2 Hayyoota 14 - KITAABA WAAQA

¹ Ganna lameeso ka Yehoashini, ilmi Yehoahazi, hayyu Israeli tahe Amaziani ilmi Yoashi, hayyu Yuda tahe.

² Gaafasi ganni isaa diddami shani, duuba inni ganna diddami sagali Yerusalemu keesa lafa mohate. Haad'a isa maqaani Yehoadani, ta worra Yerusalemu.

³ Inni waan dansaa tolche, AABBO Waaqa gammachiise, ammo tatule haga ababo isa Daudi ingeenne; waan ch'ufa inni akuma abba isa Yoashi tolche.

⁴ Inni fulla Waaqa d'ara iti kad'atani, ta gaareeni gubbaa tokole inch'absine; ammalle biyyiti artiti sorio baafte hit'aana aarsu illakimne.

⁵ Amaziani akuma hayyu tahe irre horateeni, jara abba isaa ijeese kaani fit'e.

⁶ Ammo tatule inni ijoolle worraa inhobaamne, akuma AABBO Waaqi Seera Musa keesati biyyati hime: Wollaala ijoolleeti jed'ani abba inijeesani ka abbaale jed'ani ijoolle inijeesani; nama wollaaluma inni tolche ch'allaani ijeesani.

⁷ Amaziani askarti Edomu, ta kuma kud'ani, Bale Sooda keesati fit'e. Ammalle dira Sela had'e dabsate, maqa Yoktheli baaseefi, diri sunini arrale maqa suni inuma qaba.

⁸ Jennaani Amaziani nama gara Yehoashi, hayyu Israeli, erge, kooti, woli haana jed'eeni.

⁹ Ammo Yehoashini qonqo iti deebise waan jed'e, Gaafa toko mukhi qoraati toko, ka gaara Lebanoni, qonqo mukha hind'eesa tokoti erge waan jed'e: Intala tante gurba kiyya kenni, ha fuud'uti. Jennaani bineensi toko mukha qoraati suni d'aatu bahe iti riiqate ch'ach'abse ira ejaanjate.

¹⁰ Amma tana Amazia, atini waan worra Edomu dabsateefi akana kiyyibda. Gurri sunini ya sii gahe, ufiraa tai; atini maanifi gaargala barbaadda, ka sifi worra kanke balleesu?

¹¹ Ammo Amaziani isa ch'aqasu dide, tanaafi Yehoashi, hayyuuni Israeli, askarti ufi fud'ate, Beth-Shemasi lafa Yuda keesati isa had'e.

¹² Askarti worra Yuda ch'ufa dabsatani, worri ch'ufti worra ufiti baqate.

¹³ Yehohashini Amazia boojie, Yerusalemu d'ufe, d'akhaa marsani dira sunini jaarani haga, fullo Efraimuti fuud'e fullo mogati d'aabe, haga d'eerinna d'und'uma d'ibba afuri ch'ach'abse.

¹⁴ Inni worqifi qarsi ch'ufa guurate, ammalle miha Mana Waaqatifi ka mana hayyule ch'ufa guurate, Samariatini galate. Inni ammalle namale boojie galateeni.

¹⁵ Waan Yehoashini tolche, jannooma inni Amazia hayyu Yudatini dabsatele ch'ufa kitaaba Odu Hayyoota Yuda keesati t'aafaniti t'aafani.

¹⁶ Yehoashini due jennaani irreesa hayyoota Samaria keesati isa awaalani, duuba ilmi isa Yeroboamuni fulla isaa hayyu tahe.

Duisa Amazia ka hayyu Yuda

¹⁷ Amaziani, hayyuuni Yuda, eegi Yehoashini hayyuuni Israeli due, ganna kud'ani shani tae.

¹⁸ Waan Amaziani tolche ch'ufa kitaaba Odu Hayyoota Yuda keesati t'aafaniti t'aafani.

¹⁹ Biyyiti Yerusalemu keesati mala ijeecha iti d'aate jennaani inni kae Lakishiti baqate, ammo nyaapi isaa kaani faana d'ae achiti isa ijeese.

²⁰ Jennaani reefa isa fardaani Yerusalemuti geesani, irreesa hayyoota, ka dira Daudi keesati, isa awaalani.

²¹ Jennaani worri Yuda ilma isa Uzia, ka ganni isaa kud'ani jaa, hayyu tolche.

²² Duuba eegi abbaani due inni dira Elathi had'e, deefate jaare.

Hayyu Israeli ka Yeroboamu jed'ani

²³ Ganna kud'ani shaneeso ka Amaziani, ilmi Yoashi, hayyu Yuda tahe, Yeroboamuni, ilmi Yehoashi, hayyu Israeli tahe, ganna afurtami toko Samaria keesa lafa mohate,

²⁴ inni AABBO Waaqa durati ch'ubbu tolche, akuma Yeroboamuni, ilmi Nabathi, ka isa durati hayyu tahe worra Israeli ch'ubbu keesa, buuse innileeni akasuma tahe.

²⁵ Inni lafa worra Israeli ta duri nyaapi fud'ate ch'ufa nyaapa suni dabsate iraa deebise, kaarra Hamathi ta mirgati fuud'e galaana Sooda ka bitaati d'aabe lafa ch'ufa deefate. Tunini waan AABBO Waaqi Israeli duri raaga Yona, ilma Amitai, ka worra Gath-Heferitini biyyati hime.

²⁶ AABBO Waaqi aka worri Israeli gaargala gudda qabu, ka nami worra qarqaaru tokoleeni injirre arge.

²⁷ Ammo AABBO Waaqi worra suni ch'ufa haga jiru jireenna balleesu infeene, tanaafi harka hayyu Yeroboamutini worra baase.

²⁸ Waan Yeroboamuni tolche ch'ufa, jannooma inni nyaapani had'eefi aka inni dira Damaskitifi Hamathi worra Israeliti deebise, kitaaba Odu Hayyoota Israeli keesati t'aafaniti t'aafani.

²⁹ Yeroboamuni due jennaani irreesa hayyoota keesati isa awaalani, ilma isaa Zekariani fulla isaa hayyu tahe.