1 Samueli 17 - KITAABA WAAQA1 Worri Filisti aka worra Israeli had'u dira Yuda ka Soko jed'aniti wolti bahe; lafa toko ta Efes-Damimu jed'ani ta jiddu Sokofi Azeka, qubate. 2 Saulofi worri Israelileeni bale Eela qubatani, aka worra Filistitini wolhad'ani kurfefatani. 3 Worri Filisti gaara toko irati wolti bahe, worri Israelileeni gaara d'ibi irati wolti bahe ka baleeni jiddu worraa jirtu. 4 Namichi janni guddaani toko, ka Goliathi jed'ani, ka worri isa dira Gathi jiru, olla Filistiti gad'ufe. D'eerinni isaa d'und'uma jaafi taaku toko; 5 inni kofia sibiila diimani mid'aasani matati keeyate koti sibiila diimani mid'aasani, ka ulfinni isaa kilo shantami torba, keeyate, 6 miila isaleti inni sibiila diima keeyate woraana sibiila diimani mid'aasani gurmu ira keeyate. 7 Soometi woraana isaa haguma utuba geeti, ulfinni mata woraana isaa kilo torba askarticha tokoti isa dura deema, ka wonte jala baatu. 8 Goliathini achi eje lalabe waan worra Israelitini jed'e, Isani maanifi ka had'iisa kurfoftani achi ejaanjitani? Anini worra Filistiti, beekha; tissele Saulo tana, nama keesani toko gabaasa, woli haana. 9 Yo inni na dabsate na ijeese, nu tissele teesani taana; ammo yo anini isa dabsad'e isa ijeese isani tissele teenna tatani. 10 Anini amma tana askarti Israeli ch'ompifad'a. Nama toko na baasa, wolhaana. 11 Dubbi suni d'ageennaani Saulofi askartini isa guddo sodaatani mudamani. Aka Daudini fulla askartini jirtu d'ufe 12 Daudini ilma Yeseti, ka gosa Efrathi, ka worri isaani dira Bethlehemu, ka lafa Yuda. Yeseni ilmaani saddeeti qaba, bara Sauloni nama fide suni inni waan jaare hobae. 13 Ilmaani isaa gugurdoni nami sadi yayu Saulo woliini duula d'at'e. Angafi Eliabu, ka iti aanu Abinadabu, ka sadeesoleeni Shama. 14 Daudini ilma maand'a, duuba haga oboleyaani isaa gugurdoni sadeeni taani Saulo gula yaatu, 15 Daudini worra biraa deeme Bethlehemuti deebie ree abba isaa tisse ammalle keesa deebia. 16 Goliathini guyya afurtama diiramafi galgala gabahe, askarti Israeli ch'ompifata. 17 Guyya toko Yeseni waan Daudini jed'e, Akhaawi mid'aani tana ta subba tokotifi qit'a kud'ani fuud'i, arifad'i oboleyaani tante ta duula jirtu geesi. 18 Ammalle ititu qooda kud'ani tana gudda askartiti geesi. Waan oboleyaani tante keesa jirtu hubad'u ammalle waan aka atini worra garte na garsiisa natiini kooti. 19 Saulofi oboleyaani tanteetifi worra Israeli kaani ch'ufti bale Eela jed'ani keesa jirani, aka worra Filisti had'ani. 20 Boriyyaate Daudini diirama lafaa kae, hooliye nama d'ibiti lakise, miha kaani fae, akuma Yeseni jed'e kaani kae iti d'aabate. Hojja inni artini bahe, askartini Israeli ufuma fokorte lola yau jirti. 21 Askartini Filistitifi ta Israeli lola kurfefatte fuula wolti deefate. 22 Daudini miha kaani namicha miha askarti qorqoratu kaani kenne, utaale, fulla askartini lola kurfo ejitu taani d'aqe oboleyaani ufi nagaya fuud'e. 23 Ato inni tae worraani woliini haasau, Goliathini namichi jabaani Filisti kaani, askarti isaani keesa gad'ufe, akuma qara kaani worra Israeli kaani ch'ompifate, ka Daudini d'agayu. 24 Worri Israeli isa arge jennaani nami ch'ufti isaa sodaate duraa baqate. 25 Jennaani waan woliini jed'ani, Nama kana laala aka inni nu ch'ompifatu; hayyichi keenna Sauloni nama isa ijeese waan guddo kennaafi intala ufile fuusise worra isaani damoosa ira imfud'ani jed'e. 26 Daudini waan nama isa bira ejaanjuni jed'e, Nama namicha Filisti kana ijeese ch'eera hama kana gosa Israeli dura baase maani kennanifi? Qarale namichi Filisti kunini ka qabanqaba inqabatini hojja tae askarti Waaqa jiru ch'ompifatu eenu ufi seha? 27 Worri waan qara woliini jed'e kaani iti hime waan jed'eeni, wonti nama Goliathi ijeesu tolchani kana. 28 Eliabuni, oboleesi Daudi guddaani, isa worra sunini haasau d'ageennaani aka hama dallane waan jed'eeni, Atini maani arma barbaada? Ree diqo taani atini eenuti lakifte lafa aloo keesati? Anini sii beekha, atini ch'ubbicha kiyyiba! qarale atini had'iisuma dawaachuu d'ufte. 29 Daudini waan jed'eeni, Anini maani yakeefi atini teete, dubbile na d'owarta? 