jirru nu mana Aabbo ira fago jirru.

⁷ Wonti akanatiifi jireenni keenna waan d'ugefachaati, waan ilaani arganiiniti.

⁸ Nu insodaannu, worra keenna nafa kanaani biraa yaane Aabbo woliini sila tau feena.

⁹ Waan ch'ufa ira nu isa gammachiisu feena, worra keenna kana keesafi achileti.

¹⁰ Nuuni ch'ufti Kristo dura eju malle, aka inni dubbi teenna qore, nami ch'ufti waan argachu male argatu, waan inni nafaani tolche gula, hamtuufi dansale.

Maro Kristotiifi Waaqaani wolti araaramani

¹¹ Nu aka Aabbo sodaachu malani imbeenna, tanaafi biyya garsiimna. Waaqi nu beekha, anileeni waan isanileeni guddo na beetani seha.

¹² Nu ammalle isani durati ufi d'ugeesu imfeenu; ammo waan isani maro teennaafi ufi guddisu maltanifi isaniti himna, aka isani worra nafa hameennatifi ufi koorsu ka ammo adaba hameennatifi ufi inkoorsine woi iti himatani.

¹³ Yo nu maraannele maro Waaqatiifi maraanna. Yo fayya qabaanele maro teesaniifi fayya horanna.

¹⁴ Jaalala Kristoni nu jaalatuuti nu mitisa, amma aka nami toko maro nama ch'ufatiifi due imbeenna, akasi jechaani nami ch'ufti ya due jechu.

¹⁵ Wonti inni nama ch'ufaa duefi aka nami tokoleeni ufiifi injiraanne, ammo maro nama due duisa keesaa kaasaniifi jiraatu.

¹⁶ Nu armaa achi aada nama gula nama tokole inqorru. Yo duri aada nama gula Kristo qorrele, armaa achi intolchinu.

¹⁷ Yo nami Kristoni taka tahe inni uumama haraa: wonti dullatiini ya dabarte, hareetiini ya d'ufte.

¹⁸ Waan kana ch'ufa Waaqati nu tolche, ka maro Kristotiifi wolti nu araarse, Beena, nama wolti araarsa nuuni jed'e.

¹⁹ D'aamsi keenna aka Waaqi Kristo keesa nama ufiti araarsu. Waaqi daba worrati int'aamne, ammalle ya d'aamsa nagaya kana harka keennati kenne.

²⁰ Kuno, nu teenne maro Kristotiifi dubbanna, aka waan Waaqi afaani keenna tahe isaniti dubbatu: maro Kristotiifi isani kad'anna, Waaqaani wolti araarama.

²¹ Kristoni daba inqabu, ammo Waaqi maro teennaafi isaa daba tolche aka nu maro Kristotiifi d'uga Waaqa argannu.