2 Hayyoota 17 - KITAABA WAAQA

¹ Ganna kud'ani lameeso ka Ahazini hayyu Yuda tahe, Hosheani ilmi Eela hayyu Israeli tahe, ganna sagali Samaria keesa lafa mohate.

² Inni AABBO Waaqa durati ch'ubbu tolche, ammo tatule haga hayyoota isa durati Israeli mohate intolchine.

³ Hayyuuni Ashuru, ka Shalmanesa jed'ani d'ufe isa had'e; jennaani Hosheani isati harka kennate, ganna ch'ufa damoosa baaseefi.

⁴ Ammo ganna toko Hosheani qonqo gara hayyu Misiri, ka So jed'ani, erge, qarqaarsa kad'ate, damoosa duri gannati Ashuru baasu kaani baasu dide. Shalmanesani waan suni d'agaye jennaani Hoshea qabe, mana hid'aansa keesa buuse.

Aka dira Samaria dabsatani

⁵ Jennaani Shalmanesani lafa Israeli d'ufe had'e, dira Samaria marse. Ganna sadeeso ka dira suni marsani,

⁶ ka ammalle haga Hosheani lafa mohate ganna sagali, hayyuuni Ashuru dira Samaria dabsate, worra Israeli boojie, lafa Ashuru geese, ka gari dira Hala geese, ka gari d'aatu galaana Habori, ka lafa Gozani, geese, ka gari dira worra Medi geese achiti qubsise.

⁷ Wonti dira Samaria akasi taheefi waan worri Israeli AABBO Waaqa isaani, ka worra harka hayyu Misiritiifi lafa Misiri keesa baase durati, ch'ubbu tolcheefi. Worri waaqoota d'ibi kad'ate,

⁸ aada gosa AABBO Waaqi gumi ufi duraa gusse gula yae, aada hayyooti Israeli d'uftenile tolfate.

⁹ Worri Israeli waan hamtu AABBO Waaqi infane tolfate, fulla Waaqa d'ara iti kad'atu dira ch'ufa keesati jaarate, dira didiqafi gugurda ch'ufa keesale.

¹⁰ Gaareeni gubbafi mukeeni gaadisa gugurdo jalale ch'ufa, d'akhaa old'ad'aabani, akheekha Ashera mid'aafatani.

¹¹ Ammalle fulla waaqa d'ara iti kad'atani ch'ufati hit'aana aarsani, aada gosa AABBO Waaqi lafa keesaa gusse, gula yaani. Worri waan hamtu tolfate, waan sunini AABBO Waaqa dallansiise,

¹² seera AABBO Waaqa ka Waaqa harkaani boch'ani inkad'atiina jed'u, ch'abse.

¹³ AABBO Waaqi raaga erge, worra Israelitiifi ka Yuda gorse waan jed'e, Kara keesani hama kana iraa deebia, aada tiyya ta seera anini duri ababoota teesani kenne, eegi sunile raagoota tiyyaani isani barsiise, jabeesa guuta.

¹⁴ Ammo worri guutu dide, akuma ababooti worra ta duri mata jabaate AABBO Waaqa d'ugefachu didde taani.

¹⁵ Worri aada isaa gula yau dide, wold'aqisa inni ababoota worra woliini tolfate guutu dide, gorsa isale ch'aqasu dide. Worri waan woma imbaane, ka harkaani boch'ani, kad'ate ufile woma bahu dad'abe. Ammalle worri aada gosa d'aatu worra jirtu gula yae, dubbi AABBO Waaqi worra seere, aada suni gula iyyaaiina jed'eeni ch'abse.

¹⁶ Worri seera AABBO Waaqa isaani ch'ufa ch'abse, sibiila tume akheekha koromi lama mid'aafate; ammalle akheekha waaqa Ashera jed'ani mid'aafatani, urji kad'atani, waaqa Baali jed'ani hojatani.

¹⁷ Worri ilmaani ufi, ta d'iirafi dubra waaqa d'araati gube sorio baase falfatuufi nama wo himu wo gaafate, kara ch'ufaani waan hamtu Waaqi infeene tolfatani, duuba akasiini isa dallansiisani.

¹⁸ AABBO Waaqi aka hama worra Israeliti dallane, fuula ufi dura worra gusse, gosa Yuda ch'alla hambise.

¹⁹ Ammo worri Yudaleeni seera AABBO Waaqa isaani inguunne, ammo aada worri Israeli d'ufeeni gula yaani.