30 Eege inni nama d'ibileti garagale dubbi suni gaafate, nami sunileeni ch'ufti akuma qara kaani iti hime. 31 Nami gari dubbi Daudini jed'e taani, d'ageennaani Sauloti hime, duuba Sauloni isa yaame. 32 Daudini waan Sauloni jed'e, Aabbo, nami tokoleeni namicha Filisti kana sodaachu himmalle. Nati deeme had'e balleesa. 33 Sauloni waan jed'eeni, Laki, atini isa had'u indandeetu, atini ammalle ijoolle inni haga kaimoma isaati asi askartuma. 34 Daudini waan jed'eeni, Aabbo, anini tissitu ree abba kiyyati, hojja nyeench'i yokhaani gorjami d'ufe ilmoole ree fud'atu ch'ufa, 35 anini reebe had'e iraa buusa. Hojja nyeench'i yokhaani gorjami suni nati garagalu, lubbu qabe d'ae ijeesa. 36 Anini nyeench'afi gorjamale ya ijeese, namicha aada inqamne, ka Filisti kana, ka askarti Waaqa jiru tae ch'ompifatu kanale inuma ijeesa. 37 AABBO Waaqi ka qeench'a nyeench'atiifi ka gorjama jala na baasu harka namicha Filisti kanale jaaluma na baasa. Jennaani Sauloni waan jed'eeni, Beeni, AABBO Waaqi si qarqarina. 38 Duuba Sauloni miha ufi ka lola Dauditi naqe; kofia sibiilatifi koti sibiila. 39 Daudini goraade Saulo hid'ate, aka deemu iti game ammo indad'abe maro inni miha akasi sunini deemu imbeeneefi. Duuba inni waan Sauloni jed'e, Anini dandae miha kanaani indeemu, imbaranne, jennaani ch'ufa ufira yaase. 40 Jennaani inni ule reeni tissu fud'ate d'akha qulqullicha shani bisaani yaa keesaa fuud'e, ukha keesa naqate, gulluba ufi fud'ate, Goliathi, fuula keesa deeme. Aka Daudini Goliathi dabsate 41 Jennaani namichi Filisti kaani ka nami wonte isaa isa jala baatu dura deemu, Dauditi ga d'ufe; 42 iti d'iaate jennaani aka Daudini gurba mid'aaga diqa arge tufate. 43 Waan jed'eeni, Uleeni atini harka qabdu tunini maani? Atini sare na seeta? Duuba maqa waaqa isaatini Daudi abaare, 44 waan jed'eeni, Anini fooni kanke allaatiifi bineensa nyaachisa. 45 Daudini waan jed'eeni, Atini goraadeefi woraanani nati d'ufta, ammo anini maqa AABBO Waaqa gudda, Waaqa askarti Israeli ka atini teete isa ch'ompifatuuni siti d'ufa. 46 AABBO Waaqi guyyuma kana harka kiyyati si kenne anini sii d'ae mata sira kuta. Ammalle reefa askarti Filisti allaatiifi bineensa ala nyaachisa. Duuba akasiini nami lafa keesa jiru ch'ufti, aka Israeli keesa Waaqi jiru, beekha. 47 Ammalle nami arma jiru, ka wolti bahe kunini ch'ufti aka AABBO Waaqi goraade yokhaani woraana male gumi ufi baasu arga. Lola isati dabsata, isani ch'ufale amuma harka keennati kenna. 48 Goliathini Daudi fuula keesa gadeeme jennaani Daudileni fuula keesa had'iisa utaale. 49 Inni harka ukha keesa keeyate d'akha toko gafuud'e gulluba keesa kaye Goliathini had'e adda d'ae boroose. Jennaani Goliathini lafa d'ae, fuulani lafati gombifame. 50 Duuba akanaani, ka goraade inqamne Daudini Goliathi gullubafi d'akhaani dabsate ijeese. 51 Jennaani iti ch'ee ira eje, goraade Goliathi qalqala keesaa fuud'e, mata iraa kute ijeese. Worri Filisti aka jabaani worraa due arge jennaani kae baqate. 52 Worri Israelitiifi ka Yuda iyye kara Gathitifi ka fullo Ekroni worra reebe. Reefi worra kara Shaarimuti deemu fulla ch'ufa keesa ch'iisa, haga Gathifi Ekroni. 53 Worri Israeli reebu worra Filistiti dachae jennaani fulla worri keesaa baqate suni saamani. 54 Daudini mata Goliathi fuud'e Yerusalemuti geese, ammo miha isa ka lola waaro ufitini galate. Aka Daudi Saulo duraani d'ufani 55 Sauloni hojja Daudini Goliathi had'u deemu arge jennaani waan Abineri gudda askarti isatini jed'e, Abineri, gurbaani kunini ilma eenu? Abinerini waan jed'eeni, Anini imbeekhu, aabbo. 56 Jennaani hayyichi waan jed'eeni, Yoosi beeni, odeefad'i. 57 Duuba Daudini Goliathi ijeese gale jennaani Abinerini isa gara Saulo geese, Daudini hojja sunile mata Goliathi harkumaa qaba. 58 Sauloni waan jed'eeni, Gurba, atini ilma eenu? Daudini, anini ilma hojattu kanke Yese ka Bethlehemu jed'eeni. |
Borana Bible © Bible Society of Kenya, 2019.
Bible Society of Kenya