2 Hayyoota 1 - KITAABA WAAQA

Eliyaafi hayyu Ahazia

¹ Eegi hayyu Ahabuni due, worri Moabu finna worra Israeli dide.

² Hayyu Ahaziani mana isaa ka Samaria, jiru iraa d'aqate aka hama wotahe. Tanaafi inni nama gara Baal-Zebubu, waaqa dira Ekroni, erge waan jed'eeni, Anini infayya mo infayyu? jed'aa na gaafad'a.

³ Ammo malaikaani AABBO Waaqa waan Eliya worra Tishbitini jette, Kai, gara jara hayyu Ahazini erge d'aqi, waan jettuuni, Atini maanifi Baal-Zebubu waaqa Ekroni wogaafata? Atini waan waaqi Israeli keesa jiru inseetu?

⁴ Waan atini hayyuuni jettu, AABBO Waaqi waan jed'u sire ira ch'iiftu suni fayyite iraa inkaatu, inuma doota! Eliyaani dubbi AABBO Waaqi isani jed'e guute,

⁵ jari ergani kaani kae, hayyuuti deebie. Inni, maafi gadi dachaatani? jed'e worra gaafate!

⁶ Worri waan jed'eeni, Nami toko nuni bahe waan nuni jed'e, Beena, hayyu isani ergeti dachaa waan jettaniini, AABBO Waaqi waan jed'u, Atini maanifi nama gara Baal-Zebubu waaqa Ekroniti ergita? Atini waan Waaqi Israeli keesa jiru inseetu? Sire ira ch'iiftu suni fayyite iraa inkaatu, inuma doota!

⁷ Hayyichi waan jed'eeni, Nami sunini nama akami jiru?

⁸ Worri waan jed'eeni, Inni woya goga hori ira mid'aasani gurda gogatini ufiti hid'e deemani. Hayyichi waan jed'e, Yabeekhe, laki sunini Eliya.

⁹ Jennaani inni namicha askarti shantamati mata toko gara Eliya ka gaara gubba jiruti erge waan jed'eeni, Ee, nama Waaqaa, hayyuuni gabui sini jed'a.

¹⁰ Eliyaani waan jed'eeni, Yo anini nama Waaqa taate, ibidi ha gubba gad'ufe siifi jara kankele balleesu! Hojuma suni ibidi gadi bue namichafi jara isaa hobaase.

¹¹ Hayyichi nama askarti shantamati mata toko d'ibi jara isaa woliini erge, worri d'ufe waan Eliyaani jed'e, Ee nama Waaqaa hayyuuni, hurrisi, gabui sini jed'a!

¹² Eliyaani waan jed'eeni, Yo anini nama Waaqa taate, ibidi ha gubba gad'ufe siifi jara kankele balleesu! Hojuma suni ibidi gara Waaqati gabue, namichafi jara isale balleese.

¹³ Ammalle hayyichi nama askarti shantamati mata toko d'ibi jara isaa woliini erge. Inni gaara kore Eliya durati jilbifate kad'ate waan jed'eeni, Ee nama Waaqaa, anaafi jara kiyya nahi, lubbu nu baasi!

¹⁴ Worra askarti mata kaani lamaanifi askarti worrale ibidi gubba d'ufe, balleese, ammo atini na nahi, lubbu na baasi!

¹⁵ Malaikaani AABBO Waaqa waan Eliyaani jette, Insodaatini, beeni gabui, isa woliini yaa. Jennaani Eliyaani kae, namicha kaani woliini gara hayyu d'aqe

¹⁶ waan jed'eeni, wonti AABBO Waaqi sini jed'u tana: Waan atini Baal-Zebubu Waaqa Ekroniti nama ergiteefi — aka waan Israeli keesa Waaqi nami kad'atu injirre — atini amma infayyitu, indoota.

¹⁷ Ahaziani akuma AABBO Waaqi Eliyaani jed'e kaani due. Ahaziani ilma inqabu, tanaafi oboleesi isaa Yoramuni fulla isaa hayyu tahe, ganna lameeso ka Yehoramuni, ilmi Yehoshafathi, hayyu Yuda tahe.

¹⁸ Waan hayyu Ahaziani tolche ch'ufa kitaaba Odu Hayyoota Israeli keesati t'aafaniti, t'aafani.