2 Hayyoota 5 - KITAABA WAAQA

¹ Namicha gudda askarti Shamu, ka Naamani jed'ani, toko jira, ka hayyuuni Shamu guddo d'ugeefate ulfeese, wonti akanatiifi AABBO Waaqi maro Naamanitifi askarti Shamu nyaapa dabsachiise. Inni nama jaba janna toko, ammo d'ukuba hama aka qomaat'a qaba.

² Askartini Shamu, gaafa Israeli haate toko, intala diqo toko boojite; intalti sunini eege hojattu niiti Naamani taate.

³ Guyya toko isiini waan niiti Naamanitini jette, Sila, ato tiyya, abbaani kiyya raaga Samaria tau d'aqa aka inni isa fayyisu.

⁴ Naamanini dubbi tana d'agaye jennaani, gara hayyu d'aqe waan jed'eeni, Intalti worra Israeliti d'ufte taani akana nani jette.

⁵ Hayyuuni Shamu waan jed'eeni, Tatabe tana fuud'i, gara hayyu Israeli geesi. Jennaani Naamanini kae, qarsi kuma sodomatifi worqi kuma jaatiifi woya kud'ani, ta jilaani tolfatani, fuud'e, iti d'aabate.

⁶ Tatabe inni deemuni taani waan kana keesati t'aafani. Nami tatabe tanani deemu Naamani, gudda askarti tiyya. Anini sii isa d'ukuba fayyiftu fed'a.

⁷ Hayyichi Israeli tatabe suni soome jennaani laalefate, woya tatarsaase waan jed'e, Hayyichi Shamu akami nama kana fayyisi nani jed'a? Inni Waaqa na seha, ka nama ijeese yokhaani jireesu? Wonti kunini aka inni dubbi naraa barbaadu diiduma keesa garsiifti.

⁸ Elishani waan hayyuuni tahe d'agaye jennaani, qonqo gara isaa erge waan jed'eeni, Atini maanifi akana laalefate woya tante tarsaafta? Namicha gara kiyya ergi, ha aka raagi Israeli keesa jiru, naraa baratu.

⁹ Jennaani Naamanini fardooleefi gaari isatini d'ufe balbala mana Elisha dura ejate.

¹⁰ Elishani nama iti erge waan jed'eeni, Beeni, galaana Yordani keesati maro torba nafa d'iqad'i.

¹¹ Ammo Naamanini dallane, kae biraa deeme, waan jed'e, Anini waan inni qara gabahe AABBO Waaqa isaa naa yaamate, harka isa mada tiyya ira qabe na fayyisu sehe!

¹² Galaani Abanatifi Faparini, ka lafa Damaski, galaana Israeli ch'ufa ira injiru? Anini suni d'aqe qulqullo intahu?

¹³ Ammo hojattuuni isaa gara isa d'at'e waan jetteeni, Aabbo, ato sila raagi waan jabdu tolchi sini jed'e inuma tolchita. Atini amma maafi dubbi isaa didde, nafa diqate infayyine?

¹⁴ Duuba Naamanini galaana Yordani d'aqe akuma Elishani jed'eeni kaani maro torba diqate fayye. Nafi isa qulqullae, mid'aage, nafa daima tahe.

¹⁵ Inni jara isaa ch'ufa woliini gara Elisha deebie waan jed'eeni, Amma anini ya beekhe, aka Israeli keesa male Waaqi fulla d'ibi injirre; tanaafi amma, aabbo, waan anini sii d'ufeeni kana nara fud'ad'i.

¹⁶ Elishani waan jed'eeni, Maqa AABBO Waaqa anini hojad'uni kakhad'a, aka anini woma sira infud'anne. Naamanini guddo iti d'owe ammo inni fud'achu dide.

¹⁷ Jennaani Naamanini waan jed'eeni, Yo atini fud'achu didde, biyye gaangeleni lama dandeete baatu, ta anini galad'uni naa kenni; wonti akanatiifi anini armaa achi deebie, waan Waaqa baasanifi sorio gubanile AABBO Waaqa male nama d'ibi imbaasu.

¹⁸ Ammo yo anini hayyu kiyya gula deeme mana Rimoni waaqa lafa Shamu kad'ad'u AABBO Waaqi ha naa araaramu, Waaqi naa araaramina.

¹⁹ Elishani waan jed'eeni, Beeni, nagayaani gali, jennaani Naamanini kae iti d'aabate. Inni diqo deeme

²⁰ Jennaani Gehazini, hojattuuni Elisha, waan ufiini jed'e, Badi Abbaani kiyya yayu namicha Naamani jed'ani kana ka woma iraa infud'atini gad'iise! Inni sila waan namichi Shamu suni isaa kenne iraa fud'achu male. Waaqi na ijeesinna, yo anini hordofe waan suni ira inguuratini.

²¹ Duuba inni kae Naamani hordofe. Naamani nama isa gula utaalu arge jennaani, gaari iraa bue, fuula keesa deebie waan jed'eeni, Isi abbo, maani? Lafti naguma?

²² Ee naguma, ammo abbaani kiyya na erge waan nani jed'e, Keessumaani lama ta gumi raagoota ta gaareeni Efraimu teetu amuma tana nati d'ufte; tanaafi qarsi kuma saditifi woya jilaani tolfatani taani lama keesa naa kenni.

²³ Naamani waan jed'eeni, Hagasiniti, qarsi kuma jaa fud'ad'i, inni iti d'owe, qarsi suni subba lamati naqeefi, subba suni woya jilaani tolfatani taani lamaani woliini hojattu isaa nama lamati kenne, Gehazi dura erge.

²⁴ Worri gaara Elishani gubaati galu kaani gahe, jennaani Gehazini subba lamaani suni worra iraa fuud'e manati galfate, hojattu Naamani taani ufiraa galche.

²⁵ Duuba inni manati deebie jennaani Elishani, atini eesaa d'ufte? jed'e gaafate. Inni waan jed'eeni, Aabbo, anini garuyu ingalle.

²⁶ Ammo Elishani waan jed'eeni, Hojja namichi gaari isaa iraa bue fuula keesa si d'ufe, anini herega garaa kiyyatini si inagarre? Hojaani tunini hojja nami beesefi woyaafi, d'ad'afi zabibufi reefi loonifi hojattu nama iraa fud'atuniti.

²⁷ Amma tana d'ukubi Naamani kaani si qabate, haguma jiru siifi d'aloota keetile iraa imbahu. Akuma Gehazini isa biraa deemeni d'ukubu sunini isa qabate nafi isaa aka daara addaate.