2 Hayyoota 23 - KITAABA WAAQA

¹ Hayyu Yosiani jaarole gugurdo Yudatifi ta Yerusalemutifi

² qaaloleefi raaga, ammalle nama d'ibi dureesafi hiyyeesale ch'ufa wolti yaame, worri ch'ufti woliini gara Mana Waaqa d'aqe, duuba hayyuuni gumi ch'ufa dura eje, lalabe, kitaaba wold'aqisa ka Mana Waaqa keesati argani soomeefi.

³ Inni d'aatu utuba hayyu eje, wold'aqisa AABBO Waaqa woliini tolfate, aka Waaqa gula deeme, seerafi aadaafi waan inni fed'u ch'ufa garaafi qalbi isaatini tolchu, aka taka tana dubbi kitaaba wold'aqisa keesati t'aafani guutu. Duuba nami ch'ufti aka wold'aqisa kana jabeese guutu kakhate.

⁴ Jennaani hayyu Yosiani qaallichu gudda Hilkia jed'anifi qaalole isa jala hojattufi ammalle nama fullo Mana Waaqa eegu erge, aka worri miha Baalifi waaqa Ashera jed'anifi urjileeni kad'atani ch'ufa Mana Waaqa keesaa alati baasani. Hayyuuni waan kana ch'ufa dira keesa baase, d'aatu laga Kidroniti gube, duuba daara isiile Betheliti geese.

⁵ Inni qaalole duri hayyuuni Yuda muude huji sorio waaqa d'araati hojattani dira Yudatifi lafa d'aatu Yerusalemule iti kenne ch'ufa huji suni keesaa yaase — qaalole ta Baalifi aduufi jiaafi urjiifi Bakalchale sorio baafte.

⁶ Inni akheekha waaqa Ashera jed'anile Mana Waaqa keesa fuud'e, dira keesa alati baase, laga Kidroni keesati gube, d'ukeese d'uke sunile lafa nama iti awaalaniti firfirse.

⁷ Ammalle mana nad'eeni sharmut'i iti galtu ka d'aatu Mana Waaqa balleese. (Artiti nad'eeni woya waaqa Ashera jed'aniini kad'atani hod'ite mid'aasiti.)

⁸ Inni qaalole dira Yuda keesa jirtu ch'ufa Yerusalemutini d'ufe, duuba fulla sorio Waaqa d'ara iti baasani ta lafa suni ch'ufa keesa jirtu yake t'ureese, ammalle fulla waaqa d'ara iti kad'atani ta harka bita, d'aatu fullo Yoshuani guddaani dira suni jaarellee ch'ach'abse.

⁹ Qaalole suni Mana Waaqa keesa hojachu d'owani, ammo akuma qaalole taani d'ibi qit'a bukho inqamne nyaati.

¹⁰ Hayyu Yosiani ammalle fulla waaqa d'ara iti kad'atani ta Tofethi jed'ani, ta bale Hinomu keesa, ch'ach'abse, aka, nami tokoleeni ilma isaa yokhaani intala isaa aka sorio gubani waaqa Moleki jed'ani imbaamne.

¹¹ Ammalle fardoole hayyooti Yuda huji kad'acha aduti jette baafte achi balleese, gaari huji suni baasanile ch'ufa gube. (Wonti kuni Manuma Waaqa d'aatu fulla fullo ta d'aatu mana Nathan-Meleki jaallabi guddaani iti galu, jirti.)

¹² Fulla waaqa d'araati sorio irati baasani, ta gubbaa mana Ahazi, ta hayyooti Yuda mid'aasiteefi ammalle fulla waaqa d'araati sorio irati baasani ta Manaseeni ballinna Mana Waaqa gama lachutu jaare ch'ufa, gadi hirkise ch'ach'abse bulleese, bulla haftele bale Kidroni keesati jisse.

¹³ Hayyu Yosiani fulla sorio irati baasani, ta hayyu Solomonini gaara ejersaatini bitaa Yerusalemu ilaboruti jaare aka waaqa d'ara ka Ashtorethifi waaqa Sidonitifi Kemoshi waaqa Moabutifi Milkomu waaqa Amoni iti kad'attani t'ureese balleese.

¹⁴ Hayyu Yosiani d'akha aka utuba old'ad'aabani kaani ch'ach'abse bulleese, akheekha waaqa Ashtorethi jed'ani kaani ch'ire duuba fulla akheekhi kunini qara jiru kaani lafele namaatiini guute.

¹⁵ Yosiani ammalle fulla waaqa d'ara iti kad'atani, ta hayyu Yeroboamu, ilmi Nabathi, Betheliti jaare akasiini worra Israeli ch'ubbu keesa buuse kaani ch'ach'abse. Yosiani ammalle fulla suni buqise, d'akha jaaranini ch'ach'abse bulleese, tume d'ukeese; ammalle akheekha Asherale fuud'e gube.

¹⁶ Eege Yosiani ufi d'aatu laale, awaala kubi gubaati arge. Jennaani nama yaame, lafe keesaa guura jed'eeni, lafele suni fulla sorio irati baasani gubbati gube. Akanaani fulla suni yake t'ureese. Duuba inni fulla suni t'ureese, akasiini dubbi raagi duri, gaafa jila, ka hayyu Yeroboamuni fulla suni d'aatu eju jed'e taani guute.