²⁰ AABBO Waaqi worra Israeli ch'ufa dide, worra gaargalche, harka nyaapa worraati worra kenne duuba eege akasiini fuula ufi dura worra balleese.

²¹ Eegi AABBO Waaqi worra Israelitiifi ka Yuda gargari baase, worri Israeli Yeroboamu ilma Nabathi hayyu tolfate. Yeroboamuni worra kara Waaqa iraa gorse ch'ubbu hamtu keesa buuse.

²² Worri faana Yeroboamu bahe, ch'ubbu inni tolche ch'ufa tolche.

²³ Duuba eege AABBO Waaqi fuula ufi duraa worra balleese akuma inni duri raagoota isatini jed'e. Duuba akanaani worra Israeli boojiani lafa Ashuru geesani haga arrale worri achuma jira.

Aka worri Ashuru lafa Israeli keesa qubate

²⁴ Hayyuuni Ashuru worra dira Babilonitifi Kuthatifi Avatifi Hamathifiti Sefarvaimu fuud'e, dira Samaria keesati qubsise, fulla qara worri Israeli ka boojiani jiru. Worri dira suni ch'ufa fud'ate keesa tae.

²⁵ Worri gaafa qara achi qubatani AABBO Waaqa insodaanne; tanaafi inni nyeench'a worra hobaasu iti erge.

²⁶ Jennaani waan hayyu Ashurutini jed'ani, Biyyiti dira Samaria keesa qubatu seera waaqa lafa suni imbeetu, tanaafi waaqi suni nyeench'a worra balleesa iti erge.

²⁷ Jennaani hayyuuni Ashuru waan jed'e, Qaalole nu boojine taani nama toko gadi deebisa; inni ha gale, achi tae, seera waaqa lafa suni biyya barsiisuti.

²⁸ Duuba akasiini qaallichi Israeli toko, ka qara Samaria keesaa boojiani, kae, Betheliti deebie, achi tae, aka AABBO Waaqa kad'atani biyya barsiise.

²⁹ Ammo worri dira Samaria sunini akuma kaani waan boch'ani waaqa tolfatani maneeni worri Israeli duri jaare keesa kayani, kad'atani. Gochiti ch'ufti, dira keesa teetu keesati, waan harkaani boch'ani waaqa tolfatte kad'atte:

³⁰ Worri Babiloni akheekha waaqa Sukoth-Benothi mid'aafate; worri Kutha ka Nergali mid'aafate; worri Hamathi ka Ashima mid'aafate;

³¹ worri Ari ka Nebhazitifi Tartaki mid'aafate; ammalle worri Safarvaimu ijoolle ufi waaqa Adrameleki jed'anifi Anameleki sorio gube baase.

³² Worri kunini ch'ufti AABBO Waaqale inuma kad'ata. Ammalle gosa ufi keesa namuma argani fohatani qaalole tolfatani, worri sunini fulla Waaqa d'araa suni iti kad'atani hojate, gumi ch'ufa jed'e sorio baase.

³³ Duuba worri AABBO Waaqale kad'ate, ammalle waaqa ufile kad'ate, aada lafa worri keesaa bahe gula.

³⁴ Haga arrale worri sunini aada suni guluma yaa. Worri AABBO Waaqa kad'ate, aadaafi seera inni duri d'aloota Yakobooti kenne (ka inni maqa duri Israeli baaseefi) gula iyyau.

³⁵ AABBO Waaqi duri wold'aqisa worra woliini tolfate waan jed'eeni; ana male waaqoota d'ibi inkad'atiina. Waaqoota suni durati gajettani inguddisina, yokhaani sorio imbaasinafi.

³⁶ Isani ana, AABBO Waaqa ka jabeennaafi irre ufitini lafa Misiri keesaa isani baase ch'aqasu maltani. Isani na durati gajettani, sorio naa baasu maltani.

³⁷ Isani hojja ch'ufa aadaafi seera anini isanii kenne guutu maltani. Isani waaqa d'ibi kad'achu himmalle,

³⁸ ammalle wold'aqisa anini isani woliini tolfad'e inded'ina.

³⁹ Isani ana, AABBO Waaqa keesani, ch'aqasu maltani, duuba anini harka nyaapa keesani keesaa isani baasa.

⁴⁰ Ammo tatule worri dubbi suni ch'aqasu dide, aada ufi ta duri taana iraa ingore, guluma yae.

⁴¹ Duuba akasiini worri sunini AABBO Waaqa kad'ate, ammalle waan harkaani boch'anile waaqa jed'e kad'ate; haga arrale d'alooti worraa akasuma tolcha.