2 Hayyoota 13 - KITAABA WAAQA

¹ Ganna diddami sadeeso ka Yoashini, ilma Ahazia, hayyu Yuda tahe, Yehoahazini, ilmi Yehu, hayyu Israeli tahe, ganna kud'ani torba Samaria keesa lafa mohate.

² Akuma Yeroboamu, ka isa durati hayyu tahe, inni AABBO Waaqa durati ch'ubbu tolche, worra Israelile ch'ubbu keesa buuse. Inni haga jiru kara isaa hama suni lakisu dide.

³ Duuba sunifi AABBO Waaqi worra Israeliti dallane, aka Hazaelini hayyu Shamutifi ilmi isaa Benhadadi worra Israeli dabsatu, maro heddu iti lakise.

⁴ Jennaani Yehoahazini AABBO Waaqa kad'ate, AABBO Waaqileeni aka hayyuuni Shamu guddo worra Israeli dabsate arginaani kad'a isaa d'agaye,

⁵ AABBO Waaqi qarqaarsa worra Israelitini harka worra Shamu keesaa baasu ergeefi, duuba akasiini worri Israeli akuma duri kaani nagaya horate.

⁶ Ammo worri Israeli ammalle ch'ubbu Yeroboamuni worraatini d'ufe iraa deebiu dide, guyya ch'ufa tolchuma tolche; akheekhi waaqa Ashera jed'anileeni Samariuma keesati hafe.

⁷ Yehoahazini askarti shantama ta fardatifi gaari kud'anifi askarti miilaani yaatu ta kuma kud'ani male askarti d'ibi inqabu; wonti akanatiifi askarti taani ch'ufa worra Shamuti hobaase d'ukeese ira ejaanjate.

⁸ Waan Yehoahazini tolche ch'ufafi jannooma isale kitaaba Odu Hayyoota Israeli keesati t'aafaniti t'aafani.

⁹ Inni due jennaani Samaria keesati isa awaalani, ilmi isa Yehoashini fulla isaa hayyu tahe.

Hayyu Israeli ka Yehoashi jed'ani

¹⁰ Ganna sodomi torba ka Yoashini hayyu Yuda tahe, Yehoashini, ilmi Yehoahazi, hayyu Israeli tahe, ganna kud'ani jaa Samaria keesa lafa mohate.

¹¹ Innileeni faanuma Yeroboamu ka worra Israeli ch'ubbu keesa buuse bahe AABBO Waaqa durati ch'ubbu tolche.

¹² Waan Yehoashini tolche ch'ufa, jannooma inni hayyu Yuda Amazia lola keesati dabsatenile kitaaba Odu Hayyoota Israeli keesati t'aafaniti t'aafani.

¹³ Yehoashini due jennaani irreesa hayyoota Samaria keesati isa awaalani, jennaani ilmi isaa, ka Yeroboamu jed'ani fulla isaa hayyu tahe.

Duisa Elisha

¹⁴ Raagi Elisha jed'ani kaani aka hama faaya d'abe, duud'ame; jennaani ato inni inch'ichini Yehoashini isa argu d'ufe, iti bohe waan jed'e, Aabbo kiyya! Atini duri guddo Israeli nyaapa ira d'owarte!

¹⁵ Elishani waan jed'eeni, Guubefi t'iya fud'adi. Inni fud'ate jennaani Elishani harka ufi harka hayyu ira keeyate.

¹⁶ Elishani, aka darbattu kurfefad'i jed'eeni.

¹⁷ Jennaani dubbi raaga gula hayyichi deresha gara lafa Shamuti aanu bane. Elishani waan jed'eeni, T'iya darbad'u. Akuma hayyichi t'iya darbateeni raagi waan jed'eeni, T'iyiti AABBO Waaqa ta inni Shamuni dabsatu sii, atini worra Shamu haga dabsatuuti Afeki keesati haata.

¹⁸ Jennaani Elishani waan hayyuuni jed'e, T'iya hafte fuud'i, lafaani woraani. Hayyichi maro sadi lafaani woworaane eege yaala bahe.

¹⁹ Jennaani Elishani iti dallane waan jed'eeni, Atini sila maro shani jaa lafaani woraanu malte, duuba ato sila akasi tolchite worra Shamu ch'ufa inhobaafta; ammo amma tana maro sadi ch'alla worra dabsatta.

²⁰ Duuba eege Elishani due awaalani. Ganna ch'ufa duuli Moabu lafa Israeli had'u d'ufe.

²¹ Gaafa toko ka nama toko awaalu jirani duula worra suni argani jennaani, biyyiti reefa suni awaala Elisha keesa buufte, kaate biraa baqate. Reefi sunini akuma lafe Elisha tuqeeni jiraate, namichi kaani kae oli eje.

Woraana worra Israelitiifi ka Shamu jiddu jiru

²² Hayyuuni Shamu Hazaelini haga Yehoahazini lafa mohate ch'ufa worra Israeli aka hama dabse,

²³ ammo AABBO Waaqi worra jaalate naheefi, worra balleesu dide qarqaare, maro inni duri wold'aqisa Abrahamufi Isaaqofi Yakobo woliini tolfateefi. Inni takuma haga arrale worra isaa indeene.

²⁴ Hazaelini, hayyuuni Shamu, due jennaani ilmi isaa Benhadadini fulla isa hayyu tahe.

²⁵ Jennaani Yehoashini, hayyuuni Israeli, maro sadi Benhadadi dabsate, dira duri Benhadadini, gaafa Yehoahazini abbaani Yehoashi, lafa mohate iraa fud'ate kaani, iraa deefate.