¹⁷ Jennaani hayyuuni Irreesa sunini ka eenu jed'e gaafate? Worri Betheli waan jed'eeni Irreesi sunini ka raaga Yudea d'ufe, waan atini fulla sorio irati baasani tana tolchite kana fage.

¹⁸ Hayyu Yosiani waan jed'e, Akasumati lakisa lafe isaa tokole intuqina. Tanaafi lafe isaatiifi ta raaga Samaria d'ufele tokole awaala keesaa infuud'ini.

¹⁹ Dira Israeli ch'ufa keesa hayyu Yosiani fulla sorio iti baasani waaqa dara iti kad'atani ch'ufa, ta hayyooti Israeli jaarte akanaani AABBO Waaqa dallansiifte, ch'ach'abse. Fulla sorio iti baasani tana ch'ufa, akuma Betheliti tolche kaani, tolche.

²⁰ Inni qaalole waaqa d'ara taani ch'ufa fulla sorio iti baasani, ta isiini hojattu irati fit'e, duuba lafele nama fulla sorio irati baasani suni ch'ufa gubbati gube; eege Yerusalemuti deebie.

Aka Yosiani jila Pasaka tolche

²¹ Hayyu Yosiani seera baase aka nami ch'ufti jila Pasaka tana jabeese, AABBO Waaqa guddisu, akuma kitaaba wold'aqisa keesati t'aafani kaani.

²² Takuma hayyuuni tokoleeni ka Israeli yokhaani ka Yudaleeni jila Pasaka ta akasi intolchine haga jaallabooti lafa mohate asi.

²³ Ammo amma eege ganna kud'ani saddeeteeso ka hayyu Yosiani lafa mohate keesa, biyyiti jila Pasaka Yerusalemu keesa gammadaani tolfate.

Jijirama d'ibi ka Yosiani d'ufeeni

²⁴ Ammalle Yosiani falfaltuufi worra ayyaanatifi ammalle akheekha waan aka Mana Waaqa keesati kad'attani ch'ufa Yudafi Yerusalemu keesa balleese, aka akanaani t'aafi kitaaba qaallicha Hilkia jed'ani, Mana Waaqa keesati arge kaani keesa jirtu guutufi tolche.

²⁵ Isa durati yokhaani eegi isaale hayyuuni aka Yosia AABBO Waaqa garaafi qalbiifi irreeni hojate Seera Musa ch'ufa guute, tokoleeni injiru.

²⁶ Ammo AABBO Waaqa dallansuuni inni waan Manaseeni tolche gula worra Yudati dallane taani diqole iraa ingalle.

²⁷ Jennaani AABBO Waaqi waan jed'e, Akuma qara Israeli gusse Yudale fuula kiyya duraa gussa. Ammalle Yerusalemu dira anini fohad'eefi mana kiyya ka anini maqaani kiyya ha keesa jiraatu jed'elle imballeesa.

Waan eege ka Yosiani tolche

²⁸ Waan eege Yosiani tolche ch'ufa kitaaba Odu Hayyoota Yuda keesati t'aafaniti t'aafani.

²⁹ Gaafa Yosiani hayyuma harkaa qabu suni, hayyuuni Neko jed'ani, ka lafa Misiri, askarti isaa fud'ate galaana Frati taake hayyu Ashuru qarqaaru d'aqe. Jennaani hayyu Yosiani askarti Misiri fuula keesa deeme Megidoti had'e, had'iisa suni keesati due.

³⁰ Hojattuuni isaa reefa isaa gaari keesa keete Yerusalemu geesite, awaala qara isaa qotani keesati awaalte. Duuba worri Yuda Yoahazi, ilma Yosia, fohate muude fulla abba isaa hayyu tolfate.

Hayyu Yuda ka Yoahazi jed'ani

³¹ Ganni Yoahazi diddami sadi gaafa inni hayyu Yuda tahe ammalle inni Yerusalemu keesa jia sadi lafa mohate. Maqaani haad'a isaa Hamutali, ta dubra Yeremia, ka dira Libna.

³² Inni faani ababoota isaa gula bahe AABBO Waaqa durati ch'ubbame.

³³ Jennaani hayyuuni Misiri ka Neko jed'ani kaani isa qabe hid'e Ribla ta lafa Hamathiti geese akasiini inni hayyuma ufi d'abe. Ammalle inni worra Yuda qarsi kilo kuma saditifi d'ibba afuritiifi worqi kilo sodomi afuri baasisise.

³⁴ Hayyu Nekoni ilma Yosia, ka Eliakimu jed'ani fulla abba isaa hayyu Yuda tolche, maqa isaa Yehoiakimuti jijire. Hayyu Nekoni Yoahazi lafa Misiri geese, inni achiti due.

Hayyu Yuda ka Yehoiakimu jed'ani

³⁵ Hayyu Yehoiakimuni qabeenna nama gula damoosa nama iraa guure, aka hori hayyuuni Misiri fed'u kaani qit'eesu.

³⁶ Ganna Yehoiakimu diddami shani gaafi inni hayyu Yuda tahe, ammalle inni Yerusalemu keesa ganna kud'ani toko lafa mohate. Maqaani haad'a isaa Zebida isiini dubra Pedaya ka dira Ruma.

³⁷ Yehoiakimuni faana ababoota isa gula bahe, AABBO Waaqa durati ch'ubbu tolche.