1 Samueli 23 - KITAABA WAAQA

¹ Daudini aka worri Filisti dira Keila had'e mid'aani d'io murani saame d'agaye. Jennaani

² inni waan Waaqaani jed'e, AABBO worra Filisti kana deeme had'a? AABBO Waaqi waan jed'eeni, Ee beeni, worra had'i, dira Keila suni harka worra keesaa baasi.

³ Ammo jari Daudi waan isani jed'e, Nu lafa tana keesale waan guddo sodaannu qamna; yo Keila d'anne worra Filisti haane haganale ira nuti hammaatti!

⁴ Duuba Daudini AABBO Waaqa gaafannaani AABBO Waaqi waan jed'eeni, Beeni, dira Keila had'i, anini worra Filisti harka keetiti keenna.

⁵ Duuba Daudifi jari isa Keila d'aqani, worra Filisti had'ani, nama heddu fit'ani, hori worrale fuud'ani. Aki Daudini dira suni baase akasi.

⁶ Gaafa Abiatharini, ilmi Ahimeleki fiige Keilati Daudini bahe, inni gaafasi Woya aka korbo hid'atani taani d'ufeeni.

⁷ Saulo aka Daudini Keila d'aqe iti himani jennaani inni waan jed'eeni, Waaqi yayu harka kiyya keesa isa buuse. Daudini yayu dira d'akhaani marsani aka naabo jaarani d'aqe t'urura keesa ufi buuse.

⁸ Jennaani Sauloni askarti isaa ch'ufa wolti yaame, aka worri Keila d'aqe Daudifi worra isaa marse had'u.

⁹ Daudini aka Sauloni had'iisa iti malatu d'agaye jennaani waan qaallicha Abiatharini jed'e, Woya aka korbo hid'atani taanini kooti.

¹⁰ Jennaani Daudini waan jed'e, AABBO Waaqa Israeli, anini aka Sauloni ana hojattu tantetiti jed'e Keila d'ufe aka had'e balleesu malate ya d'agaye.

¹¹ Worri Keila harka Sauloti naa inkenna? Sauloni ka ind'ufa jed'ani d'uguma ind'ufa? Ee AABBO, Waaqa Israeli, nati himi. AABBO Waaqi waan jed'eeni, Ee, inuma d'ufa.

¹² Ammalle Daudini waan jed'e, Worri Keila d'uguma anaafi jara kiyya harka Sauloti kenna? AABBO Waaqi waan jed'eeni, Inuma kenna.

¹³ Duuba Daudifi jari isaa, ka nama d'ibba jaa gahu, hojuma suni Keila kaani ka fulla tokole qubatani iti inture durumati godaanani. Sauloni aka Daudini Keila keesaa baqate d'agaye jennaani mala iti d'aate kaani lakise.

Daudi lafa gaareeni keesa

¹⁴ Daudini lafa gaareeni ta lafa aloo ta d'aatu Zifu keesa keesati d'okhate achuma tae. Sauloni guyya ch'ufa isa barbaade, ammo Waaqi Daudi harka isaati kennu dide.

¹⁵ Daudini ka Horeshi lafa aloo ta d'aatu Zifu keesa jiru aka Sauloni isa ijeesu fed'u hubate.

¹⁶ Jennaani Yonathanini artiti iti d'ufe aka Waaqi dandae isa qarqaaru iti hime garaa jabeese

¹⁷ waan jed'eeni, Insodatini, abbaani kiyya Sauloni dandae woma si intolchu. Inni imbeekha, aka atini hayyu Israeli taate, anini siti aanu.

¹⁸ Worri lachu Waaqa durati wold'aqe wolti kakhate jennaani Daudini Horeshi d'aqe, ammo Yonathanini worra ufiti gale.

¹⁹ Worri toko Zifu bahe gara Saulo, ka Gibea jiru, d'aqe waan jed'eeni, Daudini lafa teenna ta Horeshi gaara Hakila gubaa lafa aloo ta Yudea gama bitaa keesati d'okhatu jira.

²⁰ Nu imbeenna, ee hayyicha, aka atini guddo isa qabu feetu; tanaafi lafa teenna kooti, nu aka inni imbaanne, isa qamne harka keetiti kennina.

²¹ Sauloni waan jed'eeni, AABBO Waaqi isani eebisinna, waan isani akana na qaabattanifi.

²² Beena, aka dansaa qorqorad'a; fulla inni jirufi nama isa achiti argele aka dansaa hubad'a. Waan anini d'agaye inni guddo mala qaba.

²³ Fulla inni iti d'okhatu aka dansaa hubad'a, maro tokotu koota, na beesisa. Duuba anini isani woliini deeme, yo inni lafa suni keesa jiraate, ato lafa Yuda ch'ufa keesa barbaadele, qabu male intau.

²⁴ Duuba worri Saulo biraa yae Zifu dachae. Daudifi jari isaa gaafasi lafa gamooji ta Maoni jirani, bale aloo ta lafa gamooji ta Yudea gama bitaa keesa.

²⁵ Saulofi jari isaa Daudi barbaadu d'aqani, ammo Daudini mala worra d'agaye kubi d'akhaye lafa aloo ta Maoni d'aqe achi tae. Sauloni aka inni achi d'aqe d'akhaye jennaani faana reebe.

²⁶ Saulofi jari isaa kubi taani gama suni jirani, Daudifi jari isaleeni gama kaani jirani worri Saulofi jara isaa dura baqachu jirani ammo Saulofi jari isaa diquma worra d'aqabe inqabini.

²⁷ Hojuma suni nami toko qonqooni Sauloti d'ufe waan jed'eeni, Hurrisi, keesa deebii, worri Filisti ya d'ufe, lafa had'u jira.

²⁸ Duuba Sauloni Daudi jalaa deebie, worra Filisti d'aqe, had'e. Tanaafi kubi sunini kubi wo garagari baaftu jed'ani.

²⁹ Daudini achi kae, lafa Engedi d'aqe achi tae.