2 Hayyoota 25 - KITAABA WAAQA

¹ Sedekiani hayyu Nebukadreza ka Babiloniti gargale jennaani, hayyu Nebukadrezani askarti isaa ch'ufaani d'ufe, guyya kud'anneeso ka jia kud'anneeso, ganna sagaleeso, ka Sedekiani lafa mohate keesa Yerusalemu had'u d'aqe, d'aatu isiiti qubate boola qote marseeni,

² haga ganna kud'ani tokeeso ka Sedekiani lafa mohate artuma tae had'e.

³ Guyya sagaleeso, ka jia afreeso ka ganna suni, beelti dira suni keesati guddatte,

⁴ nami sagale nyaatule d'abe, naabo dira sunile ch'absani. Ato worri Babiloni dira suni marsele askartini ch'ufti halkaniini fullo naabo lamaani jiddu jirtu, ta d'aatu oobru hayyuutini baqatte gara bale Yordani iti d'aabatte.

⁵ Ammo askartini Babiloni hayyu Sedekia reebde diida Yerikoti d'aqabde jennaani askartini isaa ch'ufti biraa baqatte.

⁶ Duuba isa qabani hayyu Babiloni ka Ribla jiruti geesani, achiti hayyu Nebukadrezani ijeecha iti mure.

⁷ Ilmaani isaa ila isaa durati fit'ani isale ila keesa guurani sansalatani hid'ani Babiloni geesani.

Aka Mana Waaqa gubani

⁸ Guyya torbeeso ka jia shaneeso, ganna kud'ani sagaleeso ka Nebukadrezani hayyu Babiloni lafa mohate Nebuzaradanini ka makala hayyu, ka ammalle inni gudda askarti isaa, Yerusalemu d'ufe.

⁹ Inni Mana Waaqatifi mana hayyuutifi maneeni nama gugurda ka Yerusalemu ch'ufa gube,

¹⁰ askartini isaleeni naabo diraani marsani jaarani ch'ufa ch'ach'absite.

¹¹ Duuba Nebuzaradani worra dira Yerusalemu keesati hafefi hogeeyiifi nama worra isaani lakise hayyu Babiloniti baqate fuud'e Babilonitini gale.

¹² Ammo inni hiyyeeyi woma inqamne lafa Yudati lakise, aka worri zabibu tisse oobrule qotu.

¹³ Worri Babiloni utuba sibiila diimani mid'aasanifi waan gaari fakaata ka Mana Waaqa keesa jiru ch'ufafi haro gingiti sibiila diimani mid'aasanile ch'ufa ch'abse, sibiila diima ch'ufa lafa Babiloniti geese.

¹⁴ Ammalle worri daboolafi eele daara iti haranifi miha ifseeni qorqoratanifi qori d'iiga sorio iti naqanifi qori hit'aana iti aarsanifi miha Mana Waaqatini hojattani, ka sibiila diimani mid'aasani ch'ufa, itiini d'aabatani.

¹⁵ Ammalle worri waan worqifi qarsiini mid'aasanifi qori didiqofi daboolaa ch'ile ibidatini fuud'anile, ch'ufa fuud'ani itiini d'aabatani.

¹⁶ Miha Solomonini sibiila diimani Mana Waaqaati mid'aase utuba lamaanifi waan aka gaari kaanifi haro gingitini taanile dandaani ulfinna isii imbiimani.

¹⁷ Utubaani lamaani haguma taka: old'eerinni isaa d'und'uma kud'ani saddeeti, ka kamu waan aka sure ta d'und'uma sadii sibiila diimani mid'aasani mata gubba kayani. Waan aka sure suni ch'ufa looti sibiila diimani mid'aasani marsani, waan aka okhoku ka sibiila diimani mid'aasanini ch'okhaani.

Aka worra Yuda Babiloni geesani

¹⁸ Tana male Nebuzaradanini ka gudda askarti, qaallicha gudda Seraya jed'anifi, Sefania ka isati aanufi ammalle jara gugurda Mana Waaqa keesa hojattu, nama sadi qaqabe Babiloni geese.

¹⁹ Dira keesa, inni nama askarti ch'ufaa matatifi, nama shani ka makala hayyu, ka dira keesati hafefi namicha nama askartii matati aanu, ka waan askarti lafa suni ch'ufa t'aafufi ammalle nama jaatama d'ibi ka gurra qabu ch'ufa woliini qabe geese.

²⁰ Nebuzaradanini, ka gudda askarti, worra kana ch'ufa guure, hayyu Babiloni, ka Ribla jiruti, geese.

²¹ Achiti lafa Hamathiti hayyicha worra d'aane lubbule fit'e. Duuba akanaani worra Yuda lafa worra keesaa boojiani lafa d'ibi geesani.

Gudda lafa Yuda ka Gedalia jed'ani

²² Hayyuuni Babiloni, ka Nebukadreza jed'ani, Gedalia, ilma Ahikamu, ka akhaakhu Shafani, gudda lafa Yuda tolche, ammalle worra Yudati hafe, ka Babiloni ingeesini, kaani mata iti tolche.

²³ Worri askarti Yudati matatifi askartini worra, ta harka inkennatini, waan kana d'ageete jennaani, Mispati goli Gedaliati daramani. Maqaani worra gugurda suni kana: Ishmaeli ilma Nethania, Yohana ilma Karea, Seraya ilma Tanhumethi, ka dira Netafa, ammalle Yezania ilma Maaka.

²⁴ Gedaliani worrati kakhate waan jed'e, Wonti isani worra Babiloni iraa d'eetani injirtu, lafa tanati qubad'a, hayyu Babiloniti hojad'a, akanaani bulti argattani.

²⁵ Ammo jia torbeeso, ganna suni keesa, Ishmaeli ilmi Nethania, ka akhaakhu Elishana, ka fiit'a hayyu nama kud'ani fud'ate Mispa d'aqe, Gedaliafi worra Israelitiifi ka Babiloni ka isa woliini jirule had'e ijeese.

²⁶ Jennaani worri Israeli, dureeyyiifi, hiyyeeyifi worri askartiti mataa woliini kaani; maro worra Babiloni sodaatanifi lafa Misiri d'aqani.

Aka Yekonia mana hid'ansa keesaa gallakisani

²⁷ Ganna sodomi torbeeso ka Yekoniani hayyu Yuda boojiani, guyya diddami torbeeso ka jia kud'ani lameeso, Evil-Merodakini hayyu Babiloni tahe, Yekonia hayyu Yudati nahe hid'aansa keesa baase.

²⁸ Inni Yekonia dubbi dansa iti dubbate, hayyoota isa woliini boojiani taani ch'ufa iraa ulfeese.

²⁹ Tanaafi Yekoniani woya gaafa isa hid'ani keeyachiisani taani jijirate haga jiru ch'ufa mana hayyu keesa hayyu woliini sagale nyaate.

³⁰ Haga inni jiru guyya ch'ufa beese waan isaa male kennaniifi.