1 Yohona 4 - KITAABA WAAQA

¹ Jaalaani tiyya, nama, Anini Lubbu Waaqa qabu jed'u ch'ufa ind'ugefatiina, ammo gargari hubad'a aka lubbuuni suni gara Waaqati d'ufte. Wonti akanatiifi raagi d'ara hedduuni ya lafa d'ufe.

² Kara kanaani Lubbu Waaqa beetani: Lubbuuni Yeso Kristoni nama tahe jettu ch'ufti gara Waaqati d'ufte.

³ Ammo lubbuuni Yeso mormitu gara Waaqati ind'umne. Lubbuuni tunini gara Nyaapa Kristoti d'ufte; aka isiini d'uftu ya d'ageetani, amma ya d'ufte, lafa jirti.

⁴ Ammo ijoolle tiyya, isani ka Waaqaati, raagoota d'ara ya dabsattani; wonti akanatiifi Lubbuuni isani keesa jirtu lubbu worra lafa keesa jiru ira jabdu.

⁵ Worri worra lafaati, waan lafa dubbata; maro tanaafi lafti worra ch'aqafti.

⁶ Ammo nu ka Waaqaati. Nami Waaqa beekhu ch'ufti nu ch'aqasa; ka Waaqa imbeenne nu inch'aqasu. Kara kanaani lubbu d'ugatiifi lubbu d'ara gargari beenna.

Waaqi jaalala

⁷ Jaalaani tiyya, woljaalanna, waan jaalalti gara Waaqati d'uftuufi. Nami jaalala qabu ch'ufti ijoolle Waaqaati, Waaqale imbeekha.

⁸ Nami jaalala inqamne Waaqa imbeekhu, waan Waaqi jaalalatiifi.

⁹ Waaqi kara kanaani jaalala ufi nuu garsiise: inni Ilma ufi tokocha lafati erge, aka nu isaani jireenna argannu.

¹⁰ Jaalalti tana: waan nu Waaqa jaalannefiiniti, ammo waan inni nu jaalate, Ilma ufi nu erge, akanaani maro huji isaatiifi daba keenna nu araaramani.

¹¹ Jaallani tiyya, yo Waaqi hagana nu jaalate, nuleeni woli jaalachu malle.

¹² Nami taka Waaqa arge injiru; yo nu woljaalanne Waaqi nu keesa jira, jaalalti isaa nu keesati qit'oomti.

¹³ Kara kanaani aka d'uguma Waaqa keesa jirru ammalle aka Waaqi nu keesa jiru beenna: inni ya Lubbu ufi nuu kenne.

¹⁴ Ammalle nu ya garre ammalle biyyati odeesina aka Abbaani Ilma ufi erge, aka Qarqaarsa lafaa tahu.

¹⁵ Nami, Yesoni Ilma Waaqa jed'u ch'ufa Waaqi isa keesa taa, innileeni Waaqa keesa taa.

¹⁶ Nuleeni imbeenna, ammalle ind'ugefanna jaalala Waaqi nuu qabu. Waaqi jaalala, nami jaalalaani tau ch'ufti Waaqa keesa taa.

¹⁷ Maro waan kanatifi jaalalti nuu qit'oofti, aka nu Guyya Qorsuma woma insodaanne, maro jireenni keenna lafa tana keesa aka ka Kristo jiruufi.

¹⁸ Sodaani jaalala keesa injirtu; jaalalti d'uga soda balleesiti. Tanaafi nama soda qabu keesati jaalalti inqit'oomne, waan sodaani gaargala qabduufi.

¹⁹ Wonti nu jaalannuufi, Waaqati qara nu jaalate.

²⁰ Yo nami, Anini Waaqa jaalad'a ufiini jed'e, ammo oboleesa ufi jibbe, inni kiyyiba. Inni dandae Waaqa ka ilaani ingarre injaalatu, eegi oboleesa ufi ka ilaani argu injaalanne.

²¹ Tanaafi seeri Kristoni nuu kenne kana: nami Waaqa jaalatu oboleoleesa ufile jaalachu male.