1 Samueli 4 - KITAABA WAAQA

¹ Bara suni worri Filisti wolti bahe worra Israeli had'e jennaani worri Israelileeni duulaa kae fulla Eben-Zeriti qubate, worri Filistileeni Afekiti qubate.

² Worri Filisti worra had'e, eegi guddo wolhad'ani worra dabsate nama kunki afuri artiti keesaa ijeese.

³ Worri duula ka fiige gale jennaani, jaaroleeni Israeli waan woliini jette, AABBO Waaqi maanifi aka worri Filisti nu dabsatu nuti lakisa? Nu yaasa, Sanduqa Wold'aqisa AABBO Waaqa Shilo fuuna, aka isa achi geesine, duuba AABBO Waaqi harka nyaapa keenna keesaa nu baasu.

⁴ Jennaani nama Shiloti ergani Sanduqa Wold'aqisa AABBO Waaqaa, ka akheekha fulla guddinna AABBO Waaqi tau garsiisu, fuud'ani. Duuba ilmaani Eli lamaani ta Hofnifi Finehasi jed'ani Sanduqa suni gula d'ufte.

⁵ Sanduqi Wold'aqisa AABBO Waaqa suni artini bahe jennaani worri Israeli gammade lalabe lafa chochoose.

⁶ Worri Filisti iyyani suni d'agaye jennaani waan jed'e, Iyyanti gara olla Ebraniati d'uftu tunini maani? Worri aka Sanduqi AABBO Waaqaa olla Israelitini bahe d'agaye jennaani,

⁷ sodaatani waan jed'ani, Amma ya banne, wonti akana kunini taka nuti ind'umne, arra male.

⁸ Eentu dandae harka Waaqa jaba ka irre qabu jalaa nu baasa? Waaqi kunini Waaqa worra Misiri lafa alooti hobaase!

⁹ Garaa jabaad'a, aka d'iira had'a, worra Filisti! Yo akasi intahini, nu tisse worra Ebrania kana taana, aka duri worri tisse nuu tahe. Tanaafi aka d'iira had'a!

¹⁰ Worri Filisti haga dandau ch'ufa had'e worra Israeli dabsate worrati baqachise. Nami guddo hobae nama Israelile ka kuma sodoma achiti hobaasani.

¹¹ Sanduqa Waaqale boojiani, ilmaani Eli Hofnifi Finehasile lachu fit'ani.

Duisa Eli

¹² Nami toko, ka gosa Benjamini, fulla woli had'eni taani baqate guyyuma suni Shiloni bahe. Inni aka laalala garsiisu woya ufi tatarsaase biyye matati ufi naqe.

¹³ Elini ka waan Sanduqa Wold'aqisa guddo garaani isaa ira sodaachu jiru d'aatu kara barch'uma ufi ira tae laala. Namichi kaani diraani bahe, oduuni dira ch'ufa qabate jennaani, nami ch'ufti nahe, iyye lalabe bohe.

¹⁴ Elini iyyaana d'agaye waan jed'e, Iyyanti tunini ch'ufti mani? Namichi kaani gara Eli utaale odu iti himu d'aqe.

¹⁵ (Gaafasi ganni Eli 98, ilale diquma ind'abini.)

¹⁶ Namichi waan jed'eeni, Anini arra fulla iti woli had'ani suni fiige armaani bahe. Elini waan jed'e, Eehayi odu qabda, odeesi, gurba kiyya.

¹⁷ Namichi oduuni d'ufe kaani waan jed'eeni, Worri Israeli ya Filisti baqate, aka hama nu balleesani nu dabsatani. Suni malele ilmaani tante lamaani, Hofnifi Finehasile, yayu fit'ani ammalle Sanduqa Wold'aqisa Waaqale yayu boojiani.

¹⁸ Inni maqa Sanduqa Wold'aqisa Waaqa d'ae jennaani Elini dudda duubati barch'uma isaa, ka d'aatu fulloo eju, iraa d'aqate. Inni guddo jaarsa, ammalle gabba, tanaafi qaarinaani lumeeni ch'abt'e achumati due. Inni ganna afurtama jaallaba Israeli tahe.

Duisa niiti Finehasi

¹⁹ Niitiini Finehasi, ka ilma Eli, garaacha qabdi, waan halkani d'ala seente. Isiini aka Sanduqa Wold'aqisa Waaqa boojianifi ammalle aka d'iirsafi abbaani duani d'ageennaani hojuma suni ilmeeni iti ejate d'alte.

²⁰ Ato isiini duu jirtu nad'eeni isi deesiftu waan jetteeni, Obsi yayu ilma d'alte. Ammo isiini waan jed'aniini sunini odule kaafte womale gula injenne.

²¹ Jennaani isiini much'a maqa Ikabodi baafteefi waan jette, Guddinni Waaqa yayu Israeli keesaa kae — wonti isiini akasi jetteefi, maro Sanduqa Wold'aqisa Waaqa boojiani ammalle Abbaani d'iirsa isiitiifi d'iirsi isiileeni duanifi.

²² Isiini waan jette, Guddinni Waaqa yayu Israeli keesaa kae, maro Sanduqa Wold'aqisa Waaqa qabani boojianifi.